Umukinnyi wa filime Mohammed Ali yavuze uko yasanze sinema y’u Rwanda

Yanditswe na Munyengabe Murungi Sabin
Kuya 28 Nyakanga 2016 saa 11:50
Yasuwe : XX
0

Umunyamerika Mohammed Ali Ojarigi waje i Kigali kwitabira iserukiramuco rya sinema Rwanda Film Festival, mu cyumweru agiye kuhamara yamenye byimbitse imiterere y’uyu mwuga abonamo icyerekezo gihamye ahazaza.

Mohammed Ali Ojarigi yavukiye mu Mujyi wa Minneapolis muri Leta ya Minnesota. Afite se ukomoka muri Nigeria na nyina w’Umunyamerikakazi, ni umwe mu bahanga mu bya sinema bitabiriye Rwanda Film Festival 2016.

Yabwiye IGIHE ko agiye kumara icyumweru mu Rwanda aho yabonanye na benshi mu batunganya filime biganjemo urubyiruko. Yavuze ko ibihangano bike by’Abanyarwanda yabashije kubona byamuhaye ishusho y’uko sinema izaba ihagaze mu gihe kizaza.

Yagize ati “Ntabwo nabonanye n’abantu bose bakora filime ariko mu baje muri Rwanda Film Festival. Nabonanye n’urubyiruko rukora filime, abenshi bafite ubushake bwo gukora no kumenya cyane.”

Yongeyeho ati “Naboneraho umwanya wo gushimira Kwetu Film Institute kuko yakoze akazi gakomeye, abenshi niho bize abandi irabafasha kwiteza imbere.”

Mohammed Ali Ojarigi yongeyeho ko iterambere rya sinema y’u Rwanda riri kwihuta cyane ari nabyo ashingiraho avuga ko ‘nta kabuza izatera imbere’. Ati “Kuba habera iserukiramuco nk’iri nabyo byerekana ko yazamutse, aya ni amahirwe ku bakora sinema kuko bahura na benshi baba baturutse mu bindi bihugu.”

I Kigali yaherekaniye filime ye ngufi yise ‘Your Land’ ivuga ku by’ubucakara, ubuzima bw’Abanyafurika muri Amerika n’inkomoko yabyo byose. Yavuze ko yayikoze agamije gukundisha Abanyafurika aho bakomoka no kubaremamo icyizere yifashishije amateka.

Yabonye inyubako isumba izindi…

Mu bihugu yatembereyemo ndetse n’iwabo muri Leta Zunze Ubumwe za Amerika, Muhammed yavuze ko inyubako ya Convention Center ifite umwihariko kurusha izo yabonye zose.

Ati “Ntabwo nari niteze ko nasanga mu Rwanda inzu itangaje nk’iriya. Ni igihugu kiri kwiyubaka, mu mahanga aho dutuye usanga ibihugu bya Afurika bifatwa nk’ibikennye cyane ku buryo nanjye numvaga nyine hano hari ibizu bishaje gusa, ariko iriya yambereye ikimenyetso.”

“Ni nziza cyane, yubatse mu buryo butangaje, yego niyo ya mbere mbonye ifite umwihariko. Niyo ya mbere yanshimishije.”

Umunyamerika Mohammed Ali Ojariji na Sarine Arslanian (Armenia) bari mu Rwanda

Yongeyeho ko ubuzima bw’i Kigali ari bwiza urebeye ku mibereho y’abaturage n’isura y’Umujyi. Ati “Ikindi ni uko hano nahasanze umuco wihariye, i Kigali harasa neza. Abantu baho ubona ko bubahiriza amategeko, niba leta ivuze ngo hajyeho isuku bikubahirizwa. Ni ibintu bishimishije cyane.”

Yifuzaga gutaha asuhuje Perezida Kagame

Yagize ati “Iyo ngira amahirwe yo kubonana na Perezida Kagame, byari kuba ari ishema. Narabyifuzaga mbere y’uko nza, ibaze ko yagiye muri Convention Center umunsi umwe mbere y’uko haberamo Rwanda Film Festival! Byari kuba iby’agaciro iyo mbonana na Kagame, byaba ari amahirwe kumubona.”

Yamenye Perezida Kagame amubwiwe na se ukunda kumubwira amateka ya Afurika n’ibijyanye n’uyu Mugabane. Ati “Data ni we wamumbwiye mbere y’uko nza i Kigali, yarambwiye ngo ningira amahirwe yo kuzamukora mu kiganza nzamumusuhurize. Data avuka muri Nigeria, nakuze ambwira amateka ya Afurika, aramukunda cyane, yakundaga kumuvuga…”

Muhammed ni umukinnyi ukomeye wa filime kandi uziyobora. Afite impamyabumenyi ya kaminuza mu ishami rya Theater Performing Arts yakuye muri University of Nevada iri i Las Vegas.

Muhammad Ali yitabiriye Rwanda Film Festival

Ni we muyobozi mukuru wa MOments Playhouse Theatre, aherutse gukina muri filime y’uruhererekane yitwa General Hospital aho akina yitwa ‘Adams’. Filime ye ‘Your Land’ iri mu zerekanwe muri Pan African Film Festival.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza