Kwiyunga, inzira ihamye yo kubaka igihugu

Kwiyunga, inzira ihamye yo kubaka igihugu


Yanditswe kuya 24-01-2013 - Saa 10:23' na Jean de Dieu Nsanzabera

Umwuga wa Sinema umaze gutera intambwe mu Rwanda. Abenshi binjiye mu guhanga no gukina filime, bibanda ku buzima busanzwe bwa muntu cyangwa bakagendera ku zo babonye, bagaheraho bubaka izabo. Gasigwa Leopord we yahisemo gukora irebana n’amateka u Rwanda rwanyuzemo kuva igihe cy’Ubukoloni kugeza mu mwaka wa 2010.

Aganira na IGIHE, Umuhanzi akaba n’umukinnyi wa filime, Gasigwa Léopold, yatangaje ko agiye guhyira ahagaraga filimi ya yise “Izingiro ry’amahoro”. Hagaragaramo uko u Rwanda rwagiye rwiyubaka, kuva rwava mu marorerwa ya Jenoside yakorewe Abatutsi.

Iyo filime ikubiyemo ibice bitatu by’ingenzi :

Igice cya mbere gihera mu gihe cy’Abakoloni kugeza mu 1990, hagaragaramo amateka mabi yaranzwe no kubiba Jenoside n’ivangura mu bana b’u Rwanda.

Ikindi gihera ku wa 01 Ukwakira 1990 kugeza ku wa 04 Nyakanga 1994, ubwo FPR Inkotanyi yahagarikaga Jenoside, icyo gice akaba ar icyo yise “Umuvuduko wa Jenoside ”.

Icya gatatu gihera ku wa 19 Nyakanga 1994 kugeza ku wa 9 Kanama 2010 ubwo habagaho amatora y’umukuru w’igihugu. Yacyise “Isanwa ry’Igihugu n’icyizere cy’ahazaza.“

Gasigwa asobanura ko iyi filime igamije kubaka ubumwe n’ubwiyunge mu banyarwanda haherewe ku mateka yabaye mu gihugu cyacu, kuko abiciwe n’abishe, batiyunze ngo bongere babane, intego yo kubaka igihugu itagerwaho.

Iyi igaragaramo abayobozi b’inzego zose za Leta y’u Rwanda zaba iza gisivili n’iza gisilikare, hagaragaramo kandi zimwe mu Ntiti z’abarezi bo muri za Kaminuza zitandukanye zo mu Rwanda. Akaba yarayitangiye mu 2006, ni ukuvuga ko amaze imyaka isaga 6 ayitegura.

Ijambo remezo asobanura muri iyo filime rigira riti “Utazi aho ajya, aho ageze hose agira ngo ni ho yajyaga. Tumenye amwe mu mateka twifuza gusiga inyuma, ariko tutayibagiwe.”

Igitaramo cyo gushyira ahagaragara iyi filime giteganyijwe ku wa 25 Mutarama 2013, muri Stade ntoya i Remera, guhera saa kumi n’ebyiri z’umugoroba.

Mu bamufashije kuyikora harimo Minisiteri ya Siporo n’umuco (MINISPOC), Komisiyo y’Igihugu yo kurwanya Jenoside (CNLG) na Hotel des Mille Collines.

Umwanditsi w’iyi filime Gasigwa Léopold yavukiye mu Ntara y’Amajyepfo mu Karere ka Huye, mu murenge wa Karama, Akagari ka Buhoro, ku wa 03 Nzeri 1979. Ni na ho yari atuye ubwo Jenoside yakorewe Abatutsi yabaga. Kubera amateka y’ibyamubayeho, ni yo mpamvu yatumye yandika iyi Filime igamije kunga Abanyarwanda.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO