Uyu mwaka u Rwanda ntirwagaragaye muri Tribeca Film Festival

Uyu mwaka u Rwanda ntirwagaragaye muri Tribeca Film Festival


Yanditswe kuya 2-05-2012 - Saa 13:10'

Mu gihe mu mwaka washize muri Tribeca Film Festival herekanwe filime zakozwe n’Abanyarwanda zigera kuri enye, ndetse n’umwaka wa 2010 hakerekanwa filime imwe yakorewe mu Rwanda, uyu mwaka si ko byagenze kuko nta filime n’imwe yo mu Rwanda yigeze iherekanirwa.

Iri serukiramuco ngarukamwaka ribera i New York muri Leta Zunze Ubumwe za Amerika, ni rimwe mu maserukiramico ya sinema akomeje kugenda akomera, kuri ubu byari ku nshuro yaryo ya 11, aho ryatangiye tariki 18 Mata rigeza tariki 29 Mata 2012.

Uyu mwaka muri iri serukiramuco hagaragayemo filime nyinshi ugereranyije n’iriheruka, filime zaturutse mu bihugu 48 byo ku Isi. Gusa muri izo filime zose nta y’Umunyarwanda yagaragayemo, mu gihe mu mwaka ushize muri Tribeca Film Festival herekanwe Filime ndende “Gray Matter”, iyi ikaba ari iy’Umunyarwanda Kivu Ruhoragoza, yanabashije gutoranywa muri filime 12 zahatanaga; herekanwe kandi Filime 3 ngufi z’Abanyarwanda arizo, “Lyiza” ya Marie-Clementine Dusabejambo , “Saa-Ipo“ ya Jean Luc Fils Habyarimana, ndetse n’iyitwa “On the grave of my Parent “ ya Kayambi Musafiri.

Jolie Murenzi uheruka kwitabira Tribeca Film Festival hano yari kumwe n'umukinnyi rurangiranwa wa filime, umunyamerika Ben Affleck ubwo yari mu Rwanda

Mu kiganiro na IGIHE, Jolie Murenzi, inararibonye muri sinema nyarwanda ukunze kugira uruhare muri nyinshi muri filime zikorerwa hano mu Rwanda, ndetse kuri ubu wari witabiriye iri serukiramuco i New York, yadutangarije ko muri uyu mwaka ushize wa 2011 ndetse no mu ntangiriro za 2012, abakora sinema mu Rwanda bibanze ku zigenewe isoko ryo mu Rwanda.

Yagize ati: “Uyu mwaka ushize hasohotse filime nyinshi zikozwe n’Abanyarwanda, ariko ahanini zose zari zigenewe isoko ryo mu Rwanda, kuko filime zijyanwa mu maserukiramuco mpuzamahanga usanga ziba zitandukanye cyane n’izikorwa hagamijwe ko zigurishwa mu gihugu imbere”.

Zimwe muri filime zasohotse mu mwaka ushize mu Rwanda zirimo “Inzozi” igice cya mbere n’icya kabiri yakozwe na Silver Film Productions, Ibanga ya JEC Film Productions, n’izindi nyinshi; gusa zose usanga zigenewe isoko rya hano mu gihugu bitewe n’uburyo zikozemo ndetse n’ibyo zivugaho.

Kivu Ruhorahoza wakoze 'Gray Matter'

Denis Nsanzamahoro ni umwe mu bakinnyi ba filime nyarwanda bamaze kumenyekana cyane kandi bazwiho ubuhanga; mu kiganiro na IGIHE we yavuze ko kuri ubu benshi mu bakora filime mu Rwanda batakitabira cyane amaserukiramuco mpuzamahanga kuko nta bihembo by’amafaranga biyatangirwamo.

Yagize ati: “Usanga iyo ujyanyeyo filime yawe ikegukana igihembo nta mafaranga aba agiherekeje ku buryo ahanini biba ari uguta umwanya.”

Twabibutsa ko mu mwaka wa 2010, Tribeca Films Festival yitabiriwe na Perezida Paul Kagame ubwo hanerekanwaga documentaire/documentary yitwa “Earth Made of Glass “, iyi ikaba yarakozwe na Deborah Scranton; amashusho yayo yafatiwe mu Rwanda hagati y’umwaka wa 2008 na 2009. Iyi filime ivuga ku ruhare rw’u Bufaransa muri Jenoside yakorewe Abatutsi, Perezida Kagame ayigaragaramo avuga ku mateka nyayo y’u Rwanda.

Perezida Kagame muri Tribeca Film Festival yo mu 2010, ari kumwe na Deborah Scranton
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO