Gutunga umugore atakoye byamuteye ubumuga

Umugore ukunda ibintu cyangwa utagira indangagaciro z’umuco yatendetse abagabo babiri baziranye, akaba yari afite umugabo ukunda kujya muri misiyo kenshi yahashingura ikirenge nyamugore agatangira guha gahunda abasambane be.

Rimwe rero reka umugabo azamubeshye ko agiye kuri misiyo izamara iminsi ine, ariko akaba yari yarabwiwe ibyo umugore akora yanga kugendera ku mabwire. Kuri iyi nshuro yashakaga kumwifatira ubwe.

Akiva mu rugo, umugore yahise ahamagara ihabara rya mbere ariha gahunda ya sa yine. Uwa kabiri amuha iya saa munani [ubwo wenda uwasa yine yari kugeza nka saa saba hanyuma undi akaza kurara nta wamenya.]

Uti “Byagenze gute rero ?”

Uwa sayine yaje sa tanu n’igice, akihagera umugore ati “Ko watinze kandi sa saba mfite gahunda yihutirwa ? Ngwino tugire vuba !” Ngo batere intamwe imwe umuntu aba arakomanze. Yari nyir’urugo ugarutse.

Umugore ngo akureho akarido arumirwa, ati “Reka nshake agafunguzo.” Yigiriye inama yo gushyira rya habara mu mufuka awegeka imbere y’urugi, nuko akingurira cheri we.

Batangira kuganira ku by’urugendo rwasubitswe, hashize akanya umugabo yirambika mu ntebe ngo aruhuke.

Rya habara rya kabiri ryo ryaje mbere ho isaha, ubwo na we aba arakomanze. Nyir’urugo ati “Uwo ni nde ?”

Umugore n’isoni ngo akingure, ati “Ese ni wowe ? Nagize ngo ntukije gutwara imyumbati yawe. Akira ngukorere ndumva binaremereye !”

Umugabo n’ubwoba arikorera, ageze imbere hari umuferege aturamo cya gifuka akeka ko ari ibyumbati bibisi koko arigendera.

Mu gitondo ajya kureba inshuti ye bari bamubwiye ko yinjiye ibitaro, agezeyo baraganiraaaa ; umurwayi ati “Sha wahora ni iki ko nahuye n’impanuka !” Ati “Nagiye kubinda ahantu nyir’urugo arahansanga umugore anshyira mu mufuka, hashize akanya haza ikindi kigabo cy’ikigome umugore arakinkorera ngo ni imyumbati. Cyaragiye kinkubita mu muferege imbavu ubu basanze zavunaguritse, umutwe wo sinakubwira mbese gukira kwanjye ni hamana.”

Uwari amuteze amatwi ati “Yoo ! Pole sana ndugu ! Sinamenye ko ari wowe bankoreye mba naratuye gahoro !”