Nyabugogo : Ubujura bwo mu modoka buravugiriza

Nyabugogo : Ubujura bwo mu modoka buravugiriza


Yanditswe kuya 30-01-2013 - Saa 11:00' na IGIHE

Muri iki gihe Nyabugogo habaye ihuriro ry’abantu benshi, abatega imodoka zitwara abagenzi, abahahira mu maduka yegereye Gare cyangwa se aho bakunda kwita ku mashyirahamwe, urujya n’uruza rw’imodoka ziva cyangwa se zigana mu mujyi hagati no mu ntara, ubujura buragenda bufata indi sura.

Ikigaragaraga muri iyi minsi ariko ni uko abo benengango bibasiye abagenda mu mamodoka bakabambura amatelefoni cyangwa se bakabatwara ibindi bintu by’agaciro.

Aba babikora, bafite amayeri menshi atandukanye. Uraba uhagaze muri feux rouges (ya matara ayobora imodoka) ukabona umuntu araje ashikuje telefoni uwo mwicaranye mu modoka. Abandi bakaza bakegera imodoka, bagira Imana bagasanga hari umuryango utarimo ikare, bagahita bafungura bagatwara ibyo babona hafi, cyane cyane ibikapu, dore ko akenshi abatwara imodoka bashyira ibikapu birimo ibintu bitandukanye kuri imwe mu ntebe z’imodoka.

Ikibabaje kandi, ni uko abo bajura bahita bigendera, uwibwe agataka akabura umutabara, nyamara inkengero z’umuhanda zuzuye abantu. Iyo abo bajura bamze kugira uwo bacuza utwe, bahita biruka berekeza iya Nyabugogo mu gishanga.

Umugabo aherutse kuba ari i Nyabugogo yiviriye ku kazi nimugoroba, ageze hafi ya gare, asanga hari umubyigano w’imodoka ukomeye cyane, kubona aho unyura ntibyamworohera. Umusore yaraje akomanga ku kirahure cy’imodoka asa n’ushaka kugira icyo amubwira. Umusore wawe na we yahise afungura urugi kuko yari amaze kubona ko ku ntebe ku ruhande rw’umushoferi hari hateretse igikapu kirimo imashini.

Yahise agiterura ariruka. Uwari atwaye imodoka yashatse kuvamo ngo amukurikire, undi musore na we wari uhagaze iruhande rw’imodoka yahise amukubita urushyi mu maso, nuko ahita yisubirira mu modoka abura uko abigenza.

Bigaragaza ko abafite umugambi wo kwiba kuri ubu buryo, baba bafite abandi bakorana aho hafi.

Ibi rero birasaba abatwara imodoka kugenda bafite amakenga, maze bakita kuri ibi bikurikira :

1. Kureba niba imiryango y’imodoka ifunze neza,

2. Kudapfa kumanura ikirahure igihe cyose hagize umuntu utazi ushaka kukuvugisha,

3. Kwirinda kuvugira kuri telefoni igihe utwaye imodoka, uretse ko byo ari n’amakosa ahanwa n’amategeko y’umuhanda,

4. Inzego z’umutekano nizikaze umurego mu guhashya aba bajura bibasira abagenda mu modoka.

Uko biri kose umuntu agomba kubaho ari uko yakoze umurimo utunganye. N’aho gushaka kubaho ari uko watwaye iby’abandi ku ngufu, ntibira ubikora, kuko akari kera utabwa muri yombi. Abafite gahunda yo gutungwa no kwambura iby’abandi bashaka bakwisubiraho hakiri kare kuko amaherezo inzego z’umutekano zizabata muri yombi.

Agapfa kaburiwe ni impongo !

Umukunzi wa IGIHE/Nyabugogo

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO