Edward Lowassa yibajijweho nyuma yo gusura Perezida Magufuli muri Perezidansi

Yanditswe na David Eugène Marshall
Kuya 11 Mutarama 2018 saa 07:37
Yasuwe :
0 0

Edward Ngoyai Lowassa yamenyekanye cyane muri politiki ya Tanzania no mu ishyaka rya Chama Cha Mapinduzi kuva mu 1977, anaba Minisitiri w’Intebe muri iki gihugu, kuva mu 2005 kugera mu 2008 ku butegetsi bwa Jakaya Mrisho Kikwete.

Uyu mugabo kandi unabarirwa mu baherwe bibitseho agatubutse mu iki gihugu, yaje kwegura ku mwanya wa Minisitiri w’Intebe, nyuma y’aho Komisiyo y’Inteko Ishinga Amategeko yari ikuriwe na Harrison Mwakyembe ivumburiye ko yagize uruhare muri ruswa yavuzwe mu mushinga wo kongera amashanyarazi muri Tanzania, wanaje guhomba.

Kompanyi y’Abanyamerika, Richmond Development Company, yagombaga kujyana muri Tanzania imashini za rutura zitanga amashanyarazi, zari gutanga Megawatt 100 ku munsi mu Kigo TANESCO gishinzwe iby’amashanyarazi, kubera izuba ryatumye ingomero zitanga amashanyarazi zikama, umuriro ukabura mu gihugu.

Julius Nyerere yabwiye Lowassa ko atashobora kuba Perezida

Nubwo Lowassa yagiye agira imyanya myiza muri Leta ya Tanzania ariko, nkaho yagiye ayobora za Minisiteri zitandukanye n’Ibigo bya Leta bitari bike, ntibyabujije ko mu mwaka wa 1995, Edward Lowassa yagerageje bwa mbere guhatanira kwiyamamaza ku mwanya w’uzahagararira ishyaka rya CCM mu matora ya Perezida wa Repubulika, ariko Julius Nyerere wari mu kiruhuko cy’izabukuru, ategeka ko Lowassa akuramo kandidatire ye agasimburwa na William Mkapa, wanaje gutsinda amatora, ngo ku mpamvu z’uko Lowassa aho kwita ku cyazamura abaturage ba Tanzania, yahisemo kwibera umuherwe ibya politiki akabitera umugongo.

Mu 2005 Lowassa yashyigikiye bikomeye umukandida wa CCM, Jakaya Kikwete bari inshuti z’akadasohoka ashyira n’imbaraga mu kumwamamaza bituma atsinda ayo matora.

Mu 2015 Lowassa yongeye kwiyamamaza mu ishyaka CCM ngo azarihagarire mu matora ya Perezida, iri shyaka ryibuka ibyo Nyerere yamuvuzeho byazaga bisanga cya kibazo cya ruswa bituma ku wa 11 Nyakanga muri uwo mwaka, Komite ya CCM imuhagarika mu bagombaga kwiyamamaza kuri uwo mwanya muri iryo shyaka, maze rihitamo John Pombe Magufuli, ubu uyoboye Tanzania.

Lowassa abonye mu ishyaka CCM byanze…

Muri Kanama 2015, hatarashira n’ukwezi kumwe Lowassa abujijwe guhatanira kwiyamamaza ku mwanya wa Perezida muri CCM, uyu mugabo yahise yisunga Ishyaka rya CHADEMA ritavuga rumwe n’ubutegetsi ryisunze ayandi mu ihuriro UKAWA[ Umoja wa Katiba wa Wananchi], amuhitamo nk’uzahangana na Magufuli, mu matora yabaye ku wa 25 Ukwakira 2015, maze Magufuli na CCM bahigika Lowassa na UKAWA ku majwi 59.46% na 39.97 % ya Lowassa.

Kuva ubwo Lowassa ntiyongeye kugaruka cyane mu itangazamakuru, uretse muri iki gihe bigaragariye ko yasuye Perezida Magufuli mu Biro bye muri Dar-es-salaam, nkuko tubikesha ikinyamakuru Mwananchi.

Ni ibintu byatumye abantu bibaza niba Lowassa ataba ashaka kongera kwisunga ishyaka CCM Magufuli abereye umuyobozi, cyangwa niba nta mwanya w’ubutegetsi yaba yari agiye gusezeranywa, cyane ko uru rugendo yarugize nka Lowassa we bwite, atagiye nk’uri mu butumwa bw’ishyaka CHADEMA abereye umuboyoke.

Ishyaka rya Lowassa ryanenze cyane ukuntu yagiye muri Perezidansi agashima ibyo Magufuli amaze kugeraho, nibura ntanibuke kubaza ku kibazo cy’Abanyapolitiki bakomeje guhohoterwa, harimo n’uwitwa Tundu Lussu uherutse kuraswa n’abantu batamenyekanye, uyu Tundu akaba yari yaranigeze kwita Lowasa ko ari “Tembo wa siasa za Tanzania”, bishatse kuvuga ko Lowassa ari nk’inzovu y’ibigango muri politiki ya Tanzania, ko ngo n’iyo wafunga amaso utabura kumva imirindi ye muri politiki ya Tanzania, uko byagenda kose.

Tundu Lussu urwariye mu Bubiligi yaneguye Lowassa ku kuntu umunsi umwe mbere y’uko ajya muri Perezidansi, yari kumwe n’umukuru w’ishyaka rya CHADEMA mu kazi gasanzwe, ariko agakora uruzinduko nka ruriya bukeye bwaho atamumenyesheje nk’aho atari abizi.

Salim Mwalimu uhagarariye ishyaka rya CHADEMA muri Zanzibar ariko we ntabona ibintu kimwe na Tundu Lussu, kuko avuga ko abantu bakwiye kureka kwihutira kunegura ko Lowassa yasuye Magufuli mu Biro, ahubwo bagategereza bakazumva ibyo Lowassa azatangaza, aho kwihutira kumuciraho iteka.

Gusa ibi ni ibintu bisa n’ibidasanzwe muri politiki yo mu Biyaga Bigari nko kuba Kiiza Besigye byakumvikana ko yasuye Museveni muri Perezidansi ya Uganda, cyangwa Raila Odinga akagenderera Uhuru Kenyatta mu Biro bye, ingero ni nyinshi umuntu yatanga muri Afurika, aho usanga abatavuga rumwe na leta, badakunze kwegera ubutegetsi ngo baganire ibibazo bitandukanye, ndetse babe banabushima aho bwakoze neza, banabunenge aho bitagenda, ngo banatange ibitekerezo by’uko ibintu byarushaho kugenda neza kurushaho.

Edward Ngoyai Lowassa na Perezida Magufuli bagiranye ibiganiro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza