Imyaka 17 irashize dosiye y’urupfu rwa Laurent Désiré Kabila ikirimo amayobera

Yanditswe na David Eugène Marshall
Kuya 1 Gashyantare 2018 saa 10:05
Yasuwe :
0 0

Imyaka 15 irashize abakekwa kwivugana uwahoze ari Perezida wa Repubulika Iharanira Demokarasi ya Congo (RDC), Laurent Désiré Kabila baburanishijwe ndetse barakatirwa gusa urupfu rwe ruracyakomeje kwibazwaho byinshi.

Laurent Kabila wabaye Perezida wa gatatu wa RDC yagiye ku butegetsi ku wa 17 Gicurasi 1997. Uyu mugabo wavukiye mu Mujyi wa Moba ku ya 27 Ugushyingo 1939 yishwe arashwe n’abamurindaga ku ya 16 Mutarama 2001.

Radiyo Mpuzamahanga y’Abafaransa (RFI) itangaza ko abantu 30 baburanye muri dosiye y’urupfu rwa Laurent Kabila bagahamwa n’icyaha, bakatiwe igihano cy’urupfu, ariko bakaba bafungiye muri Gereza Nkuru ya Makala iri mu Mujyi wa Kinshasa.

Umwe mu bahamijwe icyaha ni Colonel Eddy Kapend, warindaga umutekano wa Perezida Kabila wari hafi aho ubwo yicwaga.

Caporal Rashid Kasereka wirasiye Kabila ntari muri aba bafunzwe, kuko hari amakuru yandi avuga ko bidateye kabiri yarashwe akitaba Imana.

Uru rubanza rwaburanishijwe n’Urukiko rwa Gisirikare mu 2003 rwaje gusabirwa gusubirwamo n’abataranyuzwe n’imikirize yarwo, nk’uko byemezwa na Me Roger Cishugi, wanabwiye RFI ko uko byagenda kose ruzasubirwamo kugeza aho abishe Kabila nyabyo bazagezwa imbere y’ubutabera.

Mu 2013, Komisiyo ya Afurika ishinzwe Uburenganzira bwa muntu yategetse Leta ya Congo Kinshasa kurekura abafunzwe muri iyo dosiye bose nk’uko abababuranira babisabye.

Minisitiri w’Ubutabera muri Repubulika Iharanira Demokarasi ya Congo, Alexis Thambwe Mwamba yahakanye ubu busabe agira ati ‘‘Twabyizeho dusanga abantu bahitanye umukuru w’igihugu batashyirwa mu cyiciro cy’abahabwa imbabazi […] kandi nzi neza ko abo bafungiye muri Gereza ya Makala bari mu bahamwe n’icyaha cyo kwica Laurent Désiré Kabila.’’

Igikumwe cy’umurambo wa Laurent Kabila ngo cyari gihishe byinshi

Amakuru ashidikanywaho avuga ko Joseph Kabila, umuhungu wa Laurent Kabila hamwe na nyina Sifa Mahanya, bashobora kuba baragize uruhare mu kumuhitana.

Ibi bishingira ku kuba mu gihe yaraswaga, Joseph Kabila wari Umugaba w’Ingabo za Congo zirwanira ku butaka yari yaraye abujije se kwitabira inama y’ibihugu by’Afurika n’u Bufaransa yari iteraniye i Yaoundé muri Cameroun.

Joseph Kabila kandi ngo yategetse ko ingabo zose ziri muri Kinshasa zamburwa imbunda zigasigara imbokoboko, kimwe n’uko ijyanwa rya Laurent Kabila kuvurirwa muri Zimbabwe igitaraganya ngo ryaba ryari ikinamico.

Abari hafi y’ubutegetsi bavuga ko Kabila yari yapfuye rugikubita, ariko umuryango we ukemeza ko umurambo we ujyanwa i Harare ku busabe bwa Robert Mugabe wayoboraga Zimbabwe kugira ngo igikumwe cye cyifashishwe mu gufungura umutamenwa warimo zahabu n’ubundi butunzi bwa Kabila wafungwaga ukanafunguzwa igikumwe cye. Ibi rero ngo bikaba bitari gushoboka mu gihe umurambo wa Laurent Kabila wari kumara igihe bitarakorwa.

Laurent Désiré Kabila yasimbuwe ku butegetsi n'umuhungu we Joseph Kabila
Laurent Désiré Kabila yishwe arashwe n'abamurindaga
Imyaka 17 irashize dosiye y’urupfu rwa Laurent Désiré Kabila ikirimo amayobera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza