Incamake y’Ijambo rikomeye Visi Perezida wa Amerika yashimagijemo Israel akaburira Iran

Yanditswe na David Eugène Marshall
Kuya 25 Mutarama 2018 saa 12:24
Yasuwe :
0 0

Guhera ku wa Gatanu w’icyumweru gishize, Visi Perezida wa Leta Zunze Ubumwe za Amerika, Mike Pince, ari mu rugendo rw’akazi mu karere k’Uburasirazuba bwo Hagati, aho agirana ibiganiro n’abategetsi b’ibihugu bya Misiri, Yorudaniya na Israel.

Nk’uko byari kuri gahunda y’uru rugendo, Mike Pince ku wa Mbere w’iki cyumweru yagejeje ijambo imbere y’Inteko Ishinga Amategeko ya Israel [ Knesset ], hamwe na guverinoma y’icyo gihugu.

Ni ijambo ryarimo imvugo zikakaye ku ngamba zirebana n’umubano wa Amerika na Israel, ryakunze kurogowa n’abadepite bo mu ruhande rw’abarabu, aho inzego zishinzwe umutekano zari zifite akazi katoroshye ko gusohora hanze abashakaga guteza akaduruvayo.

Mu minota 34, Pince yahamirije Inteko ko mu myaka 70 ishize Amerika na Israel bitangije umubano, abandi baperezida bagiye baruma bahuha ku kibazo cya Yeruzalemu ariko ko Trump we ashaka kukirangiza burundu.

Yagize ati “Twahisemo guhagarara mu ruhande rwumva ibintu kimwe na Israel kuko twizera ko ukuri kunesha ikinyoma, ikiza kikanesha ikibi, kandi ukwishyira ukizana kukanesha guhora abantu bahembera urwango”.

Pince yashimagije uburyo Abaheburayo batigeze batakaza icyizere bari bafitiye ibyandiswe muri Bibiliya, bakemera kuyoborwa nayo kandi bakayumvira, bikaba byaranabafashije kudatakaza indangagaciro zabo mu myaka 2000 bamaze basembera mu isi, imyaka Pince avuga ko ari bwo buhunzi bwabayeho igihe kinini mu mateka y’Isi.

Yongeye gushimangira ko gukomera kwa Israel ari igisubizo cy’abibazaga uhereye kera kose ku kuntu igihugu cyasenyutse gishobora kongera kubaho no kwiyubaka, ko ariko byashobotse mu myaka 70 Israel imaze ibonye ubwigenge.

Kuri aya magambo ni naho Pince yagaye igihugu cye cya Amerika kuba cyarafashe iya mbere mu kwemera Israel nka Leta yigenga mu 1948, ariko abaperezida bategetse bose bakirengagiza ko nta leta itagira umurwa mukuru, kugeza umwaka ushize ubwo Trump yatangazaga ko Yeruzalemu ari Umurwa Mukuru wa Israel.

Mike Pince yagize icyo avuga ku Mujyi wa Yeruzalemu

Yagize ati “Ihuriro n’isano ry’abayahudi n’uyu mujyi bimaze imyaka isaga 3000. Muri Yeruzalemu niho hari umusozi wa Moriah Abraham yatambiyeho umwana we Isaka, mu rwego rw’icyizere yari afitiye Imana ye, Yeruzalemu kandi ni ho Umwami Dawidi yatangaje ko ari Umurwa wa Israel.”

“Bityo kubera iyo mpamvu Minisiteri y’Ububanyi n’Amahanga yacu yatangiye imyiteguro yo kwimura Ambasade yacu iri Tel-Aviv ikaza hano muri Yeruzalemu, kandi igomba kuba yafunguye imiryango bitarenze umwaka utaha”.

Gusa Mike Pince yatangarije iyo Nteko ko ibyo bidakuraho ukubahirizwa kw’amategeko asanzweho agenga ahantu hatagatifu Israel ihuriyeho na Palestine, ko kandi Amerika idashyira ku ruhande igitekerezo cyo kubaho kwa Leta ebyiri zubahana kandi kandi zibana mu mahoro, gusa ngo bizaturuka kuko ibihugu byombi birebwa n’icyo cyemezo bizaba byabyumvikanyeho.

Mike Pince yabwiye Abisiraheli ko badakeneye abarimu bo kubigisha iby’amahoro

Pince yavuze ko abona Israel idakeneye abarimu bayigisha ku kiguzi n’agaciro byo guharanira amahoro, ko iyo biba ibyo, Minisitiri w’Intebe Netanyahu atari kubura murumuna we Colonel Yonathan, watakarije ubuzima bwe mu gitero Ingabo za Israel zagabye ku kibuga cy’indege cya Entebbe muri Uganda, zigiye kubohoza abaturage bazo bari barafashwe bugwate n’ibyihebe by’abarabu mu myaka 44 ishize, yongeraho ko Abayahudi aribo bazi neza akamaro ko guharanira amahoro ku gihugu cyabo no ku rubyaro rwabo rwa none n’ejo hazaza.

Pince yasezeranyije Israel ko Amerika itazigera na rimwe ijenjekera abashaka guhungabanya umutekano wayo, anaboneraho gushimira Perezida wa Misiri Al-Sissi hamwe n’Umwami Abdullah wa Yorudaniya, kuba baranze kwijandika mu guhembera amakimbirane yahoraga abibwa n’abategetsi b’ibyo bihugu mu bihe bya kera.

Mike Pince yongeye kwikoma bikomeye igihugu cya Iran

Pince yanakomoje ku gihugu cya Iran kidacana uwaka na Israel ndetse na Amerika, aho yavuze ko Amerika izakomeza guhangana n’icyo gihugu ngo kigize umuterankunga w’ibyihebe, kandi Iran yahisemo nabi mu gushaka kwigira igihangange mu bihugu by’abarabu.

Yashimangiye ko Amerika itazagwa mu mutego wasize utezwe na Obama, ngo mu gihe Iran yakwitwaza ibyo gukomeza gucura intwaro za kirimbuzi, Amerika ntizayemerera.

Icyakora Pince yasezeranyije abanya-Iran ko igihe kizagera bakabohorwa ingoma y’igitugu n’iterabwoba, bakongera kuba inshuti nziza ya Amerika.

Visi Perezida wa Leta Zunze Ubumwe za Amerika, Mike Pince

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza