Kwamamaza

AMUR: Bamwe mu bashehi bishinganishije kubera ijambo rya Mufti


Hashize iminsi muri Islam mu muryango wa AMUR bamwe mu bamenyi b’idini ya Islam bashaka ko hari byinshi byahinduka mu mategeko abagenga. Izo mpinduka bifuza zatumye muri AMUR havukamo impande zitarebana neza, bamwe barirukanwa, abandi barahezwa. Ayo makimbirane yatumye hashyirwaho itsinda riyobowe n’ikigo cy’igihugu cy’imiyoborere ngo hashakwe umuti wayo. Kugeza magingo aya muri iryo shyirahamwe ruracyageretse n’intambara y’amagambo.

Ku itariki ya 11 Kamena 2013, abashehi (Sheikh) baharanira impinduka mu miyoborere mu muryango w’Abayisilamu mu Rwanda (AMUR), bandikiye Minisitiri w’Ubutegetsi bw’igihugu, bamusaba ko yabafasha hakabaho ubuhuza budafite aho bubogamiye ariko bongeraho ko banishingana.

Muri iyo baruwa ndende, bamenyesheje Minisitiri w’Ubutegetsi bw’Igihugu ko Mufti w’u Rwanda akomeje kubangamira inzira yo kubaka ubumwe n’ubwiyunge mu bayisilamu. Bagira bati “Ahubwo akaba arimo gushishikariza abayisilamu urwango n’ubugizi bwa nabi, kugeza ubwo yemeje ko abashehi baharanira impinduka mu miyoborere ya AMUR bakwiye gucibwa imitwe.”

Iryo jambo rikubiye mu mbwirwaruhame yagejejwe ku bayobozi b’inzego zose za AMUR mu ntara y’Iburasirazuba mu mwiherero wabahurije i Kiramuruzi, mu karere ka Gatsibo ku wa 7 Kamena 2013. Hari aho Mufti agira ati “…. Mu basilamu harimo abantu bakunda ubuyobozi bibwira ko ari bo kamara, ku buryo atekereza ko atayoboye iyi dini itabaho. Ariko nagira ngo mbabwire ko iyi dini ari idini y’Imana, nta na kamara uyirimo. Intumwa y’Imana yarapfuye ubusilamu burakomeza, (….) upfuye wowe abayisilamu bakagira amahoro, ntacyaruta ko abayisilamu bagira amahoro. …. Nta muntu uhatanira ubuyobozi, iyo ubuhataniye, bibaye ngombwa n’agatuza barakamena.”

Iryo jambo ni ryo Abashehi bagendeyeho bavuga ko ryabakuye umutima, babimenyesha Minisitiri w’Ubutegetsi bw’igihugu ko bishinganye mu nzego z’umutekano zose z’igihugu. Basaba ko Minisitiri yabatabara ayo makimbirane arangwa muri AMUR agashira mbere y’uko igisibo cy’ukwezi kwa Ramadhani gitangira, kuko biteganijwe ko kizatangira ku wa 9 Nyakanga 2013.

Sheikh Bizimana Issa mu kiganiro na IGIHE, yadutangarije ko batewe impungenge n’ijambo Mufti Gahutu yavugiye mu mwiherero i Kiramuruzi, bituma bandikira ubuyobozi bishingana kuko hari ababyuririraho bakagira abo bagirira nabi. Yagize ati “Ririya jambo ryadukuye umutima. Twe nta ntwaro dufite, ahubwo turagaragaza ahari amakosa mu muryango w’abayisilamu mu Rwanda, agomba gukosorwa. Kuba dushaka impinduka rero ntituri abanzi nk’uko we abyigisha. Akwiye kumva ko ibitagenda byakosoka akareka imvugo ziteranya abantu.”

Sheikh Bizimana akomeza avuga ko u Rwanda rufite ubuyobozi bwiza kandi inzego z’umutekano na zo zubatse, ku buryo bafite icyizere ko ubwo babibamenyesheje na bo bazabikurikirana.

Sheikh Murangwa Jamiru na we mu kiganiro twagiranye yadutangarije ko batunguwe n’imvugo ya Mufti, kuko amagambo yakoresheje abwira abari mu mwiherero wo ku wa 7 Kamena i Kiramuruzi, adakwiye umuyobozi. Agira ati “Igihugu cyacu cyigisha Ubumwe n’Ubwiyunge; twatunguwe rero no kumva imvugo ya Mufti, umuntu w’umuyobozi mukuru, akangurira abantu ko abo batavuga rumwe bagombye gucibwa imitwe. Iyo si imvugo ikwiye gukoreshwa mu gihugu cyacu. Twe ntiturwanya ubuyobozi, ariko dushyigikiye ko habaho impinduka mu muryango w’Abayisilamu mu Rwanda. Ibyavuzwe na Mufti aba ari itegeko, dufite impungenge ku myumvire ya bamwe mu bumvise ririya jambo, bashobora kuzagirira nabi abatunzwe agatoki.”

Akomeza agira ati “Abayisilamu ntibakwiye gukomeza kumva ubutumwa bubakangurira kugirira nabi bagenzi babo. Tubona ko Mufti adafite ubushake bwo gukemura ibibazo biri muri AMUR. Twe turashaka ko habaho ibiganiro, ibibazo byose bigashakirwa umuti, Abayisilamu ntibakomeze kumva amakimbirane mu ba Sheikh.”

Mufti Gahutu Abdul Karim, mu kiganiro na IGIHE yadutangarije ko abo bavuga ko akangurira abayisilamu kubagirira nabi atazi aho babikura. Agira ati “Abo bavuga batyo ni bo bakwiye kubibazwa, bagasobanura aho babikuye. Mu masomo nize yose, n’aho nigishije ntaho nigeze nkangurira abantu kugirira nabi abandi. N’ubwo abantu baba batavuga rumwe, ntibivuze ko baba abanzi.”

Ku birebana n’uko Mufti Gahutu yaba atinza ibiganiro byatuma hashakwa umuti w’ikibazo cy’ubwumvikane buke muri AMUR, yadutangarije ko ibyo bavuga nta shingiro bifite. Agira ati “Abashehi bavuga ko naba ndindiza ibiganiro, baba birengagije ko hari abo twamaze guhura. Ikindi kandi nababwira ni uko buri kintu kiba gifite impamvu yacyo. Turateganya guhura vuba, tugashakira hamwe umuti w’ikibazo. Ntitwifuza ko ukwezi kw’igisibo cya Ramadhani kwatangira ibyo bibazo bitarakemuka.”

Mufti Gahutu Abdul Karim yizeza amayisilamu ko ibibazo bumva mu minsi mike bizaba byakemutse kuko hari ibiganiro biteganijwe vuba aha, kandi yizera ko bizatanga umuti.

Gusaba ubuhuza budafite aho bubogamiye byanditse mu ibaruwa Abashehi bahagarariye abandi bandikiye Minisitiri w’Ubutegetsi bw’igihugu, ngo bushingiye ku kuba n’ubwo bifuza impinduka mu miyoborere, batifuza ko Umuryango w’Abayisilamu mu Rwanda wasenyuka, ahubwo hahindurwa ibijyanye n’imiyoborere, binyuze mu nzira z’ibiganiro. Bavuga ko ibyo bishingiye ku buremere bw’ibibazo bikomeje kugaragara mu miyoborere y’Umuryango w’abayisilamu mu Rwanda.

Ibibazo byo muri AMUR bimaze igihe byarabaye agatereranzamba, byageze igihe Ikigo cy’Igihugu gishinzwe imiyoborere gitabara cyoherezayo Komisiyo yo gucukumbura ibyo bibazo. N’ubwo iyo Komisiyo hari ibyo yakozwe yamaganiwe kure n’abavugwa muri ibyo bibazo ngo batigeze babazwa, bakavuga ko yabogamye cyane, ahubwo basaba ko hashyirwaho indi itagira aho ibogamiye. Nyuma y’aho abwo hari hategerejwe umwiharero w’Abasheshi wagombaga kubera kuri Muhazi ariko ukaza gusubikwa Abashehi bari bawitabiriye basohoye inyandiko igaragaza ko batishimiye isubikwa ryawo, ko bikomeza kudindiza inzira y’ubumwe n’ubwiyunge muri AMUR.

Soma inkuru bifitanye isano



-------------------------------
Yanditswe kuya 21-06-2013 - saa 11:00' na Mugabo P.
IBITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!