Kwamamaza

Bisaba ibihumbi 20 Frw ngo Eric Sultan aguhanurire mwiherereye

Yanditswe kuya 11-11-2016 saa 15:27' na Umutoni Rosine


Umushumba w’Itorero ‘Zeal of the Gospel Church’ rikorera mu Karere ka Nyarugenge, aca amafaranga abamugana bashaka ko abahanurira.

Umuhanuzi Sultan Eric, akaba n’umuyobozi w’Itorero Zeal of the Gospel Church rikorera i Nyamirambo kuri ‘Cosmos’, yasohoye itangazo ririho n’ibiciro ku bifuza ko abasengera by’umwihariko.

Iryo tangazo rigira riti “Ushaka kumenya icyo Imana ivuga ku buzima bwawe, ejo hazaza hawe, urashaka gukira indwara, ntucikwe n’umugisha wo kwibonanira n’umuhanuzi w’Imana muri mwenyine muri gahunda nshya ya ‘Zeal of the Gospel Church’. Abashyitsi ni ibihumbi 20, na ho abasangwa ni ibihumbi 10 by’amanyarwanda. Kwakirwa ni buri munsi. Ijambo rivuye ku Mana ryahindura ubuzima bwawe.’’

Mu kiganiro yagiranye na IGIHE, uyu muhanuzi yavuze ko gusaba abantu amafaranga atari ‘business’ ahubwo abantu benshi ngo baziko ibintu by’Imana ari ubuntu.

Ati “Tugira amateraniro ya buri munsi kandi tuba duhanura, tuba dusengera abarwayi, kandi ntabwo twishyuza. Hanyuma rero hari abantu badakunda ko babahanurira muri rusange, badakunda ko ibyabo byumvwa n’abandi bantu, ibye akaba ashaka ko wabimubwira wenyine agahanurirwa wenyine […].”

Akomeza ashimangira ko ikigamijwe atari amafaranga y’abashaka guhanurirwa no gusengerwa.

Ati “Twanze ko biba akavuyo k’abantu baza bavuga ngo barashaka kubonana n’umushumba bonyine, dusa n’abashyiraho amabwiriza dushaka kugabanya umubare w’abantu, icyo dekeneye si amafaranga yabo kandi ntibivuze ko umuntu ufite ikibazo kigaragara ashaka kubonana na pasiteri twavuga ngo zana amafaranga.”

“Abanyarwanda bazi ko ibintu by’Imana ari iby’ubuntu”

Umuhanuzi yakomeje avuga ko ibintu by’Imana bikwiye kubahwa. Ati “Ibintu by’Imana ubona abanyarwanda benshi batabyubaha baziko ari iby’ubuntu. Ikintu iyo wamaze kugifata gutyo nta n’icyo kikumarira[…]ibintu by’Imana nta gaciro babiha. Niba umuntu abona ko kuba bamusabye ibihumbi 10 cyangwa 20 ari ibintu bisazwe, biba bigaragaza ko atazigera agirirwa akamaro n’ibintu by’Imana cyane.”

Yakomeje gushyiraho amabwiriza atari inzaduka, ngo ahubwo n’abandi bahanuzi bo muri Bibiliya hari amabwiriza batangaga mbere yo guhanura.

Ati “Akenshi mbere y’uko wakira igitangaza cyawe, umuhanuzi ashobora kuguha amabwiriza yo gusuzuma ko wizeye. Hari nk’umugore Yezu yabwiye ngo nta biryo by’imbwa mfite mfite ibiryo by’abana, Elisa agiye gukiza Namani aramubwira ati jyenda witerere muri yorodani inshuro 7, Eliya yabwiye umupfakazi ati agafu usigaranye jyenda unsongeremo umutsima. Uwo muhanuzi aramutse aje mu Rwanda uno munsi ntabwo abanyarwanda bamwemera, bavuga ko ari ubusambo azanye ariko ayo ni amabanga y’umwuka abantu b’abanyamubiri batazi.”

Hari abahanuzi basambanya abagore

Sultan Eric, avuga ko bene aba ari abanyamubiri bayoborwa n’irari ry’imibiri yabo. Ati “Sinzi icyo nabivugaho ariko ubwo nyine abo barananiwe[…]mu buryo buciye mu mucyo si byiza ko ujyana n’abagore mu cyumba mwenyine.Twe icyo tugamije ni uko umuntu ahabwa ubutumwa bwe mu ibanga.”

Mu madini n’amatorero atandukanye, hajya humvikana abagore bavuga ko basambanyijwe n’abo bita abashumba (abapasiteri) bagiye babagana ngo babasengere cyangwa se babagire inama.

Ibi bikaba byaratahuwe na Komisiyo y’ Igihugu Ishinzwe Uburenganzira bwa Muntu ivuga ko ifite ibimenyetso byerekana ko mu byumba by’amasengesho hari benshi basambanywa n’abapasiteri.

Izindi nkuru wasoma: Batanze ubuhamya ko basambanyijwe n’abapasiteri mu byumba by’amasengesho

Kigali: Amateraniro yahindutse imirwano, Pasiteri ashinjwa gusambanya abayoboke


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved