Islam Mufti Salim yifuza mu Rwanda

Yanditswe na Emma-Marie Umurerwa
Kuya 10 Mutarama 2017 saa 11:20
Yasuwe :
0 0

Mufti w’u Rwanda, Sheikh Salim Hitimana, ntiyifuza kubona abayisilamu bakwitwaza idini ngo bagire uwo bahohotera ngo ni uko badahuje ukwemera mu Rwanda.

Ibyo Mufti anabyerekana, anavuga ko n’Intumwa y’Imana Muhamadi atigeze abana nabi n’abakirisitu, ndetse ko hari ubwo yanabagaragarizaga urukundo.

Hizihizwa isabukuru y’imyaka itanu ishize hashinzwe Itsinda ry’abasangirangendo rigizwe n’aba ‘Hadji’ n’aba ‘Hadjati’ bahuriye mu mutambagiro mutagatifu i Maka mu mwaka wa 2011, Mufti w’u Rwanda yahamagariye kwigira ku Ntumwa.

Yagize ati “Intumwa y’Imana igeze Madina yisanze iri mu muryango w’abantu benshi harimo abakirisitu n’Abayahudi. Iyo havukaga ikibazo ku muntu utari uwo mu idini ya Islam bakamuzana imbere y’Intumwa y’Imana yarabanzaga akamubaza ati ’uyoboka irihe dini? Iyo yasangaga uwo muntu ari umukirisitu yabasabaga kuzana umutambyi wabo kugira ngo uwo muntu abone ubutabera’.”

Uretse ibyo, Mufti w’u Rwanda anavuga ko mu mateka hariho igihe Abayisilamu bashakiye ubuhungiro ku bakirisitu.

Yagzie ati “Ubwo abayisilamu bagiraga ikibazo bagatotezwa bagatangira kubagirira nabi, Intumwa y’Imana yabasabye ko bahungira mu gihugu cya Ethiopia, kuko yari yaramenye amakuru ko hari umwami w’umukirisitu w’inyangamugayo. Abayisilamu baragiye bagezeyo babona ubutabera ndetse babona n’ubuhungiro bwujuje ibyangombwa.”

Mufti Salim anavuga ko hari n’igihe Intumwa y’Imana Muhamadi yagenderewe n’abakirisitu bagera kuri 200 ikabacumbikira mu musigiti w’ i Madina, bahamara ibyumweru bibiri, irabakira ibaha umwanya wo kwisanzura baganira ku iyobokamana.

Ku bw’ibyo, Mufti w’u Rwanda ati “Iyo ni yo Islam intumwa y’Imana yadusigiye yo kubana n’abandi neza, ariko Islam ishingiye ku kuvangura no gutoteza abantu no kubuza amahoro abandi iyi ngiyi twese hamwe tugomba guhaguruka tukayamagana.”

Ubutumwa bwa Mufti bwanagarutse mu gushishikariza Abayisilamu kwirinda inyigisho zose ziganisha ku butagondwa, kuko izo atari zo basigiwe n’Intumwa y’Imana. Ibi bikanavugwa mu gihe no mu Rwanda hagaragaye abari batangiye kujya muri izo nyigisho, bamwe bakekwa bakaba bari gukurikiranwa mu butrabera.

Mufti w’u Rwanda, Sheikh Salim Hitimana

[email protected]


Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza