Hari intambwe igomba guterwa kugira ngo Rugamba Cyprien agirwe umuhire –Musenyeri Mbonyintege

Yanditswe na

Patrick Munyentwari

Kuya 22 Kamena 2013 saa 09:57
Yasuwe :
0 0

Abakuru ba Kiliziya mu Rwanda bemeza ko kugirwa umuhire kwa Rugamba Cyprien, waranzwe n’ibikorwa bikomeye by’urukundo cyane mu Rwanda, bigisaba ubushake cyane cyane bw’abantu b’aho avuka kugira ngo inzira itangire.
Mu kiganiro na IGIHE Musenyeri Smalagde Mbonyintege Umushumba wa Diyoseze ya Kabgayi akaba Perezida n’Umuvugizi w’Inama y’Abepisikopi Gatolika mu Rwanda, yavuze ko kugirwa umuhire kwa Rugamba Cyprien waranzwe n’ubukirisitu bukomeye, bisaba ubushake bw’abantu bamuzi cyane cyane ab’aho (...)

Abakuru ba Kiliziya mu Rwanda bemeza ko kugirwa umuhire kwa Rugamba Cyprien, waranzwe n’ibikorwa bikomeye by’urukundo cyane mu Rwanda, bigisaba ubushake cyane cyane bw’abantu b’aho avuka kugira ngo inzira itangire.

Mu kiganiro na IGIHE Musenyeri Smalagde Mbonyintege Umushumba wa Diyoseze ya Kabgayi akaba Perezida n’Umuvugizi w’Inama y’Abepisikopi Gatolika mu Rwanda, yavuze ko kugirwa umuhire kwa Rugamba Cyprien waranzwe n’ubukirisitu bukomeye, bisaba ubushake bw’abantu bamuzi cyane cyane ab’aho yavukiye.

Musenyeri Mbonyintege agira ati “Nanjye Rugamba ndamuzi, ibikorwa bye byiza ndabizi, ariko burya kugirwa umuhire hari intambwe bigomba guheraho. Abakirisitu ubwabo ni bo bagomba kubanza kwandika, basaba ko uwo muntu koko yagirwa umuhire. Kugeza ubu iyi ntambwe ntiraterwa mu bakirisitu cyane cyane aho avuka. Ubundi Kiliziya ikabyigaho bigashyikirizwa i Roma kwa Papa, ibyo byose bigafata imyaka myinshi kugira ngo agirwe umuhire. Ubu rero navuga ko hakiri ikindi gihe.”

Musenyeri Mbonyintege akomeza avuga ko uretse Rugamba hari n’abandi, na bo bazwiho ibikorwa bikomeye muri Kiliziya, ndetse no mu Rwanda muri rusange; ariko ibyo byose bikagira uburyo bikorwamo. Uruhare rw’ibanze rukaba urw’abantu babazi cyane cyane ab’aho bavuka.

Rugamba yibukwa kuri byinshi

Ibikorwa by’urukundo byaranze Rugamba Cyprien, birimo kuba yarashinze Communaute ya Emmanuel, izwi nk’itsinda rihuriramo urubyiruko n’abakuze bagasingiza Imana. We n’umufasha we bashinze ikigo gifasha imfubyi , giherereye mu Karere ka Kicukiro. Rugamba yahimbye indirimbo zigera kuri 250, zirimo izihimbaza Imana ndetse n’ubu ziracyakoreshwa muri Kiliziya Gatolika. Uko yagendaga amenya Imana, ni ko yakoraga n’ibikorwa biyinyura birimo kuba aho yari atuye yarahubatse Chapelle yasengeragamo n’umuryango we ndetse n’abamugendereraga.

Rugamba azwi nk’umuhanzi wakoreshaga ikinyarwanda cyimbitse, kuri ubu indirimbo nyinshi yahimbye zifatwa nk’ubuhanuzi, kuko ubutumwa bukubiyemo impanuro yatangaga mu gihe cye, usanga bubwira benshi no muri iki gihe, bityo bigakurizaho kuvugwa ko burya umuhanzi adapfa.

Uko Rugamba yaririmbaga idirimbo zihimbaza Imana, ni ko yakuraga mu kumenya Imana kuko na mbere y’uko atabaruka yaririmbye imwe mu ndirimbo imeze nk’iyamuhanuriraga yise “Nzataha Yeruzalemu Nshya” yaririmbye agiye gutabaruka.

Urukundo rwamuranze n’ibikorwa byiza Rugamba yakoze ni byo bishingirwaho ashyirwa mu majwi, mu bifurizwa kugirwa abahire, mu gihugu cy’u Rwanda.
Umva indirimbo "Nzataha Yeruzalemu nshya" ya Rugamba Cyprien

Rugamba Cyprien
Rugamba Cyprien n'umufasha we, Rugamba Daphlose

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza