Kwamamaza

Imihango ikorerwa umuyisilamu witabye Imana

Yanditswe kuya 27-10-2016 saa 09:05' na Thamimu Hakizimana


Mu myemerere y’amadini atandukanye, usanga bafata umunsi w’urupfu nk’udasanzwe ndetse benshi bakawutinya bitewe n’uko uba ari iherezo ry’ubuzima.

Uyu munsi kandi abakirisitu batandukanye bawufata nk’ukomeye mu minsi itatu y’ingenzi iranga imibereho ya muntu.

Kuvuka niwo munsi wa mbere ukomeye abantu bafata nk’udasanzwe ku buryo ahantu henshi usanga bakoresha ibirori bishimira ko bungutse umwana mu muryango wabo.

Uwa kabiri ni uwo gushyingirwa, na wo udasanzwe ku buzima bw’umuntu wese wagize ayo mahirwe yo gukoresha uwo muhango, ku buryo usanga na bamwe mu bihaye Imana nk’abapadiri nabo bemera ko umunsi bahereweho ubwo izo nshingano z’ubupadiri bawufata nk’uwa kabiri ukomeye mu buzima bwabo.

Urupfu rufatwa nk’umunsi wa gatatu ukomeye mu buzima bwa muntu kuko uhuruza abantu benshi ,hagatangwa amatangazo ku buryo hari n’imiryango ibanza igategereza abayo bari i mahanga kugira ngo bifatanye kuri uwo munsi.

Ku bifite, usanga bakora imihango y’akataraboneka bagasangira, inshuti zikifatanya n’umuryango wagize ibyago ziwugenera ubushobozi mu mafaranga; ibizwi nko kuyagira mu kinyarwanda.

Amwe mu madini usanga bashyingura umuntu wabo bamwambitse imyenda n’inkweto bihenze cyangwa rimwe na rimwe bakanamusegura imyenda ye yose kubera kuko baba bemera ko ariwo munsi wa gatatu ukomeye uranga ubuzima bwe.

Iyo myemerere itandukanye n’iy’idini ya Isilamu kubera ko nta muyisilamu n’umwe wemerewe gushyingurwa yambaye imyenda myiza cyangwa se imitako kuko Imana ivuga ko umuntu ashyingurwa nk’uko yavutse.

Umuyobozi ukomeye, umukire wo ku rwego rwo hejuru n’umuyisliamu usanzwe bashyingurwa kimwe kuko idini ya Isilamu yemera ko abantu bose bangana imbere y’Imana

Isilamu iteganya ko umuyoboke wayo wapfuye mbere yo gushyingurwa abanza akozwa n’isabuni zihumura ndetse nyuma akambikwa igitambaro cyera kimeze nk’ishuka bita mu Cyarabu Isanda.

Mu kiganiro IGIHE yagiranye n’Umuvugizi w’Umuryango w’Abayisilamu mu Rwanda ( RMC), Sheikh Sindayigaya Musa avuga ko impamvu umuyisilamu wapfuye yozwa hakoreshejwe isabuni zihumura ari ukugira ngo ataza kubangamira abajya kumushyingura bitewe n’uko umubiri w’umunu wapfuye wangirika vuba.

Yagize ati “ Impamvu yozwa ndetse akanasukurwa hakoresheje isabuni n’amavuta ahumura cyane ndetse n’imibavu ni ukugira ngo n’abajya kumushyingura atababangamira.”

Yakomeje avuga ko nta muyisilamu wemerewe gushyingurwa yambaye imyenda cyangwa se imitako ahubwo yemerewe gushyingurwa nk’uko yavutse ndetse akanemeza ko Isilamu ibifata nko gusesagura umutungo.

Yagize ati “ Ntabwo byemewe gushyingura umuntu yambaye imyenda cyangwa se ibintu bihenze nk’imitako ya zahabu n’ibindi kuko Isilamu ibifata nko gusesagura umutungo bitewe n’uko yemera ko umuntu iyo apfuye umutungo we wose uba utakiri uwe ahubwo uba ari uwabasigaye mu rugo bagomba kumuzungura.”

Isilamu yemera ko gupfa cyangwa urupfu ari igeno ry’Imana ndetse ko nta muntu n’umwe uri ku Isi utazapfa.

Sheikh Sindayigaya yemeza ko umuyisilamu witabye Imana akorerwa ibintu bine by’ingenzi gusa birimo kozwa, kwambikwa igitambaro cyera( Isanda), gusengerwa n’abavandimwe bamusezera ndetse no kumushyingura.

Kirazira nta muyisilamukazi ujya gushyingura

Sheikh Musa Sindayigaya avuga ko impamvu ya mbere ituma abayisilamukazi batemerwa kujya gushyingura ku irimbi ari uko Isilamu ifite ibintu biranga imyitwarire y’ugiye gushyingura.

Yagize ati “ Ntabwo babujijwe gushyingura kuko imihango yose ikorerwa umurambo barayikora barawuhagira iyo ari uw’umugore mugenzi wabo kuko barawusiga bakanawambika. Icyo batemerewe ni ukujya ku irimbi bitewe n’uko bagira umutima woroshye mu rwego rwo kwanga ko bahavugira amagambo mabi cyane cyane ko bitemewe gushyingura abantu bavuza induru bari kuboroga kuko gupfa ari igeno ry’Imana.”

Kuba abayisilamukazi babujijwe kujya gushyingura bitandukanye no kujya gusura inzibutso za Jenoside bitewe n’uko gusura ibintu biranga amateka y’igihugu bitabujijwe.

Gusa iyo umuntu amaze gushyingurwa mbere y’uko abamujyanye kumushyingura bava ku irimbi babanza bakamusengera bwa nyuma kugira ngo Imana izamworohereze imurinde umuriro utazima, izamuhe ijuru.

Ku bijyanye n’ikiriyo, idini ya Isilamu iteganya ko igihe umuryango w’umuntu witabye Imana umara gihe cy’akababaro ku muntu usanzwe ari iminsi itatu, gusa umugore wapfushije umugabo we Korowani itegeka ko agomba kumara amezi ane n’iminsi 10 ndetse muri icyo gihe akaba atemerewe kwirimbisha no gushyingirwa.

Umuvugizi w’Umuryango w’Abayisilamu mu Rwanda ( RMC), Sheikh Sindayigaya Musa asobanura ibijyanye n'imihango ikorerwa umuyisilamu witabye Imana
Aboza umurambo n'abawusiga bakoresha ibikoresho byabugenewe
Isabuni zabugenewe zikoreshwa boza umurambo
Igitanda bogerezaho umurambo
Igitanda cyabugenewe abayisilamu bashyiraho umurambo umaze kozwa kugira ngo wumuke
Imodoka itwara umurambo ku irimbi

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved