Musenyeri Rukamba yavuze ku busabe bwa Ntihinyurwa bwo guhagarika kuyobora Arikidiyosezi ya Kigali

Yanditswe na IGIHE
Kuya 29 Werurwe 2018 saa 11:43
Yasuwe :
0 0

Umushumba wa Diyosezi ya Butare, Musenyeri Rukamba Filipo, akaba n’Umuvugizi wa Kiliziya Gatolika mu Rwanda; yatangaje ko mugenzi we uyobora Arikidiyosezi ya Kigali ashobora kuba yarasabye guhagarika izi nshingano bitewe n’icyo amategeko ateganya.

Hashize iminsi bivugwa ko Musenyeri Thadée Ntihinyurwa yandikiye Papa Francis asaba guhagarika imirimo ye yo kuyobora Diyosezi akajya mu kiruhuko cy’izabukuru.

Musenyeri Ntihinyurwa yavukiye i Kibeho tariki ya 25 Nzeri 1942, ahiga amashuri abanza, akomereza mu iseminari nto ya Kabgayi ayirangiriza i Kansi. Iseminari nkuru yayize i Nyakibanda ahabwa ubusaseridoti kuwa 11 Nyakanga 1971.

Magingo aya, afite imyaka 76 y’amavuko ndetse umwaka ushize yizihije yubile y’imyaka 75 mu muhango wabereye kuri Stade Amahoro i Remera.

Mu kiganiro na IGIHE, Musenyeri Rukamba yavuze ko atazi neza niba Ntihinyurwa yarandikiye Papa amusaba guhagarika imirimo ariko ko agomba kuba yarabikoze kuko itegeko ariko ribiteganya.

Ati “Ni ibintu biba bigomba guhita bikorwa. Ubundi umusenyeri, kubera impamvu z’uburwayi cyangwa iyo ageze ku myaka 75 asaba ikiruhuko cy’izabukuru. Rero nawe imyaka 75 yarayigize, ndibuka ko twakoze yubile y’iyo myaka i Kigali.”

Rukamba yavuze ko Papa ariwe wemeza ko musenyeri runaka agiye mu kiruhuko cy’izabukuru akanagena n’umusimbura ku buyobozi bwa diyosezi.

Ati “Kwandika byo ndebye imyaka afite, agomba kuba yaranditse. Niyo bamubwira bati komeza ariko agomba kuba yaranditse. Kuri twebwe ni Papa ubyemera, kugeza igihe azaguhera ugusimbura. Ubwo rero ibindi ni ibye ku giti cye, yaba yaranditse, yaba yaremerewe, ni iby’umuntu ku giti cye.”

Twagerageje kuvugisha Musenyeri Ntihinyurwa ntibyadukundira kuko amaze iminsi atari mu Rwanda ndetse n’umunyamabanga we wihariye ntiyabashije kwitaba telefoni.

Umusenyeri ugiye mu kiruhuko cy’izabukuru aba afite uburenganzira bwo gukora indi mirimo yihitiyemo nko kuba yajya muri paruwasi agafasha abapadiri cyangwa se kuba yajya nko mu ishuri runaka akigisha.

Mu bandi basenyeri gatolika bo mu Rwanda, uri hafi kuzuza imyaka 75 ni Servilien Nzakamwita wa Byumba ufite 74 n’amezi icyenda na Smaragde Mbonyintege wa Kabgayi ufite imyaka 71.

Abandi bo bafite imyaka ikurikira: Antoine Kambanda wa Kibungo (59), Vincent Harolimana wa Ruhengeri (55), Célestin Hakizimana wa Gikongoro (54), Anaclet Mwumvaneza wa Nyundo ( 61) na Rukamba wa Butare (69).

Mu 2017 nibwo Umushumba wa Arikidiyosezi ya Kigali, Musenyeri Ntihinyurwa Thaddée yizihije yubile y'imyaka 75 amaze avutse

Inkuru bifitanye isano:

- Ibyo wamenya kuri Musenyeri Thadée Ntihinyurwa wizihiza isabukuru y’imyaka 75

- Musenyeri Ntihinyurwa wizihije yubile y’imyaka 75 yashimwe kuba umushumba n’umwarimu mwiza (Amafoto)


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza