Ruracyageretse, komisiyo yiyise “Nzahuratorero” ishaka ko abayobozi ba ADEPR bakurwaho

Yanditswe na Mathias Hitimana
Kuya 21 Mata 2017 saa 10:46
Yasuwe :
0 0

Mu itorero rya Pantekote mu Rwanda (ADEPR) harimo abakirisitu badashyigikiye imikorere y’ubuyobozi buriho, bibumbiye muri Komisiyo bise “Nzahuratorero” muri Mutarama 2017 bavuga ko igamije kwinjira mu mizi y’ibibazo birivugwamo nubwo itorero ryabamaganye.

Iyi komisiyo ijya kuvuka yasohoye itangazo ryanditse mu izina ry’abakirisitu ba ADEPR badashyigikiye ubuyobozi buriho, igaragaza ko mu itorero harimo ibibazo kandi ubuyobozi buriho butarangwa n’ubunyangamugayo.

Bimwe mu byavuzwe muri iryo tangazo bigaruka ku mwuka wagiye wumvikana mu itorero ujyanye n’‘akarengane gakorerwa abakirisitu bagatangishwa amafaranga mu bikorwa batagizemo uruhare mu gutegura’.

Mu bihe bishize ubwo iri torero ryubakaga Dove Hotel ku Gisozi mu Mujyi wa Kigali, humvikanaga ukwijujuta kw’abakirisitu ariko Umuvugizi waryo Bishop Jean Sibomana, agasobanura ko mu bakirisitu bagera muri miliyoni ebyiri, hataburamo abatabyishimira ariko ko nta gahato kabayeho mu gusabwa gutanga umusanzu wo kuyubaka.

Ibindi byagaragaye ni ugushinja ubuyobozi bwa ADEPR ko bwahinduye imyizerere y’itorero yahozeho, hashingiwe no ku kuba abayobozi baryo barazamuwe mu byubahiro bakagera ku rwego rwo kwitwa ‘Bishop’, ibibonwa nk’ibyakozwe ku nyugu z’abantu ku giti cyabo.

Uhagarariye iyi komisiyo yiyise ‘Nzahuratorero’, Dr Jean de Dieu Basabose, yitsa cyane ku kuvuga ko abayobozi bariho bakwiye kuvaho, ko ari ‘ubuyobozi butarangwa n’ubunyangamugayo’ akanabushinja ko budacunga neza umutungo w’itorero.

Ku rundi ruhande, Umuvugizi wa ADEPR, Bishop Jean Sibomana, aganira na IGIHE yagaragaje ko koko ikibazo cy’iyi komisiyo kitararangira ariko ko nta gaciro ibyo ivuga bifite.

Yagize ati “Bariya ni abantu tutazi, nta rwego bahagarariye mu itorero, twabibonye bandika batyo batukana, ntabwo ikibazo cyabo kirarangira. Bafite inzego bagannye beretse ikibazo cyabo. ”

Ku byerekeye imicungire y’umutungo, Bishop Sibomana ashimangira ko ucunzwe neza, kandi ko n’uburyo ucunzwemo uwabishaka wese yabibona. Uretse ibyo kuba we na Tom Rwagasana umwungirije barabaye ba Bishop, asobanura ko nta nka yaciwe amabere kuko no muri Bibiliya iryo zina rya ‘Musenyeri’ ribamo.

Anashimangira ko abakekaga ko kuba barabaye ba Bishop byaba ari inzira yo kuzaguma ku buyobozi bw’itorero ntaho bihuriye.

Anongeraho ko iyi komisiyo yiyise Nzahuratorero nta shingiro, akemeza ko nta buzahare buri mu itorero ngo habe hakenewe abarizahura.

Igiteye inkeke, umwuka wo kwikoma ubuyobozi bwa ADEPR wakwiriye mu bakirisitu, bamwe mu bamenyekanye ko bashyigikiye iyo komisiyo baganirizwa n’abashumba ba za Paruwasi basengeramo. Iki Bishop Sibomana agaragaza ko hari aho cyatanze umusaruro kuko abumviye bitandukanyije n’iyo komisiyo. Gusa komisiyo yo ikavuga ko abayishyigikiye batotezwa.

Dove Hotel ni umwe mu mishinga minini iheruka ya ADEPR yavugishije benshi

Leta yabihariye abanyamadini

Urwego rw’Igihugu rw’Imiyoborere (RGB) rushinzwe gukurikirana imikorere y’amatorero n’imiryango ishingiye ku idini, rwashyikirijwe ibyo bibazo na Komisiyo Nzahuratorero kugira ngo rufashe mu gushaka igisubizo kirambye.

Uhagarariye komisiyo Nzahuratorero, Dr Jean de Dieu Basabose yagize ati “Kuwa 15 Gashyantare 2017 twarahuye, tubagaragariza ibibazo bihari hanyuma batwizeza ko bagiye kubikurikirana.”

Nyuma y’iminsi irenga 40, kuwa 28 Werurwe 2017, ‘Nzahuratorero’ yongeye gusubira gukomanga kuri RGB, ibinyujije mu ibaruwa yibutsa ko ikeneye ko RGB ‘i fasha abakirisitu ba ADEPR gushyiraho ubuyobozi burangwa n’indangagaciro za gikirisitu zirimo ubwangamugayo no gufasha iri torero gushyiraho uburyo bwo gusesengura no gushakira hamwe umuti w’ibibazo biryugarije kandi ku buryo burambye’. Ibi byanamenyeshejwe Minisitiriri w’Intebe.

Nubwo uyu muyobozi wa “Nzahuratorero” yagaragaje ko bahanze amaso RGB, Umuyobozi muri iki kigo ushinzwe iby’amadini, Mutabazi Théodore, yavuze ko mu nshingano zabo bagiriye inama iyi komisiyo kwicarana n’inzego za ADEPR bakicocera ibibazo.

Yagize ati “Twabagiriye inama. Bagende barebe inzego zabo, kuko ntabwo abantu bakwiyita ‘komisiyo’ itari mu mategeko, twababwiye ko bafite amategeko abagenga, bagende bakurikize inzira ziteganyijwe na sitati zabo.”

Yakomeje agira ati “Ni ukureba ubuyobozi bwabo, niba butabakiriye hakaba hari ikimenyetso, itegeko riteganya ko utanyuzwe ajyana ikirego cye mu rukiko ni cyo amategeko ateganya.”

Hagati aho mbere yo kujya mu nkiko, Mutabazi asobanura ko habanza kwitabaza komisiyo ishinzwe gukemura amakimbirane mu itorero.

Iyi komisiyo ishinzwe gukemura amakimbirane, ‘Nzahuratorero’ ivuga ko yayandikiye igategereza ko yabahamagara ngo baganire amaso agahera mu kirere. Dr Basabose ati “Twarabandikiye ariko ntabwo bigeze baduha umwanya.”

Umuvugizi wa ADEPR we ati “Ntabwo bigeze badusanga ngo tuganire tubona inzandiko zabo zicaracara.” Abajijwe ku kuba komisiyo ishinzwe gukemura amakimbirane muri ADEPR yarandikiwe, ntisubize ngo bicarane na ‘Nzahuratorero’ bacoce ibibazo, yahise avuga ko niba batarahamagarwa ubwo iyo komisiyo izashyira ikabikora.

Nubwo ikibazo cyageze mu nzego zitandukanye, hari amakuru ko ubu iki kibazo cyageze mu Ihuriro ry’amatorero y’Abaporotesitanti mu Rwanda (CPR) ngo yige kuri ibyo bibazo bya Nzahuratorero na ADEPR izasohore raporo.

Hagati aho, Nzahuratorero yo ivuga ko yahagurutse ibyiyemeje, itazacika intege mu kugaragaza ibibazo ibona muri ADEPR no kwiga uko byakemuka.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza