Umurage n’ishusho Musenyeri Kambanda asigiye Diyosezi ya Kibungo

Yanditswe na Hakizimana Jean Paul
Kuya 26 Mutarama 2019 saa 12:58
Yasuwe :
0 0

Kuwa 3 Gicurasi 2013, byari ibirori kuri Kiliziya Gatolika yo mu Rwanda, by’umwihariko ku Bakristu ba Diyosezi ya Kibungo, ubwo Papa Francis, yatoreraga Musenyeri Kambanda Antoine, kubabera umushumba, asimbuye Musenyeri Kizito Bahujimihigo wari weguye.

Wari umurimo utoroshye kuko Diyosezi yari agiye kuyobora itagiraga Katederali ijyanye n’igihe ndetse ikaba yari ifite umwenda wa miliyari imwe na miliyoni 500 y’amafaranga y’u Rwanda, ibereyemo amabanki n’Ikigo cy’Igihugu cy’Imisoro n’Amahoro (RRA).

Ibi byose ntibyateye Musenyeri Kambanda ubwoba kuko mu myaka isaga itanu yari amaze ayobora Diyosezi ya Kibungo, yari amaze kuyigeza kuri byinshi yaba mu ikenurabushyo, ibikorwa by’iterambere n’ibindi azahora yibukirwaho n’intama yaragiye atarumanza.

Ni ibikorwa bidasanzwe kuri uyu Musenyeri uherutse gutorerwa kuyobora Arkidiyosezi ya Kigali ndetse akaba abura amasaha make ngo yicare ku ntebe y’ubushumba, asimbuye Musenyeri Thadée Ntihinyurwa, ugiye mu kiruhuko cy’izabukuru, mu muhango uzaba kuri iki cyumweru.

Mu kiganiro IGIHE yagiranye n’igisonga cya Musenyeri wa Diyosezi ya Kibungo, Incimatata Oreste, yavuze ko hari ibikorwa byinshi Musenyeri Kambanda, yakoze birimo no gushinga paruwasi nshya.

Yasanze Diyosezi ya Kibungo ifite Paruwasi 13 arazongera ubu hari izigera kuri 20, akaba yari afite intego yo kongeraho izindi ebyiri. Ikindi umubare w’abapadiri wariyongereye uva ku bapadiri 70 ugera kuri 90.

Yubatse ibikorwa remezo birimo Hotel St Joseph, ifite inyenyeri ebyiri iherereye mu Mujyi wa Kibungo, Katederari ya Kibungo yatashywe mu mpera za 2017 itwaye miliyoni 436 Frw, anubaka imwe mu nzu nziza zigaragara mu Mujyi wa Ngoma ikoreramo Caritas.

Musenyeri Kambanda yavuguruye Paruwasi ya Mukarange n’iya Kabarondo kuri ubu zikaba ari Kiliziya nziza zijyanye n’igihe tugezemo.

Padiri Incimatata asobanura Musenyeri Kambanda nk’umuntu udasanzwe kandi wakoreye Diyosezi ya Kibungo, ibidasanzwe.

Ati “Yaraje yubaka umuryango w’abakristu abashyira hamwe, arabasura abagira umwe ku buryo ahavuye umuryango w’abakristu ufite imbaraga nyinshi”.

Akomeza avuga ko ari umuntu ukunda gukora kuko yafashije iyi diyosezi gushaka uko yivana mu mwenda uremereye yari ifite.

Ati “Ku kijyanye n’umwenda twari dufite Musenyeri Kambanda yakozeho byinshi, yarabanje ashyira abakristu hamwe abumvisha ko bagomba kugira uruhare mu kwitanga barabikora ku buryo agiye amaze kuwukoraho nka 70%.”

Umurage ku bandi

Padiri Incimatata yakomeje avuga ko ibyo abandi bapadiri bakwigira kuri Musenyeri Kambanda ari byinshi, cyane cyane kugira ukwemera no gusenga cyane.

Ati “Ibyo bamwigiraho ni byinshi cyane, icya mbere ni umuntu wubahiriza gahunda, agira ukwemera kandi agasenga cyane, ni umuntu ukunda kwegera abo ashinzwe bose rimwe na rimwe iyo hari nk’umupadiri wagiraga ibyago yamukomezaga, akamuba hafi ku buryo ikibazo cyose yagifataga nk’icye.”

Avuga ko icyo bifuza kuwuzamusimbura ari uko yaza aje gukomereza aho yarageze, akabana neza n’abantu, akagaragaza kwitanga no kujya inama n’abo bafatanya umurimo w’Imana.

Diyosezi ya Kibungo igizwe n’Akarere kose ka Ngoma, Akarere ka Kirehe, Akarere ka Kayonza, igice kinini cy’Akarere ka Rwamagana n’agace gato k’Akarere ka Gatsibo, ikaba ifite icyicaro cyayo mu Karere ka Ngoma.

Biteganyijwe ko kuri iki cyumweru tariki 27 Mutarama 2019, ari bwo Musenyeri Kambanda azicazwa ku ntebe y’ubushumba mu muhango uzabera kuri Stade Amahoro i Remera, ukabimburirwa n’igitambo cya Misa kizatangira Saa tanu.

Ibyo wamenya kuri Musenyeri Kambanda

Musenyeri Antoine Kambanda yavutse ku itariki ya 10 Ugushyingo 1958, avukira muri Arikidiyosezi ya Kigali, afite imyaka 61.

Amashuri abanza yayigiye i Burundi no muri Uganda, amashuri makuru nyuma y’imyaka mike yagiye kuyakomereza muri Kenya. Yarangije amasomo ya Tewolojiya mu iseminari nkuru ya Nyakibanda muri Diyosezi ya Butare.

Tariki ya 8 Nzeri 1990, yahawe ubupadiri na Mutagatifu Papa Yohani Pawulo II i Mbare muri Diyosezi ya Kabgayi, igihe yari mu rugendo rwa Gishumba mu Rwanda.

Agihabwa ubusaserdoti, Musenyeri Kambanda yatangiriye ubutumwa bwe nk’umwarimu akaba n’ushinzwe amasomo mu iseminari Nto ya Ndera i Kigali.

Kuva mu 1993 kugeza mu 1999 yagiye gukomereza amasomo muri Kaminuza i Roma, ahakura impamyabushobozi ihanitse muri Tewolojiya Morale.

Kuva mu 1999 kugera mu 2005 yabaye umuyobozi wa CARITAS ya Arkidiyosezi ya Kigali, aba n’umuyobozi wa Komisiyo y’Ubutabera n’amahoro muri Arkidiyosezi ya Kigali.

Yabifatanyaga no kwigisha mu iseminari Nkuru ya Nyakibanda, akaba n’umuyobozi wa Roho mu iseminari Nkuru ya Rutongo.

Kuva 2005 kugeza 2006 yabaye umuyobozi wa seminari Nkuru ya Kabgayi, mu 2006 kugera 2013 yagizwe umuyobozi wa Seminari Nkuru ya Nyakibanda.

Ku itariki ya 3 Gicurasi 2013 nibwo Nyirubutungane Papa Fransisko yamutoreye kuba umushumba wa Diyosezi ya Kibungo, tariki 20 Nyakanga 2013 nibwo yahawe inkoni ya Gishumba.

Intego ye ni “Ut vitam habeant” bivuze ngo ‘Bagire ubuzima’

Musenyeri Kambanda ntazibagirana muri Diyosezi ya Kibungo kubera ibyiza byinshi yari amaze kuyigezaho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza