Umuyobozi w’Abangilikani ku Isi yasuye u Rwanda atangiza ubukerarugendo nyobokamana i Gahini (Amafoto)

Yanditswe na Rabbi Malo Umucunguzi
Kuya 19 Gashyantare 2017 saa 05:22
Yasuwe :
0 0

Umuyobozi w’Itorero ry’Abangilikani ku Isi, akaba na Archbishop wa Diyosezi ya Canterbury mu Bwongereza, Justin Portal Welby, yasuye u Rwanda anatangiza ku mugaragaro ibikorwa by’ingendo nyobokamana i Gahini, mu Karere ka Kayonza, ahari amateka akomeye mu bijyanye n’ububyutse.

Ugeze i Gahini bakubwira amateka anyuranye ajyanye n’imyemerere arimo ‘Urukuta rw’Ibitangaza’, Inzu y’ubumwe, ‘Aho gutera igikumwe ushimangira ko utazava kuri Yesu’ n’amateka y’ububyutse bwakwiriye muri Afurika y’u Burasirazuba yose.

Archbishop Welby yashimye uburyo Gahini iri gutezwa imbere mu nzego zose haba Cathedral iri kuhubakwa, ikigo ngororamuco, ibitaro, amashuri, n’iteramabere ry’ikiremwamuntu muri rusange.

Ati “Ikiruta ibindi ni uko ububyutse bwo muri Afurika y’u Burasirazuba bwatangiriye hano, bujyanye n’iterambere ry’itorero, muri make twashimye Imana.”

Yavuze ko Gahini ari ahantu Itorero ry’Abangilikani rifite amateka akomeye, ari naho mu myaka ya 1930-40 ryakomoye imbaraga zo kubona abamisiyoneri, abaganga, n’ububyutse mu kwemera.

Ati “Icyo nasabira hano ni uko abantu benshi bajya bahagirira ingendo nyobokamana, bakagenda nk’Intumwa za Yesu Kirisito. Ni ibintu nzajya mvugaho ningera mu Bwongereza, nzabyandikaho, ndetse njye mbigarukaho mu gihe ntanga inyigisho.”

Gahini ifite mateka yihariye

Urukuta rw’ibitangaza rwagaragaye mu 2004, ubwo urukuta rw’inyubako ya Diyosezi rwiyasaga nta kirusagariye, byahuriranye n’uko mu Itorero rya Gahini harimo ibibazo by’amacakubiri byanagejejwe no kuri Perezida Paul Kagame.

Ni ibibazo byaturukaga ku gatsiko kamwe mu idini kakwanyaga Musenyeri Birindabagabo aho bivugwa ko hari n’abandi bantu bakomeye bari babiri inyuma.

Musenyeri wa Diyosezi ya Gahini, Alex Birindabagabo yagize ati “Mu gitondo saa mbiri abakozi barangije gusenga, umwe yabwiye abandi ati igikuta cyasenyutse, iriya nzu igiye gusenyuka nimutabare. Abantu bahacaga bose barahagarara bakavuga bati iyi nzu izize iki? »

Ukwiyasa k’uru rukuta kwareshyaga na sentimetero eshanu ubirebye uri hanze, bajya kuburira abantu barimo imbere, ariko basanga imbere nta kibazo kirimo, babanza gutekereza ko ari ukubera ko aribwo bigitangira.

Bugenimana Jean Pierre wari ushinzwe kubakisha inzu za Diyosezi ngo yatangiye kwiga uburyo aza guhuza urwo rukuta inzu yose idashyizwe hasi, maze nka saa tanu haza umuntu amubwira ko inzu yateranye kandi yari yasadutse kuva hejuru kugeza ku musingi wayo n’amatafari yacitsemo kabiri.

Baje gutekereza ko ari Imana yohereje ubutumwa bwabahumurizaga ko ibibazo byari bibugarije mu itorero ryabo bidateze kubatandukanya burundu.

Musenyeri Birindabagabo ati «Naje gusobanukirwa mu kwezi kwa 11, icyo Imana yatubwiraga cyaramaze kuba. Imana yaratubwiraga ngo mugiye kugaragara nk’itorero risadutse urebera hanze, ariko nimuhumure imbere muri bazima.»

« Ikindi ni uko Imana yavugaga ngo ‘mu gihe abantu bazaba bibaza uko ibya Gahini bigiye kugenda, nibwo ibyanyu nzabirangiza nk’Imana.’»

Ububyutse bwa Gahini kandi busubira no mu 1936, ubwo imbaraga z’Imana zamanutse ahantu hose zigakangaranya abanyabaha, abenshi bakemera kwihana, izo mbaraga zinakwira Afurika y’u Burasirazuba.

Gahini yahise ihinduka ahantu ho gusengerwa hakomeye ndetse habera n’ibindi bitangaza, hakurura n’abanyamahanga, ari naho Se wa Minisitiri w’Ububanyi n’Amahanga wa Uganda, Sam Kutesa yaguye mu 1952 ubwo yari yagiyeyo gusenga.

Inkuru y’ububyutse bw’i Gahini ni nayo yahinduye Justin Portal Welby ubwo yari afite imyaka 18 yigisha muri Kenya mbere y’uko atangira kwiga Kaminuza, nk’uko yabigarutseho kuri uyu wa Gatandatu.

Icyo gihe ngo ntiyari azi Yesu, maze ubwo yaganiraga n’umuyobozi w’Ishuri Ryisumbuye rya Kiburu amubwira ibijyanye n’ububyuke bwo muri Afurika y’u Burasirazuba, ku wa 12 Ukwakira 1975 maze yakira Yesu nk’Umwami n’umukiza.

Yatangiye urugendo rw’ubukirisito ubwo ku wa 4 Gashyantare 2013 yagirwaga umuyobozi wa Diyosezi ya Canterbury n’umuyobozi w’Abangilikani ku Isi.

Bishop Birindabagabo, yavuze ko Gahini iri guhindura isura, ndetse hari gahunda yo kubaka inzu nyinshi ngo abahasura bajye babona aho baryama.

Ati “Hari n’indi mishinga dufite, hari ikigo tugomba kubaka ngo abantu nacyo bajye baza bagisure, ni ukuvuga ngo aho ibiro by’Ikigo cy’Ububyuke kizaba kiri. Ubu rero turimo turatumira abashoramari kugira ngo baze bubake kuko nk’uko mubibona, ubwo Archbishop wa Canterbury yaje, umuryango w’Abangilikani ku Isi yose ndetse si bo bonyine n’abandi bakunda Imana bagiye kuza ari benshi cyane.”

Akanyamuneza kari kose kuri Welby bitewe n'urugwiro yeretswe n'imbaga yari iteraniye i Gahini
Abantu b'ingeri zose zinyuranye bari bakereye kwakira Archbishop Justin Welby
Abanyeshuri nabo ntibari batanzwe mu kwakira uwo munyacyubahiro
Archbishop Welby ahabwa ikaze i Gahini, hamwe mu hafite amateka akomeye mu by'iyobokamana
Aha kuva kera abakirisito bahashyiraga igikumwe bashimangira ko batazava kuri Yesu
Abagore b'abasenyeri bashimangiye ko batazava muri Yesu
Archbishop Welby avuga ko ibyabereye i Gahini azajya abigarukaho mu gihe ari kwigisha
Musenyeri Birindabagabo yasabye abantu batandukanye kujya gushaka ubumenyi ku bubyutse i Gahini
Musenyeri Onesphole Rwaje uyobora Abangilikani mu Rwanda
Guverineri w'Intara y'u Burasirazuba, Kazayire Judith nawe yari yitabiriye uwo muhango
Uyu muyobozi yashyize ikimenyetso ku kigo cy'ububyutse (East African Revival Heritage Center)
Welby yasengeye aha hantu n'igice kizajya gisurwa cyane n'abantu banyuranye
Umukecuru ww'imyaka 96 nawe ntiyari yahatanzwe
Abakirisito batandukanye bagaragazaga ibyishimo ubwo bakiraga umuyobozi w'Abangilikani ku Isi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244