Urubyiruko rw’abayisilamu rwasabwe gucika ku mvugo ‘Abahakanyi n’Abakafiri’

Yanditswe na Thamimu Hakizimana
Kuya 13 Ukuboza 2016 saa 04:44
Yasuwe :
0 0

Urubyiruko 670 ruhagarariye urundi rwo mu idini ya Islam ruturuka mu Turere tw’Umujyi wa Kigali, rwabujijwe kwita abo badahuje idini ’Abahakanyi’ cyangwa ’Abakafiri’, mu rwego rwo kwirinda ivangura hagati y’abo n’abandi banyarwanda.

Ubwo bari mu biganiro na Polisi y’u Rwanda bigamije kurwanya iterabwoba, byateguwe n’ubuyobozi bw’idini y’abayisilamu mu Mujyi wa Kigali, ku wa 11 Ukuboza 2016, ni bwo babisabwe.

Uru rubyiruko rwasabwe kwirinda izo mvugo bitewe n’uko ari zimwe mu zishingiye ku ivangura zikoreshwa n’imitwe y’Iterabwoba yiyitirira idini ya Islam zikica inzirakarengane.

Mufti w’u Rwanda, Sheikh Hitimana Salim, yibukije uru rubyiriko ko rudakwiye kwita abo badahuje ukwemera abahakanyi cyangwa abakafiri kuko ari imvugo ikoreshwa n’ababa bashaka gushyiraho imipaka hagati yabo n’abandi.

Yagize ati “ Umukafiri ni umuntu utemera utanafite icyo yemera na kimwe mu kwemera kwe; kandi nibaza ko umuntu wemera atakwita umukafiri kuko na korowani yabise amazina atandukanye, yagiye ibita amazina ahuye n’ibyo bemera.”

Umuyobozi w’Ishami rya Polisi y’u Rwanda rishinzwe kurwanya ibyaha by’iterabwoba, ACP Denis Basabose, yasabye uru rubyiruko kwirinda gukoresha imvugo zivangura abanyarwanda no kujya rurega abarwita abiyahuzi, ibyihebe cyangwa abaswahili kuko nabyo bitemewe.

Yakomeje abasaba kurwanya bivuye inyuma imyumvire mibi y’ubuhezanguni buganisha ku iterabwoba no gukorana n’inzego zishinzwe umutekano mu kuyikumira aho bayumvise ndetse anabizeza ko nta kiganiro na kimwe kizongera guca kuri televiziyo cyangwa radiyo byo mu Rwanda kivuga nabi Islam cyangwa cyiyitiranya n’imitwe y’iterabwoba kuko byamaze kugaragara ko ntaho bihuriye.

Urubyiruko rw'Abayisilamu rwasabwe kutita abo bahuje ukwemera amazina arimo ivangura
Bamwe muri urwo rubyiruko basabye gusobanurirwa icyo ijambo 'Abakafiri' bivuga kugira ngo birinde kurikoresha bazi icyo rivuga
ACP Basabose yibukije urwo rubyiruko kujya rurega abarwita 'Ibyihebe', Abiyahuzi n'ibindi
Sheikh Hitimana Salim yibukije urwo rubyiruko ko Umukafiri ari umuntu udafite icyo yemera na kimwe mu myizerere ye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza