Kigali : Abatsinze irushanwa ku bumenyi bw’idini ya Islamu bahawe ibihembo

Kigali : Abatsinze irushanwa ku bumenyi bw’idini ya Islamu bahawe ibihembo


Yanditswe kuya 16-12-2012 - Saa 16:04' na Abdou Nyampeta

Komisiyo ishinzwe ivugabutumwa muri Islam ku isi ibinyujije muri komite ishinzwe irushanwa ku bumenyi bw’idini ya Islam mu Rwanda, ku Cyumweru tariki ya 16 Ukuboza yahaye ibihembo ku mugaragaro Abanyarwanda icumi batsinze irushanwa mpuzamahanga rya kane ry’ubumenyi bw’idini.

Mu kiganiro na IGIHE, Sheikh Sindayigaya Musa, Umuyobozi wa komite ishinzwe irushanwa mu Rwanda yatangaje ko abo icumi batsinze mu gusubiza ibibazo babajijwe mu bantu 5000 mu gihugu hose, ati” Twohereje mu gihugu cyose amakaye ibihumbi bitanu, twahawe na Minisiteri ishinzwe ibibazo by’idini ya Islamu ku isi ikorera muri Arabia Saoudite. Iyo kayi yari ikubiyemo ibibazo 20. Abantu batandatu nibo babashije kubona 100%.”

Sheik Sindambiwe akomeza avuga ko bitewe n’uko hari hakenewe abantu icumi, baharwe uruhushya na Komisiyo ishinzwe ivugabutumwa ku Isi, bashaka abandi 4. Abo bane batoranyijwe baba abari bafite byibura 95%”.

Ababonye ibihembi ni Hodari Musa, Murindahabi Ibrahim, Musoni Djafar, Nikuze Rukiya, Umubyeyi Hamida, Karigirwa Zaynabu, Bazambaza Safari, Mugisha Abubakar, Shadadi Radjabu, Djuma Ally Muhamadi, Batatu ba mbere babonye igihembo cyo kujya mu mutambagiro Mutagatifu i Maka bishingirwa n’igihugu cya Arabia Saoudite, yaba ingendo n’ibindi byose bakeneye byo kugira ngo bakore icyo gikorwa. Bivugwa ko bafashwe neza cyane kuko bari intumwa z’igihugu.

Uwa kane n’uwa gatanu bahembwe buri wese yahawe mudasobwa igendanwa(Lap Top) ifite agaciro k’ibihumbi 400 by’amafaranga y’u Rwanda ; uwa karindwi n’uwa munani bahabwa Korowani Ntagatigu ikoramye ubuhanga ishobora gusomwa hakoreshejwe ikaramu bikumvikana mu majwi, buri imwe ifite agaciro k’amafaranga y’u Rwanda ibihumbi 250 ; naho uwa cyenda n’uwa cumi bahabwa telephone igenganwa.

Umubyeyi Hamida, umugore w’imyaka 65 y’amavuko wahembwe Lap Top yagaragaje ibyishimo asaba abagore mu rugero rwose barimo kutitinya, bakajya bitabira amarushanwa.

Al Hadji Hodari Musa wahembwe kujya i Maka, ashishikariza abantu kwitabira gusoma Ibitabo bitagatifu kuko bibungura ubumenyi kandi bikaba imwe mu nzira yo gukorera Imana. Avuga ko umuntu amenya byisumbuyeho Korowani, kandi kuko yabikundaga akaba ari byo byatumye abasha gusubiza neza ibibazo byo mu irushanwa.

Sheikh Habimana Saleh, wigeze kuba Mufti w’u Rwanda, ubu ukuriye Ikigo cy’igihugu gishinzwe imiyoboerere myiza, gifite mu nshingano amadini, imiryango itagengwa na leta n’imiryango idaharanira inyungu, avuga ko Leta yafashe ingamba zo guteza imbere amadini cyane cyane mu ikoranabuhanga n’ubumenyi. Agira ati “Ntituzahwema gufasha amadini mu buryo bwose bushoboka bwo kuzamura mu bumenyi abayoboke bayo. Tuzakomeza kuyaba hafi”.

Irishanwa ku bumenyi bw’idini ya Islam riterwa inkunga n’igihugu cya Arabia Saoudite, kikanatanga ibihembo buri mwaka ku Isi yose.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO