Mgr Harolimana, Umwepiskopi mushya wa Ruhengeli yimitswe ku mugaragaro

Mgr Harolimana, Umwepiskopi mushya wa Ruhengeli yimitswe ku mugaragaro


Yanditswe kuya 24-03-2012 - Saa 13:52'

Nyuma y’aho yemejwe na Nyirubutungane Papa Benedigito wa XVI, mu bwihangane bwuje umutimanama wa gikristu, imbere y’imbaga ibihumbi n’ibihumbi, kuri uyu wa Gatandatu Nyiricyubahiro Musenyeri Harolimana Visenti amaze kwimikwa no guhabwa inkoni y’ubushumba nk’umushumba mushya wa diyoseze ya Ruhengeli kuri sitade Ubworoherane yo mu karere ka Musanze.

Mu ijambo ritangiza uyu muhango, uhagarariye ibiro by’intumwa ya Papa mu Rwanda Padiri Joseph Antorrayini yatangaje ko azanye urwandiko rwemerera uwari padiri Harolimana ruturutse i Roma kwa Papa rubumbiyemo amabwiriza n’ububasha ahawe nyuma y’ubushishozi n’igenzura by’impuguke za kiliziya.

Igishya muri uyu muhango

Nk’uko bimenyerewe n’ahandi hose, mu kwimika umwepisikopi hasobanurwa itandukanirizo riri hagati ye n’umusaseridoti, aho padiri Niyibizi yagarutse ku gisobanuro cy’ingofero n’inkoni y’ubushumba.

- Burya buri mwepisikopi agira amoko abiri y’ingofero ariko zikagira n’icyo zisobanura ; imwe nini yambara nko mu mihango ya kiliziya iteye nk’amasunzu abumbatanije isobanura ubumwe ariko mu bisate byayo kimwe kikagaruka ku isezerano rya kera ikindi ku rishya nk’ibice bibumbatiye Bibiliya Ntagatifu, umusingi w’ijambo ry’Imana.

- Inkoni y’ubushumba : Niwitegereza ngo uzasanga iyi nkoni nini ndende kandi yigondoye isobanura mu bwiburungushure byayo ubumwe bw’abakristu nayo ariko Musenyeri ayerekeza ku ntama ze iyo ari muri diyoseze ye n’iyo atambagira imbere y’abakristu, akayiyerekezaho ari mu zindi diyoseze.

Muri uyu muhango witabariwe n’imbaga y’abakristu, abahayimana n’abayobozi mu nzego nkuru za leta nka minisitiri w’intebe, Dr Pierre Damien Habumuremyi. Habanje igitambo cya misa yo kwimika Musenyeri Harolimana Visenti, nyuma yo kwemerera uwo yihitiyemo ko amwimika ariwe Musenyeri Alexis Habiyambere wari usanzwe ari n’umuyobozi w’iyi diyoseze mu gihe cy’imyaka ine ishize.

Musenyeri Harolimana ni muntu ki ?

Musenyeri Vincent Harolimana yavukiye i Mpembe muri Diyoseze ya Nyundo ku wa 2 Nzeli 1962, yiga muri iyi Seminari yayoboraga, nyuma aza gukomereza i Rutongo, aho yavuye ajya gukomereza amashuri ye muri Seminari Nkuru yitiriwe Karoli Boromewo y’i Nyakibanda, aminuza mu bya tewolojiya mu 1990, ari nabwo yahawe ubupadiri igihe Papa Yohani Pawulo wa II yagiriraga uruzinduko mu Rwanda.

Mbere gato ko ajya i Roma mu Butaliyani mu 1990-1993 yakoreye Diyoseze ye nk’umupadiri. Kuva 1993-1999 yari mu Butaliyani yiga muri Université Pontificale Grégorienne aho yakuye impamyabushobozi ihanitse mu bya tewolojiya (Doctorat de théologie dogmatique ).

Mu mwaka w’i 2000, yabaye umuyobozi wa Seminari Nto yo ku Nyundo. Mu 2004 yakomeje kwigisha muri Seminari Nkuru ya Nyakibanda, ndetse kuri ubu yanatangaga amasomo mu Ishuri rikuru ryo mu Ruhengeri.

Mu misango yuje ishimwe yagarutsweho n’abandi bihayimana bagenzi be nka Musenyeri Habiyambere Alexis yari asimbuye ku buyobozi bwa diyoseze ya Ruhengeri na Musenyeri Thaddee Ntihinyurwa wa Kigali bagarutse ku nshingano bahawe yo kwamamaza inkuru nziza abinyujije mu butumwa bugewe intama aragijwe nk’umugaba w’ingenzi n’umurinzi w’ingenzi w’imihango ikorerwa muri kiliziya ayoboye.

Ibi bikaba ari bimwe mu byagarutsweho na na nyirubwite Musenyeri Visenti Harolimana wivugiye ko uretse ibivugwa n’itangazamakuru kuri we ari uwo Imana yahaye urukundo ruhebuje, ikamukura kure mu gihe cy’amage ikamukura ku cyavu ikamugira intumwa

Harolimana ati :“ nzabihamya mbabwira ko twabonye inyenyeri”. Iyi ikaba ari nayo ntego ye igarukwaho mu kilatini ngo “Vidimus stellam eius”.

Minisitiri w’intebe Pierre Damien Habumuremyi nk’umushyitsi mukuru akaba n’intumwa ya Perezida wa repubulika muri uyu muhango yashimye uruhare rufatika ruboneka mu iterambere ry’igihugu nko nu isanamitima agaruka no ku ndangangaciro z’Umunyarwanda w’umukristu mu gihe tugezemo.

Aha Minisitiri w’intebe yagaragaje ko Imana itakwemerera kubyara benshi udashobora kurera cyangwa gutunga ngo ubahe indyo yuzuye nyamara wakubaka akarima k’igikoni, ngo ntuboneze urubyaro, ugure mituweli yo kuvuza abo wabyaye.

Uretse imbaga y’abakiristu muri uyu muhango hari n’abandi bihayimana benshi bo mu Rwanda, u Burundi Kongo Kinshasa n’Abagande utaretse abo mu nzego bwite za leta nka ba minisitiri, guverineri n’abayobozi mu nzego za gipolisi na gisirikare.

Musenyeri Vincent Harolimana mu mutambagiro mbere y'igitambo cya misa
Ngabo Abepiskopi barangajwe imbere na Nyiricyubahiro Mgr Habiyambere (hagati)
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO