Musanze:Paruwasi Bumara yatashywe izafasha u Burezi

Ku cyumweru taliki ya 15 Nyakanga 2012 mu Karere ka Musanze mu kagari ka Bumara,umurenge wa Rwaza, hatashywe Paruwasi Bumara izafasha mu kuvugurura ibyumba by’amashuri.

Umusaza wavutse 1913 hashize imyaka 3 Santarari ya Bumara ishinzwe, yavuze ko iyo Paruwasi ifitiye abaturage akamaro mu kubagezaho serivisi zitandukanye, zirimo amashuri n’ibindi.

Mpembyemungu Winniflide, Umuyobozi w’Akarere ka Musanze yatangaje ko bafatanyije na Paruwasi ya Bumara bazavugurura ibyumba by’amashuri bishaje, bakazabisakaza amabati kuko byari bisanzwe bisakaje amategura.

Padiri Bazamanza Jean Népomuscène waragijwe Paruwasi Bumara yatangaje ko bafite byinshi bashaka kugeraho birimo umuryango remezo uzafasha Abakirisitu kwigira hamwe ibibazo byabo no kurebera hamwe icyabateza imbere.

Musenyeri wa Diyosezi ya Ruhengeri Harorimana Vincent yavuze ko bafite gahunda yo gushinga paruwasi hirya no hino, mu rwego rwo kwegera abakirisitu babagezaho ivanjiri badakoze ingendo zivunanye cyane.

Umuyobozi w’Intara y’Amajyaruguru Bosenibamwe Aime yavuze ko Intara y’Amajyaruguru igiye kureba uburyo yafatanya na Diyosezi muri gahunda yayo y’umuryango remezo aho usanga abakirisitu bahura bakigira hamwe ijambo ry’Imana. Yagize ati : ”Leta ifite imishinga iteza imbere abaturage bakava mu bukene bityo ugasanga ari naho umuryango remezo uganisha”.

Kuri uyu munsi ababyeyi bazanye impano zitandukanye

Umuyobozi w'Intara y'Amajyaruguru Bosenibamwe n'Umuyobozi w'Akarere ka Musanze

Abayobozi ba Kiliziya bataha Paruwasi

Paruwasi Bumara yabyawe na Paruwasi Rwaza yashinzwe mbere mu rwanda. Ni Paruwasi usanga zitanga serIvisi zifitiye abaturage akamaro mu mashuri n’amavuriro.