Papa Francis atangiranye udushya

Papa François muri iyi minsi aratungura abantu akora udushya, ku munsi w’ejo hashize yagiye muri Hoteli aho yari acumbitse igihe cy’amatora, yishyura akoresheje umufuka we nyuma y’uko atorwa kandi yitwaza ibintu bye ashimira abakozi baho umwe ku wundi. Kuri uyu wa Gatandatu biteganyijwe ko azagirana n’abanyamakuru n’abashinzwe itangazamakuru.

Papa mushya ku munsi w’ejo yari yahuye n’abakaridinali abasomera igitambo cya Misa kibegereza Kirisitu, bakarushaho kumwubaha no kwitagatifuza, batagatifuza na Kiliziya. Iyo Misa yabere muri shapele ya Sixtine. Agira ati "Imana Ishobora byose ibabarire ku byo mwakoze byose bitayishimishije."

Uyu Papa muri gahunda ye, ku cyumweru azasoma igitambo cya Misa, ku wa mbere azahura n’abahagarariye andi madini bazaba baje mu birori byo kumwimika biteganyijwe kuzaba ku wa kabiri w’icyumweru gitaha.

Nk’uko tubikesha imbuga zitandukanye, Papa Francis afite imiterere idasanzwe. Mu myaka ine gusa, Karidinali Jorge Mario Bergoglio, ubwo yari umushumba wa Kiliziya Gatolika ya Buenos Aires muri Argentine yakundaga gutega imodoka zisanzwe, agakora ku birenge by’ababana n’ubwandu bwa virusi itera SIDA, agasengera abakora umwuga w’uburaya kandi ntakunde ibintu by’iraha.

Papa Francis akimara gutorwa, ku wa kane yabyutse mu gitondo agenda muri imwe mu modoka zisanze z’i Vatican, ntiyakoresha imugenewe nka Papa.