Kwamamaza

Abanyempano bakwiye gufasha ubwoko bw’Imana kutazakwamira ku Isi- Minisitiri Uwacu

Yanditswe kuya 14-11-2016 saa 13:07' na IGIHE


Minisitiri wa Siporo n’Umuco, Uwacu Julienne yasabye abahanzi ndetse n’amakorali baririmba indirimbo zihimbaza Imana guhanga ibihimbano by’umwuka bizafasha abakunzi babyo kutazaguma mu Isi, ariko bagaharanira kuyisiga ari nziza kurusha uko bayisanze.

Ibi yabigarutseho mu birori byo guhemba abahanzi bahize abandi muri “Groove Awards Rwanda”, irushanwa rihuza abaririmba indirimbo zo kuramya no guhimbaza Imana, byabereye muri Hoteli Serena ku mugoroba wo kuri iki Cyumweru tariki ya 13 Ugushyingo 2016.

Minisitiri Uwacu Julienne yatangaje ko ntacyo wakora utafatanyije na Leta ngo kigerweho, kandi amadini ndetse n’abavugabutumwa bagomba kubigiramo uruhare.

Yagize ati “Abahanzi beza baba ari n’abahanuzi kuko bafasha abumva ubutumwa bunyura mu bihangano byabo gusobanukirwa no guhindura imitekerereze. Abahanzi b’indirimbo zihimbaza Imana bagomba kubigira umwihariko wabo kuko twese twaremwe n’Imana mu ishusho yayo kandi iyi si tuzayivaho dutahe iwacu; ikizaduherekeza ni imirimo twakoreye hano. Nta nzira y’ubusamo ijya mu Ijuru ahubwo buri wese azahagezwa n’imirimo ye.”

Yakomeje agira ati “Abafite umuhamagaro, abo Imana yahaye impano bagomba gufasha ubwoko bwayo kugira ngo batazakwamira muri iyi Si. Ibi bireba abihayimana kuko nibo bagomba gufasha abantu kubigeraho. Abahanzi mufite impano Imana yabahaye ku buntu ariko mufite n’umwenda kuko uwahawe byinshi azabazwa byinshi.”

Minisitiri Uwacu yakomeje ashimira abategura aya marushanwa ko batagamije guhanganisha abahanzi ahubwo yubaka ubumwe n’ubufatanye bwabo ndetse bagatahiriza umugozi umwe bagamije kubaka ubumwe bw’abenegihugu.

Uyu mwaka ibihembo byatanzwe mu byiciro 13, byatorewe n’abakunzi b’indirimbo zihimbaza Imana mu gihe ibindi bitatu byongereweho ndetse abatsinze bashyirwaho n’akanama nkemurampaka kari kayobowe na Pastor John Kaiga.

Nubwo Groove Awards Rwanda y’uyu mwaka yatangiye bamwe batavuga rumwe ku bahanzi bakomeye batagaragayemo, mu isozwa ryayo, Umuyobozi wayo, Francine Havugimana yatangarije IGIHE ko bishimira intambwe bamaze gutera ndetse n’uburyo umuziki w’indirimbo zihimbaza Imana ugenda ushyigikirwa n’abantu b’ingeri zitandukanye.

Yagize ati “ Groove Awards imaze kugera ku rwego rushimishije ndetse nizera ko buri wese mu Banyarwanda agenda abiha agaciro, irushanwa ryatangiye abantu batabyumva neza, ariko uko imyaka yicuma niko birushaho gutanga isura nziza.”

Ku nshuro yayo ya kane, abahanzi bahatanaga muri Groove Awards Rwanda bakoze ibitaramo bibiri byiswe Groove Tour, biyereka abakunzi babo ndetse hanagaragazwa abahanzi bafite impano ariko batazwi mu cyiciro cyiswe " Gifted Voices" bitwaye neza, barahembwa bemererwa no gukorerwa indirimbo.

Iki gitaramo cyitabiriwe n’abantu bagera ku bihumbi bibiri cyasusurukijwe n’abahanzi n’amakorali atandukanye yo mu Rwanda ndetse n’umuhanzi w’icyamamare muri Kenya Owen Mwatia "Daddy" Owen, waririmbye indirimbo zitandukanye zirimo iyitwa Tobina yashimishije abacyitabiriye.

Abegukanye ibihembo muri Groove Awards Rwanda yabaga nshuro ya Kane:

1. Umuhanzi w’umugabo w’umwaka: Albert Niyonsaba

2. Umuhanzikazi w’umugore w’umwaka: Pastor Grace Ntambara

3. Korali y’umwaka: Gisubizo Ministries

4. Umuhanzi mwiza ukizamuka: Arsene Tuyi

5. Indirimbo nziza y’umwaka: Amfitiye byinshi ya Gisubizo Ministries

6. Indirimbo nziza yo kuramya y’umwaka: Amfitiye byinshi ya Gisubizo Ministries

7. Indirimbo nziza ya Hiphop: Yesu ni Umwami ya Mugema Dieudonné (MD)

8. Indirimbo nziza y’amashusho:Arankunda ya Gaby Kamanzi

9. Itsinda ribyina ry’umwaka: Shining Stars

10. Ikiganiro cyiza cya Gospel cya Radio: Gospel Magic Mix cyo kuri Magic Fm(RBA)

11.Umunyamakuru mwiza w’umwaka(Radio): Ange Daniel Ntirenganya

12. Umuterankunga w’imena mu muziki w’indirimbo zihimbaza Imana (Outstanding contributor): Alain Numa (MTN)

13: Umwanditsi mwiza w’indirimbo: Nelson Mucyo

14. Producer w’indirimbo z’amajwi: Haragakiza Justin

15. Umuhanzi mwiza muri Diaspora: Adrien Misigaro (USA)

16. Umuhanzi ufite indirimbo yitabirwaho cyane (MTN Caller ringtone): Thacien Titus(Aho ugejeje ukora)

17. Abahanzi batatu bafite impano zo kuririmba (Gifted voices): Sam Rwibasira, Clarisse Mugeni na Yves Chris Mutabazi

Minisitiri Uwacu yasabye abahanzi guhimba indirimbo zifasha abakunzi babo kurushaho kujya mu nzira y'agakiza
Minisitiri wa Siporo n’Umuco, Uwacu Julienne (iburyo) n'Umuyobozi wa Groove Awards Rwanda, Havugimana Francine bitabiriye iki gitaramo

Amafoto: Mahoro Luqman


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved