Ese Papa Francis ashyize umutima kuri Afurika kurusha abamubanjirije?

Yanditswe na Jean Luc K. Mugisha
Kuya 20 Werurwe 2017 saa 02:31
Yasuwe :
0 0

Umushumba wa Kiliziya Gatolika ku Isi, Papa Francis benshi bamufata nk’umuntu wahinduye byinshi, ufite ubushake bwa politiki kurusha abamubanjirije kandi udasigara inyuma, agahihibikanira no kugendana n’ibigezweho mu iterambere ryo kuri uyu mubumbe.

Mu gihe Papa Francis yagaragaje ubushake bwo gushyikirana n’umugabane wa Afurika binyuze mu ngendo ahakorera n’uburyo yakira abayobozi bakuru mu nzego zitandukanye bawukomokaho, benshi bibaza niba yaba awushyizeho umutima kurusha abandi bamubanjirije?

Ikinyamakuru Jeune Afrique gitangaza ko iki kibazo bagishingiyeho bitewe nuko mu minsi ishize Papa aheruka gusubika urugendo yateganyaga muri RD Congo.

Jorge Mario Bergoglio ariwe wahawe amazina ya Papa Francis mu gihe yahabwaga inkoni y’Ubushumba ku wa 13 werurwe 2013, yasimbuye Benoît XVI, bivugwa ko yari umuyobozi udakunda impinduka. Papa Francis utarashoboraga kwirengagiza inkubiri y’ibyagombaga gukorwa mu buryo bwihuse muri Kiliziya Gatolika yijeje gushyira ku murongo ibibazo birimo ibirebana no gutandukana kw’abashakanye, gukuramo inda no kubana kw’abahuje ibitsina.

Uyu Mushumba ukomoka muri Amerika y’Amajyepfo, yagaragaye nk’umunyapolitiki i Vatcan, Leta ibarizwa mu Butaliyani. Papa Francis yahawe iyo sura ya politiki biturutse ku bushake yagaragaje ku guharanira amahoro, ibibazo by’impunzi n’abimukira ndetse n’uruhare rwe ku kurangiza ikibazo hagati ya Cuba na Leta Zunze Ubumwe za Amerika cyari kimaze imyaka irenga 50.

Nubwo uyu Mushumba ukomoka muri Argentine yakoze byinshi, Jeune Afrique igaruka ku rugendo rwe muri Afurika. Mu myaka ine amaze afite Inkoni y’ubushumba avugwaho gukora ingendo nke muri Afurika.

Mu Ugushyingo 2015, Papa Francis yakoreye urugendo muri Kenya, Uganda na Centrafrique aho ubushake bwe no kwiyoroshya bwongeye gukora ku mitima ya benshi.

I Roma, uyu Muyobozi wa Kiliziya Gatolika mu bihe bitandukanye yahuye n’abasenyeri bo ku mugabane wa Afurika mbere y’inama ku birebana n’umuryango yahuje abayobozi bakuru muri Kiliziya Gatolika izwi nka "synode" yabaye mu Ukwakira 2014.

Mu myaka ine amaze ari Umushumba; Papa Francis asuye ibihugu bitatu bya Afurika. Ni umubare uhuye neza n’ibyo Papa Benoît XVI yabashije gusura mu myaka irindwi yayoboye, mu gihe Jean-Paul II mu myaka 27 yasuye ibihugu 50 muri Afurika, 55 muri Amerika na 78 ku mugabane w’u Burayi.

Mu myaka 27 yayoboye, Jean Paul II yashyizeho aba-cardinal 17 b’abanyafurika mu gihe Papa Francis ashyizeho barindwi mu myaka ine ayoboye. Ni abayobozi bashobora gutorwamo uwamusimbura barimo Cardinal Dieudonné Nzapalainga ukomoka muri Centrafrique aheruka gushyiraho, waje yiyongera ku bandi benshi.

Undi muyobozi wa Kiliziya ugarukwaho ni Cardinal Laurent Monsengwo wo muri DRC, ufatwa nk’umuntu wa hafi kuri Papa Francis.

Muri abo ba-cardinal, harimo n’abajyanama be icyenda barimo Cardinal Giuseppe Bertello, Intumwa ya Papa mu Rwanda (Nonce Apostolique) muri 1994.

Umushumba wa Kiliziya Gatolika ku Isi, Papa Francis

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza