Huye:Musenyeri Mbanda yahwituye abahugira mu masengesho gusa bakibagirwa umurimo

Yanditswe na Prudence Kwizera
Kuya 8 Gashyantare 2017 saa 02:36
Yasuwe :
0 0

Musenyeri wa Diyoseze ya Shyira, Laurent Mbanda, ashishikariza Abakirisitu n’abandi basenga kubikora ariko bakitabira n’ibikorwa bibateza imbere kuko Imana ikunda umuntu uteza imbere urugo rwe n’umuryango, akubaka n’igihugu cye akagiteza imbere.

Musenyeri Mbanda avuga ko abasenga ariko ntibitabire umurimo bibwira ko Imana izabaha ibibatunga n’imiryango yabo bibeshya, bityo akabasaba guhinduka.

Mu kiganiro aherutse gutanga mu Ishuri Rikuru ry’Abapolotesitanti mu Rwanda (Piass) kivuga ku ‘myizerere n’iterambere’, yanenze abiyita ko basenga ariko bakarera amaboko.

Ati “Imana yaduhaye amaboko kugira ngo dukore, ntabwo Imana idutegerejeho kurera amaboko, imana yadushyize ku Isi kugira ngo tuyihindure nziza, dukore twibesheho, tubesheho imiryango yacu kandi twubake igihugu cyacu tugiteze imbere, kuko ibyo biri mu biyihesha icyubahiro”.

Musenyeri Mbanda yasobanuye ko gukora umurimo w’Imana bitagombye kuba inzitizi yo gushora imari, kuko Imana idatanga umugisha ku muntu wirirwa yicaye.

Ati “Ikintu cyose ni ‘business’ no kuvuga ubutumwa bizana inyungu, ubwo rero iyo mbasha kwibeshaho no kwigira cyangwa kubeshaho neza Paruwasi nyobora nibaza ko bihesha Imana icyubahiro”.

Bamwe mu banyeshuri n’abarezi bo muri Piass bakurikiye icyo kiganiro bavuga cyabafashije gusobanukirwa ko gukunda umurimo no kuwukora neza no guteza imbere igihugu cyabo, aricyo Imana ibasaba mbere ya byose, kandi bagiye kubikora no kubitoza abandi.

Alice Mukamusoni wiga mu mwaka wa kabiri ati “Icyo nasobanukiwe kandi numva kigiye kumfasha mu mibereho yanjye ya buri munsi, ni uko kuba ndi umukirisitu no gukora buzinesi nabikora kandi nkabikora neza nifitemo ubunyangamugayo, kuko Imana izampera umugisha mubyo nkora n’amaboko yanjye”.

Rev. Pst. Prof Viateur Ndikumana, Umuyobozi mukuru wungirije ushinzwe amasomo muri Piass, yasobanuye ko ibiganiro nk’ibi babitegura mu rwego rwo gufasha abanyeshuri bigisha kuzabaho neza mu buzima bwo hanze kandi bakaba abantu bahindura sosiyete babamo.

Prof Ndikumana ati “Ubwami bw’Imana ntabwo buza mu bukene n’ubutindi, ntabwo buza mu kurwara imbaragasa, kubona abana mu muhanda basabiriza, buza muri bya bindi twita kuva mu bwiza tujya mu bundi, none se twabigeraho gute tutitabira umurimo”?

Ubusanzwe inshingano za Kaminuza n’amashuri makuru zibanda ku bintu bitatu by’ingenzi, ari byo kwigisha, gukora ubushakashatsi no gufasha abaturage guhangana n’ibibazo bafite, akaba ari muri urwo rwego abize n’abiga basabwa gufata iya mbere mu gufasha abaturage kugendera mu nzira nziza zibafasha kubaho neza no kugira ubunyangamugayo.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza