Isano yo kubandwa no gusenga, ubupfumu n’ubuhanuzi, guterekera no kwiyambaza abatagatifu

Yanditswe na Tombola Felicie
Kuya 20 Mata 2017 saa 03:17
Yasuwe :
0 0

Hari imigenzo imwe n’imwe ikorwa n’amadini n’amatorero yo muri iki gihe witegereza neza ukabona ifitanye isano n’ibyakorwaga hambere, uretse gusa ko byitwa amazina atandukanye, bigakorwa no mu buryo twakwita ko buvuguruye.

Muri iyo, twavuga kubandwa no gusenga, ubupfumu no guhanura, guterekera no kwiyambaza abatagatifuza n’ibindi.

Mu kugaragaza ayo masano twifashishije igitabo cyitwa ‘Imizi y’u Rwanda’ cy’Umwanditsi Nsanzabera Jean de Dieu.

Kubandwa no Gusenga

Kubandwa ko mu Rwanda rwo hambere ni kimwe no gusenga k’ubu.

Kubandwa Imana bikomoka ku nshinga kubanda ariho hava amazina nka Kabanda, Kayibanda bisobanuye komatana cyangwa kuba hamwe n’Imana.

Gusetsa Imana ni ukujya mu materaniro ahantu hamwe ni kimwe no kujya mu nsengero muri iyi minsi.

Kwatuza umuntu winjiye mu idini bwa mbere twabigereranya no kubatiza kuko imandwa zarateranaga zikaba zifite amarwa adasembuye avugirwaho amagambo batongereragau uwabaga agiye kubandwa.

Iyo babandishaga umuntu (kumwinjiza mu idini ya Ryangombe) yagira umubyara mu mandwa, yabaga ari nk’umubyeyi wa batisimu uko bimeze mu madini amwe na mwe ya gikirisitu. Uwabanzwe bamwita ‘Uruzingo’ ni nk’umukristo naho utarabanzwe yitwaga ‘inzigo’ ni nk’umupagani w’iki gihe.

Uko imandwa zahura babaga isekurume bakayotsa, bafite n’umutsima witwa umunayo hamwe n’amarwa y’isugi (adasembuye) bakarya kandi bakanywa , ibyo bikaba bisa n’ibyo abakirisitu bakora by’ifunguro ryera uretse ko bo batarya inyama kuko muri iki gihe mu ifunguro ryera hakoreshwa divayi n’imigati ikozwe mu ifarini.

Abagaragu b’imandwa, twavuga ko muri iki ari nk’abapadiri n’abapasiteri.

Guterekera no kwiyambaza abatagatifu

Kubandwa byakorwaga rimwe, ukaba winjiye mu idini. Guterekera byahoraga bikorwa nk’uko abemera Imana bahora bagira amateraniro yo gusenga.

Guterekera: Kwari ukwiyambaza abakurambere b’ibihangange babayeho ngo babavuganire ku Mana kuko bemeraga ko nta gihanganjye cyangwa imfura zipfa, ahubwo ko bagira ahantu bajya nk’ibihangange bagiriye umumaro sosiye.

Batekerezaga ko bajya mu birunga kuko hahoraga haka umurimo cyangwa ahandi hihariye.

Ibyo rero bikagereranywa n’abanyamadini bagira igihe cyo kwiyambaza abatagatifu, kuko nabo ni abantu bapfuye ariko bafite urugero ruhanitse rwo kwemera Imana no kuyikorera.

Abo banyamadini hari abemera ko abo bantu hari ahandi bajya hatari mu ruvange aho bise muri puligatori ( ahantu hajya abantu bafite ibyaha bike).

Guterekera byakorwaga kenshi nk’uko amadini asaba abayoboke bayo gusenga iteka.

Uwaterekeraga yamurikiraga (yaragiza) abakurambere ibiri mu rugo rwe byose nk’amatungo, umugore, abana n’ibindi byose atunze. Kimwe n’abasenga biragiza Imana badasize ibyo batunze n’ibyo Imana yabahaye byose.

Kuraguza no guhanuza

Abanyarwanda cyangwa abakurambere bacu bahaga agaciro ndetse abandi baracyaha agaciro ibyavuzwe n’abapfumu n’abahanuzi.

Kujya kuraguza kwari ukujya kureba umupfumu ukamugezaho gahunda zose uteganya nawe akakurebera ko bizagenda neza.

Ni ibikorwa byakorwaga n’Abanyarwanda mbere yo kugira icyo bakora cyose ngo barebe niba bazagira intsinzi.

Ntabwo byari ubujiji nk’uko bamwe babitekereza kwari ukwiyitaho ngo bamenye uko bahagaze.

Abapfumu baraguzwagaho babaga bazwi, uwabyiyitiriraga yarahanwaga bikomeye ndetse bikagera no ku gihano cy’urupfu.

No muri Bibiliya abakiririsito bemera usangamo abahanuzi b’ukuri nka Samuel, Yeremiya, Natani, Elisa n’abandi. Nk’uko no mu Rwanda habayeho abapfumu cyangwa abahanuzi bavuzwe nka Nyirabiyoro.

Iyo yasangaga harimo ikibazo yakubwiraga icyo ukora cyangwa se akakubuza gukora icyo kintu.

Kuri ubu usanga nabwo biriho, mu nsengero nyinshi usanga abakirisitu bashidukira kwegera abo bazi ko bahanura cyangwa berekwa ngo bababwire uko babibona.

Igitabo ‘Imizi y’u Rwanda’ kigira kiti “ Abapfumu bo mu Rwanda rwo ha mbere bari abahanuzi b’icyo gihe.”

Umusizi Nsanzabera Jean de Dieu ku murongo wa telefoni ati “ No kuri ubu usanga umukobwa cyangwa umusore ndetse abantu bose mu nsengero babanza kubaza abahanuzi babo berekwa , ngo none se bigende, tubanze dusengere ubukwe mbere y’uko bubaho n’ibindi n’ibindi.”

Akomeza avuga ko atemera abahanuzi bariho ubu kuko nta gishya bavuga.

Ati “Nubwo ariko biyita ariko nta bahanuzi bakibaho, abahanuzi ntabwo bavuga ibintu bisanzwe ngo mbonye Imana ikurinze impanuka, ngo ugiye kugura imodoka. Ibyo si ubuhanuzi kuko ubuhanuzi bwabaga bwerekeza ku gihugu n’ingaruka byagira k’umuryango mugari.”

Igitabo Imizi y’u Rwanda kigaragaza ko Abanyarwanda bari abahanga ndetse bemeraga Imana nubwo hari abatekereza ko ari ibintu bishya byazanywe n’abazungu.

Ibyo bakoraga babishyiragamo urukundo n’ukwemera gukomeye cyane ku buryo aribo bantu bakwiriye kwigiraho ugeranyije n’abakoloni baje batandukanya abanyarwanda ndetse bamwe bakavuga ko uwo mudahuje idini utamushyingira umugeni n’ibindi.

igitabo ‘Imizi y’u Rwanda’ cy’Umwanditsi Nsanzabera Jean de Dieu

tombola@igihe.com


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza