Korali Impuhwe mu giterane cyo kwibuka imyaka 15 ishize itakarije abaririmbyi mu mpanuka

Yanditswe na IGIHE
Kuya 15 Nyakanga 2017 saa 09:00
Yasuwe :
0 0

Imyaka 15 irashize, abahoze ari abaririmbyi n’abaterankunga bagera kuri 12 ba Korali Impuhwe ikorera umurimo w’Imana muri ADEPR Gisenyi baguye mu mpanuka bakoze bagiye mu ivugabutumwa.

Iyi Korali ibarizwa mu Itorero ry’Akarere ka Rubavu, mu Rurembo rw’Uburengerazuba iri mu bihe bidasanzwe byo kwibuka abagera kuri 12, baguye mu mpanuka, ubwo bari mu rugendo rw’ivugabutumwa bari bagiyemo mu Itorero rya ADEPR Mukingi mu yahoze ari Gitarama.

Mu gihe habura ibyumweru bibiri ngo iya 27 Nyakanga, itariki yibutsa impanuka yabaye mu 2002, Korali Impuhwe yateguye igiterane cy’ivugabutumwa ry’indirimbo kizamara iminsi irindwi kigasozwa no kwibuka abatabarutse.

Umuyobozi wa Korali Impuhwe, Ruzindana Gad, yatangarije IGIHE ko iby’iyi mpanuka bitabatunguye kuko bari babwiwe kwitegura ko igihe cyo gutaha kw’abageni kigeze.

Yagize ati “Ntabwo twatunguwe Imana yari yarabivuze kenshi ikoresheje bamwe muri twe ndetse inadutumaho intumwa zayo. Hari umubyeyi twaririmbanaga wabonye urutonde rw’abaririmbyi bazataha muri iyi mpanuka mu nzozi noneho ntiyabisobanukirwa. Yabajije Imana impamvu we atibonye kandi nawe aririmba muri korali arayitakambira abona ikiganza cyayo cyongeyeho izina rye, icyo gihe yabibwiye abaririmbyi bagenzi be ndetse biza kugenda gutyo birangira nawe ayiguyemo.”

Nyuma y’ubuhanuzi, usibye umuntu umwe wasigaye, abaririmbyi barashishoje mbere yo kujya mu rugendo ariko kubera ihumure bahabwaga bahamirizwa ko abazataha ari abageni b’Imana byatumye bafata urugendo bashikamye.

Korali Impuhwe mu myiteguro y'igiterane cyo kwibuka abaririmbyi bayo baguye mu mpanuka mu 2002

Ruzindana yakomeje avuga ko Imana yari yababwiye ko iyi mpanuka izatuma Korali imenyekana, ikanakora ivugabutumwa rikomeye.

Yagize ati “Iyi mpanuka ikimara kuba tukabona hari abitabye Imana, abasigaye twagize agahinda ariko twishimira ko Imana yari yateguye ko abataha ari abageni. Aha buri wese yumvaga nawe iyo ataha byari kuba byiza. Aho twari tugiye mu giterane bacyumva ibyatubayeho ako kanya hahise hihana abantu basaga magana atatu.”

Mu kwibuka imyaka 15 ishize, abaririmbyi ba Korali Impuhwe batabarutse, hateguwe igiterane cyo kubazirikana kiri mu mujyo uvuga ngo “Intwari z’Amateka abaririmbyi ba Korali Impuhwe batabarutse tariki ya 27 Nyakanga 2002. ”

Iki giterane cyatumiwemo Korali Mama Jussi yo mu Mujyi wa Moshi mu Majyaruguru ya Tanzania (yamenyekanye mu ndirimbo nka Naona Fahari kutembea na Yesu, Sema Nami, Mungu Wangu, Ninahaja nawe Yesu n’izindi), itsinda ry’abaririmbyi bo muri Kenya n’amakorali akorera umurimo w’Imana muri ADEPR Gisenyi arimo Bethlehem. Kizanagaragaramo abavugabutumwa batandukanye barimo Evangeliste Pascal Barakagira, Rev.Masumbuko Josué n’abandi.

Kizabera kuri ADEPR Gisenyi kuva ku ya 24 kugera ku ya 30 Nyakanga 2017 aho kizasozwa hamurikwa igitabo gikubiyemo amateka ya Korali Impuhwe n’ay’impanuka yahitanye 12 by’umwihariko.

Korali Impuhwe yatangiye umurimo w’Imana mu 1987, icyo gihe yari iy’ishuri ry’icyumweru ariko yubakiye ku isezerano ryo kwaguka mu ivugabutumwa.

Muri Mata 1994, Jenoside yakorewe Abatutsi yatumye Korali icikamo ibice bamwe barahunga abandi baricwa ariko nyuma y’ibi bihe bikomeye u Rwanda rwanyuzemo yongeye kwiyubaka.

Korali Impuhwe imaze imyaka 30 ikora ivugabutumwa rinyuze mu ndirimbo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza