Mafia mu madini! Ibikomere Pasiteri Jean-Désiré wo muri Zion Temple yatewe na bagenzi be (Video)

Yanditswe na Emma-Marie Umurerwa
Kuya 24 Gicurasi 2019 saa 12:16
Yasuwe :
0 0

Ubishatse wamwita Mvuyekure! Kuko ashobora kuba nawe yicara agatera ya korasi yo mu Barokore ivuga iti ‘aho wankuye Mana’. Ni byo koko hari igihe unyura mu bihe bikomeye, ku buryo igihe kigera ukavuga uti rwose si ku bwanjye. Ni ko na Pasiteri Pasiteri Ntawiniga Jean-Désiré Hullet ameze.

Yakuriye mu muryango wifashije kuko se yari Umukozi wa Ambasade ya Leta Zunze Ubumwe za Amerika i Kigali. Usibye kuba bari abatunzi mu by’Isi, bari n’abatunzi mu by’ijuru kuko basengaga cyane, bakanabitoza abana babo ku buryo buri Munsi wa Karindwi nkuko Abadivantisiti babyemera, bajyaga imbere y’Imana, bakayiragiza.

Afite imyaka 43, ariko yose irimo ubuhamya buhambaye. Ni umugabo utarahiriwe n’urushako, umugore wa mbere Imana yaramwisubije bamaranye amazi make bashyingiwe nta n’akana amusigiye kuko yari atwite inda y’amezi atandatu.

Yishumbushije undi bari baramenyanye mu buto, gusa nawe ikinyotera cy’urukundo cyashize mu cyumweru cya mbere, birangira batandukanye. Ubu arasaba Imana ko yasohoza isezerano ryayo ikamushakire undi umukwiye.

Mu minsi irenga ibihumbi 15 amaze ku Isi, yanyuze muri byinshi, ndetse yakoze buri kimwe cyangwa n’Imana n’abantu. Yanyoye ibiyobyabwenge, yarasambaye, yaciye inyuma uwo bashakanye, yarasinze, yafunzwe kubera uburiganya, yambuye abatabarika n’ibindi.

Nyuma y’aho Imana imubatuye ikamwereka inzira ikwiye, yaje kongera kugira intege nke yisanga mu byaha ku buryo asobanura ko arondoye umubare w’abagore baryamanye, hasenyuka ingo nyinshi zo muri Kigali.

Mu buzima bwe kandi, yabanye n’ibikomere yatewe n’abapasiteri bagenzi bakoranaga umurimo w’Imana, byamubereye intandaro yo kugwa, asubira mu businzi n’ubusambanyi yahozemo atarakizwa.

Muri iki gihe ni Umuyobozi Mukuru w’Ikigo “Ladder Leadership Consulting” kigira inama abakora ubucuruzi. Amaze imyaka 16 yakiriye agakiza, ariko mu 2015 hagati aho yaje kugwa, ubu amaze amezi asaga atanu agarutse mu murimo w’Imana.

Mu kiganiro kirekire yagiranye na IGIHE, yavuze byinshi ku buzima bwe. Uko yafungiwe muri Gereza Nkuru ya Kigali azira kwigana isinya y’Umuyobozi Mukuru wa BRD, uko ababyeyi n’abavandimwe be bagiye gutura muri Amerika yibereye mu kabari, yavuye gushyingura umugore we n’umwana asanga yirukanwe mu rusengero, yahawe amasaha 24 ngo abe avuye ku butaka bwa Afurika y’Epfo bigizwemo uruhare na Pasiteri n’ibindi.

Ikiganiro kirambuye

IGIHE: Mu mabyiruka yawe wari umwana umeze ute?

Pasiteri Ntawiniga: Ndi umwana w’imfura iwacu, ariko nari umwana wananiye ababyeyi. Ababyeyi banjye bari bifashije rwose kuko Papa yakoraga muri Ambasade ya Amerika mu Rwanda.

Nakuze ndi wa mwana ugira amanyanga ku buryo najyaga kwikopesha imigati kuri butike kandi mu rugo Mama ayikora, najyaga kwikopesha Sardine kandi mu rugo twatetse inyama.

Iwacu bajyaga bamara kuryama umukozi twari dufite akambyutsa tukajya kurara mu kabari hariya i Nyamirambo tugataha mu gitondo.

Ubu ababyeyi banjye n’abavandimwe baba muri Amerika, ariko umunsi bagendeye njye sinari mpari nari naraye mu kabari, nagiye kubasura bamazeyo imyaka 10.

IGIHE: Bishoboka bite ko umwana wo mu bakirisitu akora ibintu nk’ibyo ?

Pasiteri Ntawiniga: Ntabwo wakwambara umwambaro w’umuntu ukijijwe ngo agakiza kakujyeho, ntabwo agakiza kandura, ni ikintu umuntu yimenyera ku giti cye.

Ababyeyi banjye basengeraga mu Itorero ry’Abadiventiste b’Umunsi wa Karindwi, banyigishije gusenga nubwo nageze aho nkananirana, byinshi mu byo nakoraga ntibanabimenyaga.

IGIHE: Ababyeyi bawe iyo babonaga iyo myitwarire babyifatagamo gute?

Pasiteri Ntawiniga: Umwana umeze gutyo ateza ibibazo, nateje ibibazo byinshi narakubiswe bihagije, mu rugo baransengeye bakabwira n’abantu basenga ngo bansengere birananirana.

IGIHE: Wigeze gufungirwa muri Gereza Nkuru ya Kigali, wari wakoze iki?

Pasiteri Ntawiniga: Nari mfite akazi keza ndi Umucungamutungo muri BRD nahembwaga amafaranga menshi, ariko nari mfite ikibazo cyo kutanyurwa n’ubuzima mbayeho.

Nabagaho ubuzima buhenze cyane butajyanye n’amafaranga nakoreraga binjyana mu madeni, binjyana mu kwambura no mu kubeshya ndafatwa ndafungwa.

Icyo gihe mfatwa nari mfite gahunda yo gutoroka ngo mve mu Rwanda nigire muri Amerika.

Nafunzwe ndegwa kwigana umukono w’Umuyobozi Mukuru wa BRD.

IGIHE: Wari umaze igihe kingana gute ugerageza kwigana umukono we ?

Pasiteri Ntawiniga: Kuva nkiri umwana nari nzi kwigana isinya, ndibuka ko najyaga nigana isinya ya Papa ku buryo iyo mwarimu yabaga yandikiye ababyeyi banjye kubera amakosa nabaga nakoze, nafataga ikayi nkandikira mwarimu mu mukono wa Papa narangiza ngasinya mu izina rya Papa.

Ntabwo nari nziko bizankurikirana bikageza ubwo bimfungisha. Ikindi nazize kwari ugutanga amasheki (chèque) zitazigamiye.

Ayo mafaranga yose yagendaga mu nzoga no mu bakobwa, kuko buri munsi nabaga mfite nk’umukobwa umwe iwanjye kandi ntabwo yagenderagaho, yararyaga, yaranywaga.

Pasiteri Jean-Désiré wo muri Zion Temple yavuze ku bikomere yatewe na bagenzi be mu murimo w'Imana

IGIHE: Waje kwakira agakiza gute?

Pasiteri Ntawiniga: Mu 2003 mfunzwe nibwo nakiriye agakiza, ubusanzwe njye ibintu by’abarokore narabyangaga cyane Yesu Kristo ubwe niwe wanyisangiye.

Mfunguwe rero naje ndi umuntu mushya, nshaka kwibera mu rusengero. Nakoze umurimo w’Imana mbwiriza ubutumwa bwiza. Najyaga mbwiriza mu muhanda, nkabwiriza mu modoka zitwara abagenzi, nari mfite umuhamagaro ukomeye ndi icyaremwe gishya.

IGIHE: Urugendo rwawe mu barokore rwari rwifashe gute?

Pasiteri Ntawiniga: Nagiye mu Itorero rya Zion Temple mu 2004 ari Imana inyoherejeyo, abayobozi b’Itorero babona umuhamagaro wanjye baransengera mba Pasiteri mu mwaka wa 2011.

Nabaye Pasiteri mu 2011, ariko bari barabanje kunyohereza kujya kuba Pasiteri wungirije mu Itorero rya Zion Tempe i Butare, icyo gihe itorero ryari rifite ibibazo, pasiteri mukuru ntiyumvikanaga na pasiteri wari umwungirije byari ibibazo bikomeye.

Naje kugira ibyago umugore wanjye Anita Niyuhire twari tumaranye amezi icyenda yicwa n’impanuka yabereye i Burundi, atwite umwana wacu w’imfura.

Pasiteri mukuru twakoranaga ntiyari yarigeze aza kudusura kuva twagera i Butare, umugore wanjye n’umwana bamaze gupfa nabwo ntiyigeze adusura.

IGIHE: Nyuma y’ibyo byago, ubuzima bw’iyogezabutumwa bwakomeje gute? Ntabwo wigeze ucika intege?

Pasiteri Ntawiniga: Nyuma yo gushyingura umugore wanjye i Burundi kuko niho impanuka yebereye, nagarutse ku murimo w’Imana ngiye gufungura ibiro nakoreragamo ku itorero, umunyamabanga wacu arambwira ati pasiteri mukuru yahinduye iserire yaravuze ngo umurimo wari ufite aha wararangiye uzasubire ku bakohereje.

Nagize agahinda gakomeye, ndavuga nti mfushije umugore uyu niwe wakampumurije none aranyirukanye?

IGIHE: Nibwo wahise uva mu gakiza?

Pasiteri Ntawiniga: Nkunda kubibwira abantu ngo iyo uri umukirisitu usanzwe ukajya mu itorero ugasenga ukitahira burya ni byiza ntujye mu bintu by’ubuyobozi. Kuko ninjiye mu buyobozi mbona ibintu ntigeze mbona, nkavuga nti ese burya ba bantu babwiriza baba mu bintu bimeze gutya?

IGIHE: Zion Temple yagufashije iki muri icyo gihe?

Pasiteri Ntawiniga: Ubuyobozi bwa Zion Temple bwahise bunyohereza kwiga muri Afurika y’Epfo gukomeza amasomo aho nari narize tewolojiya.

Ngezeyo barankunda, baranyishimira bangirira umuyobozi w’abanyeshuri, bampa n’akazi ndigisha […] Iryo torero ryari riyobowe n’abazungu naryo nasanze ririmo ibibazo, uwariyoboraga yaravugaga bose bagaceceka ntihagire utinyuka kumubaza ati ibi ukora nibiki?

Kubera kwa kutihanganira amafuti kwanjye natangiye kujya mubwiza ukuri ku byo nabonaga bitari byiza akora, maze aranyanga kugeza ubwo yampaye amasaha 24 ngo mbe mvuye muri icyo gihugu, yanyirukanye mu masaha y’ijoro, mu mbeho ikomeye yanga ko mfata n’ikote ryanjye ngo nifubike.

Singiye kukubeshya buriya abakozi b’Imana biriya bibazo byo gucikamo ibice mu matorero harimo ibinyoma byinshi, harimo intambara zirenze n’iza politike harimo mafia. Njye rero ukuntu navutse mvuga ibintu uko biri.

IGIHE: Wakomoje ku bibazo bibera mu madini, ndakeka icyo cyari icya ikindi uhuye nacyo nyuma yo kwirukanwa.

Pasiteri Ntawiniga: Mu bakozi b’Imana habamo intambara zirenze iziba mu banyapolitike […] ubwo naraje ngeze mu Rwanda nsanga mu Itorero rya Zion Temple harimo bya bibazo byose mwagiye mwumva byabaye mu 2015. Naravuze nti ibi ni ibiki?

Ibintu byatumye nyerera nkagwa ni ibikomere, nari nsigaye njya mu rusengero simfashwe bigeze muri Kamena 2015 mbwira Imana nti mbivuyemo.

Ndavuga nti ndasubira mu byo nahozemo, ndasubira mu nzoga kandi ninzinywa nzazinywera ku mugaragaro. Ubupasiteri mbutereka hasi kuko nari nzinutswe.

Sinari kuba muri ubwo buzima ngo nkomeze no kujya gusenga, ntabwo nabivanga, ntabwo nabishobora kuko burya iyo ubaye gutyo nibura Imana iba izi aho ubarizwa.

IGIHE: Nyuma yo gupfusha umugore waba wongeye gushaka?

Pasiteri Ntawiniga: Narongeye ndashaka, umukobwa wabaga muri Canada, ariko twari dusanzwe tuziranye na cya gihe mfunzwe yaransuye. Mu 2014 nibwo twakoze ubukwe, ariko muhisha ibikomere nari mfite by’itorero. Twakoze ubukwe ntagisenga, nari nsigaye nsenga ku cyumweru ngezaho nabyo ndabireka.

Urugo rwanjye rwapfuye mu cyumweru cya mbere cy’ubukwe kuko naho nagiriyemo ibikomere mbihisha madamu, ankomeretsa nawe atabizi bituma muzinukwa.

Nashidutse ntakimukunda nkuko namukundaga, yoherezaga impapuro ngo njye muri Canada ngataha nasinze nkazica, naziciye inshuro enye, ubwo ni imyaka ine. Nagiye mu nzoga nyinshi, njya mu busambanyi bwinshi cyane.

Muri ibyo bibazo byose nta mupasiteri n’umwe wanshatse, washaka intama yazimiye gute se kandi muri mu matiku? Abanyitayeho ni abo ntacyekaga.

Nyuma yo gukora ubukwe umugore wanjye yasubiye kuba muri Canada, yaje kugaruka nyuma arambwira ati bambwiye ko wanciye inyuma n’abagore benshi? Ndamubwira nti yaba umwe, baba ijana wowe emera ko naguciye inyuma kandi ndagusaba imbabazi. Nabimubwiye nshaka kumwikiza kuko numvaga twatandukana. Gatanya bayiduhaye umwaka ushize mu kwezi kwa munani.

IGIHE: Wanyuzemo mu bihe bitoroshye. Ukura he imbaraga zo gutanga ubuhamya nk’ubu?

Pasiteri Ntawiniga: Twese turacyubakwa nta muntu wajya hariya ngo avuge ngo we byararangiye Imana yamaze gusiga amarangi, oya twese turi inzu icyubakwa.

Ikibazo rero abantu bagira ni uko abapasiteri bamwe batigaragaza uko bari bigatuma abantu bibwira ko ari abantu batajya bakora ibyaha. Have have barabikora ahubwo ni uko batajya babyatura.

Kubaho mu kinyoma biravuna, iyo utabaye wowe ntubohoka kandi ntunakira. Hari abantu bazi ko nugera mu rusengero wibombarika, wagera hanze ukaba undi muntu.

Iyo rero ufite amasura abiri n’imbere y’Imana uba uri “fake” numva njye kubaho mu kuri aribyo byoroshye, kubaho mu kinyoma nibyo bihenze.

Mu mpera za 2018 nibwo Pasiteri Ntawiniga yongeye kwakira agakiza, agaruka mu murimo w’Imana abifashijwemo n’umuntu w’inshuti ye.

Avuga ko Yesu ariwe wongeye kumusanga, amuvura ibikomere byose yari afite, ko atagomba kureba abantu.

Ati "Yambwiye ko ntagomba kureba abana b’abantu kuko ariwe wenyine wanyitoranyirije, kandi ko ubu igihe cyanjye cyo gukora nyagukora aribwo kigeze. Arusha niho yampereye imbaraga zo kuva mu bibi byose nari ndimo, ngaruka abampemukiye bose narabababariye, abo nahemukiye cyangwa nakomerekeje nanjye mbasabye imbabazi."

Mafia mu madini! Ibikomere Pasiteri Jean-Désiré yatewe na bagenzi be

Yiganye isinya y’umuyobozi wa banki | Gusambana buri joro| Urumogi – Ubuhamya bwa Pasiteri Désiré

Video: Salomo George}

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza