Mashukano yahishuye uko yasenze asaba Imana kuzura umufasha we n’iyerekwa ry’aho yagiye (Amafoto)

Yanditswe na Ishimwe Israel
Kuya 17 Kamena 2017 saa 06:45
Yasuwe :
0 0

Mashukano Eric uyobora Moriah Entertainment Group, yahishuye uko yakiriye inkuru y’incamugongo y’urupfu rw’umugore we Monique Tambo n’uburyo yamusengeye iminsi itatu asaba Imana kumuzura.

Yabivuze mu muhango wo kumusezeraho bwa nyuma wabaye kuri uyu wa Gatandatu, tariki ya 17 Kamena 2017.

Tambo wari inshuti y’akadasohoka y’abahanzi yitabye Imana mu rukerera rwo kuwa 12 Kamena azize urupfu rutunguranye. Yasize abana babiri barimo uwo yibarutse mu mwaka washize wari ukiri uruhinja.

Uyu munsi nibwo yaherekejwe mu muhango witabiriwe n’umuryango we n’uwa Mashukano; abahanzi nka Patient Bizimana, Aimé Uwimana, Pastor Gaby, Luc Buntu, Azaph Worship Team, Guy Badibanga, Tonzi, Gaby Kamanzi, Eddie Mico; abagize itsinda rya Groove Awards muri Kenya no mu Rwanda n’abavugabutumwa bakoranye umurimo w’Imana. Yasezeweho mu rusengero rwa Zion Temple mu Gatenga ahavugiwe bimwe mu bikorwa byamuranze birimo kwitangira no gukunda umurimo yari yarahamagariwe.

Mu ijambo rya Eric Mashukano yagaragaje uko yagowe no kwakira inkuru ibabaje yo gutandukana n’umugore we yari yarihebeye.

Yagize ati “Ikintu cyankomeje muri ibi bihe ni uko nasobanukiwe ko kwegera Imana mu makuba bitanga amahoro. Mu bihe bigoye nari ndimo nagombaga kuganira n’Imana ndi njyenyine. Navuye mu rugo njya gushaka Imana kandi byampaye imbaraga. Nafashe iminsi itatu nsenga nsaba Imana kumuzura ariko ntabwo yagarutse. Nasabye Imana kumpa icyerekezo cy’uburyo nzitwara mu buzima bwanjye njyenyine kandi narasubijwe niyo mpamvu mpagaze imbere yanyu nshikamye.”

Mashukano yagarutse ku magambo yari yiganje mu isengesho rye asaba Imana kumuha hafi muri ibi bihe.

Ati “Nabajije Imana nti ‘ko ari wowe wamumpaye ukampa n’amasezerano tugomba gusangira, ni kuki uhisemo ko agenda akansiga?’ Ni gute wamwisubije. Kuki wemeye ko nywera kuri iki gikombe gisharira? Kuba Yesu yarakinywereyeho nta mpamvu yuko nanjye nagombaga kukinyweraho kandi byose yarabirangirije ku musaraba.”

Yahamije ko umugore we yagiye mu ijuru

Mashukano yashimye Imana yamushoboje guhagarara nyuma y’icyumweru cyose ndetse avuga ko hari abari batangiye kugira ubwoba ko na we ashobora kwitaba Imana.

Ati “Imana yarambwiye ngo nakunze Monique kurusha undi wese ku isi yaba wowe n’abo mu muryango we, ni njye wamwitwariye. Mwese nabarushije kumukunda. Ku bw’urwo rukundo byabaye ngombwa ko mujyana ngo ntazamutakaza.”

Yahishuye umunezero yari amaranye igihe n’abantu benshi bikabatangaza kugera n’aho yemeye kwitwa umusazi kubera igihe yafataga cyo kwegerana n’Imana.

Ati “ Yari yarahindutse (Monique) cyane, yegeraga Imana ku kigero kirenga 120%. Imana yarambwiye iti igihe wamaranye na we ntuzagitakaze, abana yagusigiye uzabiteho. Ibyo bimpa imbaraga, umunezero, ko mu ijuru hari umuntu wanjye. Ni ishema rikomeye ko nabanye n’umuntu wabonye iherezo ryiza. Ubu tugiye guherekeza umubiri, ariko umuntu muzima ari ahera h’Imana. Ibyo mbabwira ni ko kuri nabonye. Mwishime kuko yagiye ahantu heza, ku wamuhamagaye, kandi nanjye uwo niwe unkomeje uyu munsi kandi azabikomeza.”

Mashukano na Monique Tambo bari bamaranye imyaka itanu, urugo rwabo rwaranzwe no ‘kugira urugwiro, guca bugufi, gufasha no guharanira icyateza imbere muzika nyarwanda ihimbaza Imana’.

Yagarutse ku rukundo rwabo avuga ko “Kuba umugore wanjye yarasohokaga aseka afite akanyamuneza byaturukaga ku isoko y’ibyishimo yari mu rugo rwacu.”

Tambo Monique yashyinguwe mu irimbi rya Rusororo mu Mujyi wa Kigali.

Eric Mashukano (ufite ifoto) yahamije uko yeretswe ko umugore we ari ahera h’Imana
Abo mu muryango wa Tambo n'abo bakoranye umurimo w'Imana bamusezeraho bwa nyuma
Producer Pastor P (iburyo) ari mu bacuranze mu rusengero mu muhango wo gusezera Tambo muri Zion Temple mu Gatenga
Amanda Fung, umugore wa Olivier Kavutse banaririmbana muri Beauty for Ashes na we yatabaye Eric Mashukano
Eric Mashukano n'abana babiri yasigiwe na Tambo Monique
Eric Mashukano yatangaje uko yabwiwe n'Imana ko ariyo yahamagaye umugore we
Eric Mashukano yafatanyije n'abaririmbyi guhimbaza Imana
Umubyeyi wa Eric Mashukano
Umurambo wa Monique Tambo ubwo wagezwaga ku irimbi rya Rusororo
Abahanzi batandukanye barimo Tonzi (ibumoso), Patient Bizimana na Kayitana Janvier mu ndirimbo iherekeza nyakwigendera Tambo Monique
Umubyeyi wa Monique yagarutse ku mateka n'ubuhamya byamuranze mu buzima bwe
Abantu b'ingeri zitandukanye bagiye gufata mu mugongo Eric Mashukano
Eric Mashukano mu muhango wo gushyingura umugore we witabye Imana azize urupfu rutunguranye
Uhereye iburyo: Abahanzi barimo Patient Bizimana, Gaby Kamanzi, Aimé Uwimana, Tonzi na Dominique Nic ku ruhande bashyira indabo ku mva ya Monique Tambo
Pasiteri Barbara Umuhoza; Flory Nzabakira ushinzwe urubyiruko muri Zion Temple, Olivier Roy na Issa Kalinijabo (inyuma) bakorana kuri Radio Authentic baha icyubahiro nyakwigendera
Abahanzi Diana Kamugisha (ibumoso) na Gogo mu baherekeje Monique Tambo
Eric Mashukano yashimangiye ko yari amaranye na Monique Tambo imyaka itanu, bakundana bihebuje

Amafoto: Rwandamagazine.com


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza