Pasiteri Gapusi agiye kwibukwa hanamurikwa igitabo cyanditswe n’abahanga ku buzima bwe

Yanditswe na Ishimwe Israel
Kuya 7 Nzeri 2017 saa 06:52
Yasuwe :
0 0

Umwaka urashize Pasiteri Rwihaniza Gapusi Jean, wahoze abarizwa mu Itorero rya ADEPR mu Rwanda yitabye Imana azize uburwayi.

Inkuru y’urupfu rwa Pasiteri Gapusi waguye muri Amerika ku ya 10 Nzeri 2016, yashenguye abo mu muryango we, abo bakoranye n’abo biganye, abakirisitu yabereye umushumba n’imfubyi yafashije akiriho.

Ababanye na we bavuga ko ubuzima bwe bwaranzwe no kwicisha bugufi ku buryo banabishingiyeho bigatuma abo yabereye inkoramutima n’umuryango we bafata icyemezo cyo kwandika igitabo ku buzima bwe n’umurage yasize bishobora kubera benshi icyitegererezo.

Iki gitabo kizamurikwa ku mugaragaro ku wa Gatandatu, tariki ya 9 Nzeri 2017 i Huye no ku ya 10 Nzeri kuri Dove Hotel Gisozi saa munani, kizahurirana no kwibuka umwaka ushize Pasiteri Gapusi yitabye Imana.

Ubuhamya bugikubiyemo bwakusanyijwe n’abanditsi barimo Jonas Munyurangabo, muramu wa nyakwigendera, Antoine Munyarugo, Deo Musafiri Mujiji n’abandi. Itsinda ry’ubwanditsi riyobowe na Dr Jean de Dieu Basabose na Pasiteri Dr Siméon Sebatukura.

Pasiteri Gapusi yasengeraga mu Itorero rya ADEPR

Mu bagize uruhare mu kugikosora harimo Dr Mugabe Jonas n’Umuvugabutumwa uzwi muri ADEPR Nyarugenge mu materaniro y’abakoresha indimi z’amahanga, Dr Kigabo Thomas.

Uyu muhango uzahurirana n’itangizwa ry’Umuryango witiriwe Gapusi “Gapusi Great Legacy Foundation-GGLF”ugamije gusigasira umurage we ukazibanda cyane ku guhindurira abantu kuba abakirisitu bafite indangagaciro z’ukuri, bakora imirimo myiza y’urukundo ndetse bakanita ku bidukikije.

Amateka avunaguye ya Pasiteri Gapusi Jean

Pasiteri Gapusi yavutse ku ya 10 Ukwakira 1961 yitaba Imana ku ya 10 Nzeri 2016 aguye muri Leta Zunze Ubumwe za Amerika. Yashakanye na Nyiramitavu Odia babyaranye abana 11, abahungu barindwi n’abakowa bane. Abamukomokaho bose ni 17.

Yize icyiciro cya Gatatu cya Kaminuza muri Kaminuza ya Uppsala muri Suède mu Ishami ryo Kubungabunga Urusobe rw’Ibinyabuzima (Biodiversity Conservation). Yari umuhanga cyane mu bigendanye n’urusobe rw’ibinyabuzima, guteza imbere amashyamba no kurengera ibidukikije.

Yabaye Umwarimu mu mashuri yisumbuye na za Kaminuza. Yabaye Umushakashatsi mu bigo bitandukanye nk’Ikigo cy’Ubushakashatsi mu by’ Ubuhanga n’Ikoranabuhanga (IRST), Ikigo cy’Igihugu cy’Ubushakashatsi mu by’Ubuhinzi (ISAR) n’Ikigo cy’Igihugu gishinzwe guteza Imbere Ubuhinzi n’Ubworozi (RAB) aho yanditse ibitabo birenga 30.

Yahagarariye igihugu mu nama n’ibigo mpuzamahanga nka ASARECA (Association for Strengthening Agricultural Research in Eastern and Central Africa) na OECD, CBD, Nagoya Protocal n’ibindi. Yabaye Umuyobozi wa Porogramu muri ASARECA ahagarariye ibihugu umunani muri 11 bya Afurika bigize ASARECA.

Yafashije abapfakazi n’abandi batishoboye, yareze imfubyi nyinshi anazifasha gushinga izabo ngo aho yananditse imishinga ifasha abatishoboye kwiteza imbere.

Pasiteri Gapusi afatwa nk’umukirisitu w’ukuri, wakundaga gusenga, kuririmba, gucuranga, kwigisha no gushyira mu bikorwa ijambo ry’Imana yaranzwe n’urukundo rutavangura.

Yahawe inshingano nyinshi mu Itorero aho yanabaye Umushumba wa ADEPR Cyarwa i Huye; yashinze anayobora Chorale Evangelique yanahimbiye indirimbo nyinshi zihimbaza Imana zakunzwe. Pasiteri Gapusi yanashinze izindi korali zirimo Ebenezer na Revival.

Pasiteri Gapusi agiye kwibukwa hanamurikwa igitabo cyanditswe n’abahanga ku buzima bwe
Pasiteri Gapusi yabayeho mu buzima bwo kwicisha bugufi no gufasha abababaye
Pasiteri Gapusi yize muri Kaminuza ya Uppsala muri Suède mu Ishami ryo Kubungabunga Urusobe rw’Ibinyabuzima
Gapusi yakoze mu bigo birimo IRST, ISAR na RAB aho yanditse ibitabo bitandukanye
Yari n'umucuranzi w'umuhanga

Umva indirimbo Umuhanzi Janvier Muhoza n’inshuti ze bahimbye igaruka ku buhamya bw’ubuzima bwa Pasiteri Gapusi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza