Uko Patient Bizimana yatunguye umubyeyi we bakaririmbana indirimbo yo mu buto bwe (Video)

Yanditswe na Dusabimana Aimable
Kuya 18 Mata 2017 saa 01:22
Yasuwe :
0 0

Umuramyi Patient Bizimana yatunguye umubyeyi we mu gitaramo cya ’Easter Celebration’ amusaba ko baririmbana indirimbo ikunze gukoreshwa muri Kiliziya Gatolika yajyaga amwigisha mu buto bwe, bitungura imbaga y’abasaga ibihumbi bitanu bacyitabiriye.

Ni igikorwa cyakoze benshi ku mutima bitewe n’amagambo asize umunyu uyu musaza witwa Munyaribanje Leonard yaseguje ubutumwa mu gitaramo cy’umuhungu we cyitabiriwe n’abahanzi bo mu Rwanda barimo Papy Clever, itsinda ryitwa Shinning Stars ndetse n’abaturutse hanze y’igihugu barimo Apotre Habonimana Apollinaire wo mu Burundi na Marion Shako wo muri Kenya.

Igitaramo kigana ku musozo Patient Bizimana yafashe umwanya wo gushimira abitabiriye igitaramo cye n’abamufashije mu migendekere yacyo myiza, ntiyajijinganya no guhamiriza imbaga y’abakirisitu bitabiriye ko impano yo kuramya no guhimbaza Imana akoresheje indirimbo ayikomora ku mubyeyi we.

Yagize ati "Impano nayikomoye kuri Papa, nakuze numva Papa aririmba, hari uturirimbo yakundaga kuririmba mu gitondo mu rugo."

Yarakomeje ati "Papa, ndashaka kugutungura, ntabwo twabyumvikanyeho ariko ntakundi, ushobora kuza imbere."

Akigera imbere yamusabye ko baririmbana indirimbo yajyaga amwigisha acyiga mu mashuri abanza ahagana mu 1996.

Ni indirimbo ikunze gukoreshwa n’abasengera muri Kiliziya Gatorika, inyikirizo yayo igira iti: “Niba Uhoraho ari amahoro yawe, niba Uhoraho ari ibyishimo byawe, komeza inzira watangiye, wicika intege, wahisemo neza, Nyagasani muri kumwe”.

Se wa Patient yayiririmbye, avuga ko kera yajyaga ayiririmbira umuhungu we amusaba kwikomeza ku Mana ndetse no kuyisaba imbabazi igihe yateshutse.

Mu gice cyayo cya kabiri hanumvikanamo ubutumwa bugaruka ku munsi wa Pasika wizihizwaga muri iki gitaramo cya ’Easter Celebration’.

Nyuma y’iyi ndirimbo Se wa Bizimana yamushimiye uko abana n’abandi neza ndetse n’uburyo yakomeje gukurikira Nyagasani, ahita avuga ko amuhaye inyana y’ishashi.

Mu kiganiro IGIHE yagiranye n’uyu musaza ubyara Patient Bizimana nyuma y’iki gitaramo, yagize ati "Uriya mwana yabatijwe muri Kiliziya Gatolika, naramwigishije yabibabwiye, nyuma yagiye mu barokore ariko akambwira ati ’Iyo nzira wanyigishije ntabwo nzayibagirwa’ nzakomeza ndirimbire Nyagasani ariko ntabwo nzibagirwa idini nabatirijwemo ndetse n’uko wantoje gukunda Imana."

Munyaribanje Leonard afite imyaka 71, asanzwe ari umuririmbyi muri korali Saint Thérèse ibarizwa muri kiliziya Gatolika aho asengera na nyina w’uyu muririmbyi.

Patient Bizimana yatangiye kuririmba muri Korali La Voix des Anges yo mu Mujyi wa Rubavu mu 2000. Kuva icyo gihe yatangiye kwiga gucuranga ibikoresho bya muzika binyuranye. Muri 2008 yahisemo kuririmba ku giti cye atangirira ku ndirimbo ’Andyohera’. Nyuma gato akiba i Rubavu ashyira hanze album ya mbere yise ’Ikime cy’Igitondo’, atangira kumenyekana ubwo.

Muri iki gihe Patient Bizimana akunzwe bidasanzwe mu ndirimbo ze nka ‘Iyo neza’, ‘Amagambo yanjye’, ‘Menye neza’ n’izindi.

Inkuru bifitanye isano: Byari ibyishimo bisa ku magana y’abitabiriye igitaramo cya Patient Bizimana (Amafoto)

Munyaribanje Leonard ubyara Patient Bizimana yasusurukije abitabiriye igitaramo cya Easter Celebration abaririmbira
Ababyeyi ba Patient Bizimana bizihije Pasika mu gitaramo gikomeye cyateguwe n'umwana wabo
Abenshi bahembukiye muri iki gitaramo ngarukamwaka gitegurwa n'umuramyi Patient Bizimana
Iki gitaramo cyitabiriwe n'abasaga ibihumbi bitanu cyabereye muri Radisson Blu
Ifoto y'ubuhanga yafashwe n'umufotozi wa IGIHE yerekana Patient Bizimana n'abacuranzi be imbere y'abafana

Amafoto: Niyonzima Moses


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244