Umushumba w’Abangilikani ku Isi azatangiza inyubako y’iri dini i Gahini

Yanditswe na Mukaneza M.Ange
Kuya 16 Gashyantare 2017 saa 08:42
Yasuwe :
2 0

Umushumba wa Cantebury mu Bwongereza akaba ari nawe Musenyeri Mukuru mu itorero ry’Abangilikani ku Isi, Justin Welby ategerejwe mu Rwanda aho azaba aje gushyira ibuye ry’ifatizo ahazubakwa cathedral igezweho i Gahini mu Karere ka Kayonza.

Iyi cathedral izaba irimo n’igice cyagenewe ubukerarugendo bushingiye ku iyobokamana, yitezweho kurushaho kumenyekanisha Diyoseze ya Gahini, isanzwe izwiho kuba ari ivuko ry’Itorero ry’Abangilikani mu Karere k’Ibiyaga bigari.

Itangazo ryatanzwe n’Ubunyamabanga bw’itorero ry’Abangilikani mu Rwanda rivuga ko Musenyeri Welby azaba ari mu Rwanda kuva ku itariki ya 18-21 Gashyantare 2017.

Mu kiganiro na The New Times, Umunyamabanga wa Diyoseze, Rev. Manasseh Gahima, yavuze ko azagera mu Rwanda ku wa gatandatu aho azahita yerekeza i Gahini, agashyira ibuye ry’ifatizo ahazubakwa ‘East African Revival Heritage Centre’.

Ati “Ubwo aheruka mu Rwanda, Musenyeri wa Canterbury yasabwe na Musenyeri w’u Rwanda kuzagaruka. Kuva icyo gihe twari tumutegereje; kuri twe b’i Gahini n’iby’agaciro, kuko bihuriranye no gutangiza inyubako ya Cathedral nshya n’ibindi bikorwaremezo, na gahunda y’ubukerarugendo bushingiye ku iyobokamana.”

Amateka agaragaza ko itorero ry’Abangilikani ryageze mu Rwanda mu 1925, rihereye i Gahini. Mu 1936 andi yatangiye kuvuka muri Uganda, Burundi, Kenya na Repubulika Iharanira Demokarasi ya Congo na Australia.

Gahima ati “Kubaka ibikorwaremezo by’ubukerarugendo bushingiye ku iyobokamana ni uguha abantu amahirwe yo kwiga amateka y’aha hantu ndetse no kwibonera n’amaso yabo amateka bari barasomye mu bitabo.

Gahima yakomeje avuga ko Welby umaze kugera mu Rwanda inshuro ebyiri ariko yerekeza mu bindi bihugu, ubu azamara iminsi ine ndetse akazifatanya n’abakirisitu ba Paruwasi ya Kibagabaga mu materaniro yo ku cyumweru. Azanasura kandi ishuri rya Kigali Anglican Theological College.

Biteganyijwe ko iyi Cathedral igezweho ya Gahini izuzura itwaye miliyari ebyiri z’amafaranga y’u Rwanda, ikazaba ifite ubushobozi bwo kwakira abantu barenga 2000.

Umushumba wa Cantebury mu Bwongereza ni nawe Musenyeri Mukuru mu itorero ry’Abangilikani ku Isi, Justin Welby

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244