Uwera Sarah uri mu kwa buki yaherekeje Korali Ambassadors yerekeje muri Amerika (Amafoto)

Yanditswe na Dusabimana Aimable
Kuya 1 Kanama 2018 saa 11:01
Yasuwe :
1 0

Abaririmbyi bagize Korali Ambassadors of Christ yo mu Itorero ry’Abadivantisti b’umunsi wa karindwi, berekeje muri Leta Zunze Ubumwe za Amerika aho bazakorera ibitaramo bitandukanye.

Iyi korali yahagurutse i Kigali saa kumi n’ebyiri z’umugoroba wo kuri uyu wa Gatatu, tariki 1 Kanama 2018. Benshi mu baririmbyi baherekejwe n’inshuti n’imiryango ibasezeraho mu rugendo bagiyemo ruzamaramo iminsi 20.

Ibitaramo bazakora bizabera mu mijyi itandukanye ya Dallas na Houston muri Leta ya Texas. Mu gihe bazamara muri Leta Zunze Ubumwe za Amerika, abagize Ambassadors of Christ bazavayo bataramiye muri Mount Zion Fellowship ndetse no mu rusengero rukomeye rwa Ashford Community Church. Igitaramo cya mbere bazagikora ku wa 4 Kanama mu gihe igiheruka ibindi kizaba ku wa 18 Kanama 2018.

Mu kiganiro na Nsanzimana Eliezel, umwe mu bahagurutse i Kigali berekeza muri Amerika, yavuze ko bajyanyweyo no kwamamaza ubutumwa bw’Imana ndetse bari bamaze igihe kirekire mu myiteguro, bizeye kunyura abo bazasangayo mu ndirimbo zibohora.

Yagize ati “Turiteguye, twakoze imyiteguro ihagije, nta gisigaye uretse kwamamaza ubutumwa bwiza. Ubw’umwihariko tubashyiriye ni ukubaha inkuru zibohora kuko Amerika hariyo abantu benshi bakunda Ambassadors, aya ni amahirwe yo kugira ngo bayibone amaso ku maso kuko ifasha benshi, biteguraho cyane ko bishimira iyi korali.”

Mu baherekeje aba baririmbyi bari benshi harimo na mugenzi wabo Uwera Sarah Sanyu uzwi cyane muri Ambassadors of Christ kubera ijwi rye ryuje ubuhanga kandi rikundwa n’abatari bake bafashwa n’indirimbo z’iyi Korali, uririmbana na musaza we Nelson Manzi uri mu berekeje muri Leta Zunze Ubumwe za Amerika.

Uwera Sarah wari ugaragiwe na Kayumba Aimé bamaze iminsi barushinze, yagaragazaga akanyamuneza asezera kuri bagenzi be n’impungenge z’urukumbuzi akabagwa mu nda bose, ubwo yari abaherekeje akabageza ku Kibuga Mpuzamahanga cy’indege cya Kigali, i Kanombe.

Yavuze ko nyuma yo kurushinga bameze neza ashimangira ko yumvaga ari iby’igiciro guherekeza bagenzi be basanzwe baririmbana muri Ambassadors of Christ.

Yagize ati “Mbyakiriye neza, numvaga ari inshingano zanjye kuba nabaherekeza nk’abavandimwe, inshuti zanjye twakoranye uyu murimo kandi tugikomeje kuwukorana. Ku bw’ibyo nagombaga kubashyigikira kugira ngo mbifurize urugendo rwiza. Nabyishimiye kuba bateye iyi ntambwe yo kujya hanze ya Afurika kujya kubwiriza ubutumwa bw’Imana.”

Korali Ambassadors of Christ yaherukaga gushyingira Uwera Sanyu Sarah wasezeranye n’umukunzi we Kayumba Aimé ku Cyumweru, tariki 29 Nyakanga 2018, mu Rusengero rw’Abadiventisiti rwa Kigali English Church ruri i Kibagabaga.

Korali Ambassadors of Christ yavutse mu mwaka wa 1995, yatangijwe n’abantu batanu ariko kugeza ubu ifite abaririmbyi barenga 40. Mu myaka 23 imaze ibayeho ifite album z’amajwi (Audio) 13 ndetse n’iz’amashusho (DVD) 12. Yakoreye ibitaramo mu bihugu bitandukanye birimo Tanzania, Kenya u Burundi, Uganda, Congo na Zambia.

Sarah Sanyu [waherekeje abandi baririmbyi] yamenyekanye cyane atera mu ndirimbo zirimo “Birakwiye gushima”, “Yesu we” n’izindi_ yatangiye kuririmba muri Ambassadors of Christ mu mpera za 2006 akiga mu mashuri yisumbuye
Uwera Sarah asezera kuri musaza we Nelson Manzi uri mu baririmbyi berekeje muri Leta Zunze Ubumwe za Amerika
Bamwe mu bagize Ambassadors of Christ berekeje muri Amerika n'ababaherekeje
Bamwe mu baherekeje abaririmbyi barimo na Uwera Sarah umaze iminsi arushinze

Amafoto: Niyonzima Moses

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza