Agaseke Gisubizo Ministries ihishiye abazitabira igitaramo yahurijemo korali zikomeye i Kigali

Yanditswe na IGIHE
Kuya 23 Gicurasi 2019 saa 09:36
Yasuwe :
0 0

Itsinda rya Gisubizo Ministries rimaze kwamamara mu ndirimbo zo kuramya no guhimbaza Imana mu Rwanda no mu Karere ka Afurika y’Uburasirazuba yatumiye Healing Worship Team na Alarm Ministries mu gitaramo gikomeye rigiye gukorera i Kigali.

Iki gitaramo gitegerezanyijwe amatsiko n’abihebeye umuziki uhembura ubugingo, ugasubiza intege mu bacogoye mu rugendo rugana i Siyoni cyiswe ‘Worship Legacy Season 2’. Kizabera mu Intare Conference Arena i Rusororo kuva saa Cyenda zo ku wa 26 Gicurasi 2019.

Gisubizo Ministries yagitumiyemo andi matsinda arimo Healing Worship Team, Alarm Ministries na Shekinah yo muri Evangelical Restoration Church (ERC) iyoborwa na Apôtre Ndagijimana Joshua Masasu.

Izanafatanya n’abahanzi barimo Bosco Nshuti uri mu bafite igikundiro muri ADEPR n’itsinda rya Rugarama James n’umugore we Daniella rigezweho mu ndirimbo ‘Mpa amavuta’.

Uretse indirimbo zicengera mu misokoro, zigashyira benshi mu nzira igana muri cya gihugu cy’amata n’ubuki, abazitabira igitaramo bazanasangizwa ijambo ry’Imana n’Umuvugabutumwa, Pasiteri Senga Emmanuel wo muri Eglise Vivante.

Gisubizo Ministries irarimbanyije mu myiteguro aho iri kunoza imiririmbire n’izindi gahunda zizatuma isangiza abakunzi bayo ubutumwa butomoye, buherekejwe n’umuziki unyura amatwi.

Mu kiganiro na IGIHE, Umuyobozi wungirije wa Gisubizo Ministries, Runyambo Eddy, yavuze ko biteguye kwishimana no gutaramana n’abakunzi babno.

Yagize ati “Turashima Imana ko imyiteguro iri kugenda neza. Ubu turi kwitegura mu buryo bwo kugorora amajwi ariko n’ibindi byose bijyanye n’imyiteguro biri kuri gahunda. Turifuza kuzataramana n’abakunzi bacu n’ab’ibihangano bihembura imitima, bagataha banyuzwe.’’

Gisubizo Ministries yamenyekanye cyane mu ndirimbo zirimo “Amfitiye byinshi”, “Mana uriho”, “Ndaguhetse ku Mugongo”, “Narababariwe” n’izindi. Muri Gicurasi 2019 yashyize ahabona indirimbo nshya yise “Hallelluya.”

Mu 2018 nibwo iri tsinda ryatangije uruhererekane rw’ibitaramo ‘Worship Legacy’. Icya mbere ryagikoreye muri Christian Life Assembly (CLA) i Nyarutarama muri Gicurasi mu gihe album y’indirimbo 12 z’amashusho yagifatiwemo ryayimurikiye muri Serena Hotel ku wa 2 Ukuboza 2018.

Muri ‘Worship Legacy Season 2’, Gisubizo nabwo izafata amashusho azasohoka kuri album iteganya kumurikira abakunzi bayo.

Kwinjira muri icyo gitaramo ni 5000 Frw mu myanya isanzwe na 10 000Frw mu y’icyubahiro. Abazagura amatike mbere bazagabanyirizwa 2000 Frw mu gihe abo muri VVIP bazishyura 15 000 Frw.

Amatike yatangiye gucururizwa kuri Bourbon Coffee (Intare Conference Arena, MTN na UTC); mu iduka ry’imyenda n’inkweto rya ‘Kemmy Shop’ riri i Nyamirambo kuri Onatracom; Café Ark ku Kisimenti kwa C John; Kigali City Market no ku nsengero zirimo Zion Temple mu Gatenga, Eglise Vivante, Calvary Ministry Remera, Foursquare Gospel Church Kimironko, Evangelical Restoration Church Kimisagara na Masoro na Healing Centre Remera. Anaboneka ku rubuga www.ishema.rw.

Abazagura amatike mbere bashyiriweho imodoka z’ubuntu zizabatwara zikazanabagarura igitaramo gihumuje; zizaba ziparitse ku isoko rya Kimironko no kuri Sitasiyo i Remera.

Gisubizo Ministries yahurijemo korali n'abahanzi bakomeye mu gitaramo igiye gukorera mu Mujyi wa Kigali
Abazitabira igitaramo bashyiriweho imodoka izabatwara ibajyana i Rusororo ku Intare Conference Arena
Amatike yatangiye gucururizwa ahantu hatandukanye

Umva indirimbo nshya ya Gisubizo Ministries yitwa ‘Halleluya’

Gisubizo Ministries yamamaye mu ndirimbo zirimo Nguhetse ku mugongo

Mu 2018, Gisubizo Ministries yakoze ibitaramo bibiri bikomeye mu Mujyi wa Kigali byitabiriwe n'ibihumbi by'abakirisitu

Reba hano indirimbo ya Rugarama James na Daniella ikunzwe cyane


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza