Bwa mbere Liza Kamikazi yatumiwe mu gitaramo kuva yatangira umuziki uhimbaza Imana

Yanditswe na Muvunyi Arsène
Kuya 6 Gicurasi 2019 saa 08:37
Yasuwe :
0 0

Umuhire Solange wamamaye nka Liza Kamikazi yatumiwe mu gitaramo Kingdom Of God Ministry izamurikiramo album y’indirimbo 10 z’amashusho, ari nacyo cya mbere azaba aririmbyemo kuva yatangira umuziki wo kuramya no guhimbaza Imana.

Icyo gitaramo cyiswe ‘Victorious album launch’ kizabera mu ihema rya Kigali Conference and Exhibition Village ahahoze hitwa Camp Kigali, ku Cyumweru tariki 12 Gicurasi 2019 guhera saa kumi z’umugoroba.

Cyatumiwemo abaramyi bakomeye mu Rwanda barimo Arsène Tuyi [wegukanye igihembo cy’umuhanzi mwiza ukizamuka muri Groove Awards Rwanda 2016], Bosco Nshuti [ufite igihembo cy’umuhanzi w’umwaka muri Groove Awards 2018]. Bazafatanya n’amatsinda yo kuramya no guhimbaza Imana ya Alarm Ministries na Healing Worship Team ndetse na Pasiteri Wilson Bugembe ukorera ivugabutumwa muri Uganda.

Abazacyitabira kandi bazataramana n’umuhanzikazi Liza Kamikazi wamamaye mu ndirimbo zisanzwe ariko akaza kwiyegurira Uwiteka.

Nemeyimana Fiacre uyobora Tent Maker iri mu bateguye ‘Victorious album launch’ yabwiye IGIHE ko Liza bamutumiye mu rwego rwo kumwakira mu baririmba indirimbo zo kuramya no guhimbaza Imana.

Yagize ati “Nk’abo yaje asanga ni ngombwa ko tumwakira mu ruganda rwa muzika ihimbaza Imana, akagaragariza abakirisitu n’abandi bari basanzwe bakunda ibihangano bye, ubuzima bushya arimo.”

Muri Kanama 2016 nibwo Liza yabatijwe mu Itorero New Life Bible church. Icyo gihe yatangaje ko “Nahisemo gukurikira Yesu, nta gusubira inyuma.”

Nyuma y’amezi abiri abatijwe, Liza Kamikazi yasohoye indirimbo ya mbere ihimbaza Imana yise ‘Ndaje Data’, yayikurikije izindi zirimo iyo yise “Indirimbo Nshya”.

Uyu muhanzi ni umufasha w’Umwongereza David Wald, umunyamuziki uzi gukoresha byinshi mu bicurangisho bya muzika. Aba bombi barushinganye muri Mutarama 2012, mu birori byabereye mu Karere ka Huye.

Album Kingdom Of God Ministry igiye kumurika, amashusho yayo yafashwe baririmba mu buryo bw’umwimerere [live] mu gitaramo “Victorious Live Concert”, cyabereye kuri Christian Life Assembly (CLA) i Nyarutarama ku wa 16 Nzeri 2018. Iriho indirimbo 10 zirimo izamenyekanye cyane nka “Nzamuhimbaza”, “Sinzava Aho Uri”, “Ijambo ryawe” n’izindi.

Kwinjira muri icyo gitaramo ku bazagura amatike mbere ni 5000 Frw mu myanya isanzwe, 10 000 Frw mu y’icyubahiro na 20 000 Frw ku meza y’umuntu umwe.

Ni ku nshuro ya mbere Liza azaba aririmbye mu gitaramo gikomeye kuva yakwinjira mu muziki wo kuramya no guhimbaza Imana
Pasiteri Wilson Bugembe yatumiwe mu gitaramo cya Kingdom of God Ministry nk'umushyitsi mukuru
Umuririmbyi Bosco Nshuti ukunzwe mu ndirimbo zirimo 'Ibyo ntunze', 'Umutima' n'izindi yatumiwe mu gitaramo
Umuhire Solange uzwi nka Liza Kamikazi n’umugabo we David Wald bakunda gusohokana mu bitaramo Aha bari bitabiriye igitaramo cya New Melody cyiswe 'Selah Concert' cyabereye muri Serena mu 2017
Igitaramo cya Kingdom Of God Ministry cyatumiwemo abahanzi bakunzwe mu muziki uhimbaza Imana mu Rwanda no hanze yarwo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza