Danny Mutabazi agiye kumurika album mu gitaramo yahurijemo abahanzi bakomeye

Yanditswe na Ishimwe Israel
Kuya 1 Kamena 2019 saa 07:14
Yasuwe :
0 0

Umuramyi uri mu bakunzwe cyane muri ADEPR, Danny Mutabazi, agiye kumurika album ye ya mbere mu gitaramo yatumiyemo abahanzi bakomeye mu muziki uhimbaza Imana mu Rwanda.

Iki gitaramo cyiswe ‘Calvary Album Launch’ kizabera kuri Dove Hotel ku wa 2 Kamena 2019, kuva saa Munani z’amanywa.

Danny Mutabazi yagitumiyemo abandi bahanzi barimo Papi Clever na Simon Kabera; amakorali ya Siloam ya Kumukenke na Shalom yo muri ADEPR Nyarugenge. Abazacyitabira bazasangizwa ijambo ry’Imana na Pasiteri Habyarimana Désiré.

Uyu musore w’imyaka 25, iki gitaramo kiri mu byagutse agiye gukorera mu Mujyi wa Kigali nyuma y’ibyazengurutse ibice bitandukanye by’u Rwanda.

Album ye y’amashusho agiye kumurika igizwe n’indirimbo zirindwi z’amashusho. Ni umuzingo ufite umwihariko kuko 80% by’indirimbo ziwugize zivuga ku gaciro k’umusaraba wa Yesu Kirisitu.

Mu kiganiro yagiranye na IGIHE yavuze ko imyiteguro ayigeze kure, ndetse yiteguye gutaramana n’abakunzi be.

Yakomeje agira ati “Imyiteguro nyigeze kure, ibijyanye no gusubiramo indirimbo byararangiye. Ubu ndi gusuzuma ibijyanye n’ibyuma. Navuga ko ntegereje umunsi w’igitaramo ngo nishimane n’abakunzi b’umusaraba.’’

Mutabazi yatangiye umuziki nk’umuhanzi wigenga mu 2015, amaze gushyira hanze indirimbo zisaga kuva atangiye umuziki.

Indirimbo yitwa ‘Calvary’ ni yo yazamuye izina rye mu ruhando rw’abakunda umuziki uhimbaza Imana. Ibindi bihangano bye bizwi birimo “Ntiyasinziriye”, “Ntiwanyihakanye”, “Binkoze ku Mutima”, “Ufite uwo mwana” n’iyitwa “Amarira y’Ibyishimo” aheruka gushyira ku mugaragaro.

Danny Mutabazi yavukiye mu Murenge wa Gishali mu Karere ka Rwamagana ahitwa Nyarugari. Uyu musore w’imyaka 25 yatangiye kuririmba muri korali z’abana mu 2004.

Igitaramo cyo kumurika album yitiriwe ‘Calvary’ kukinjiramo ni Ubuntu; CD iriho indirimbo izaba igurishwa 5,000Frw.

Umva hano indirimbo nshya Danny Mutabazi aheruka gushyira ku mugaragaro

Danny Mutabazi agiye kumurika album ye ya mbere kuva atangite umuziki
Iki gitaramo cyatumiwemo abahanzi batandukanye barimo Papi Clever na Simon Kabera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza