Danny Mutabazi yaturiweho umugisha mu gitaramo cye cyitabiriwe n’imbaga (Amafoto)

Yanditswe na Akayezu Jean de Dieu
Kuya 3 Kamena 2019 saa 05:37
Yasuwe :
0 0

Umuramyi ubivanga n’ivugabutumwa mu Itorero rya Pantekote mu Rwanda [ADEPR], Paruwasi ya Gasave, Danny Mutabazi, yahembuye imitima y’abitabiriye igitaramo cyo kumurika album ye y’amashusho yise ‘Calvary’ bamwaturiraho umugisha.

Ni igitaramo cyabaye ku gicamunsi cyo ku wa 02 Kamena 2019, mu Mujyi wa Kigali kuri Dove Hotel, ahari hakoraniye imbaga y’abakirisitu n’abakunzi b’indirimbo z’uyu muhanzi zigaruka cyane ku bwiza bw’umusaraba n’uburyo abemera Kirisitu bawuboneraho umukiro.

Album yamuritswe na Mutabazi ifite umwihariko w’uko indirimbo ziyigize nibura 80% zivuga ku gaciro k’umusaraba wa Yesu Kirisitu.

Indirimbo zirindwi ziganjemo izikunzwe muri iyi minsi nka ’Binkoze ku mutima’, ’Ufite uwo mwana’, ’Calvary’ n’izindi zirimo ’Getsemani’, ’Ineza yawe’, ’Ntiyasinziriye’ na ’Ntiwanyihakanye’.

Mu gitaramo cyo kumurika Calvary, Mutabazi yafashijwe n’abahanzi barimo Simon Kabera, Papi Clever ndetse n’amakorali ya Siloam ya ADEPR Kumukenke na Shalom yo muri ADEPR Nyarugenge.

Papi ukunzwe cyane mu bahanzi bahimbaza Imana yishimiye cyane mu ndirimbo ze zirimo ’Narakwiboneye’, ’Impamvu z’ibifatika’ aheruka gushyira ahabona.

Yanifashishije indirimbo z’abandi bahanzi zirimo ’Njye mfite umukiza ya 74 mu gushimisha, Ndi amahoro ya 125 gushimisha. Yageze ku ndirimbo za Korali Jehovah Jireh nka ’Turakwemera’ na ’Ntabwo tuzayoba’ benshi bongera kwizihirwa bikomeye.

Pasiteri Habyarimana Désiré wigishije ijambo ry’Imana abitabiriye iki gitaramo yagarutse ku kamaro k’umusaraba avuga ko ugarura ubusabane bw’abakirisitu n’Imana.

Yakomeje avuga ko Imana iducisha ahantu hagoye atari uko itwanga ahubwo iba ishaka kuturemamo umutima ukomeye.

Yunzemo ati “Abantu bakomerekeye ahantu hatandukanye ariko umusaraba ukiza imvune zo mu mutima.”

Nyuma y’ubutumwa bwiza bwa Pasiteri Habyarimana, hari hageze ngo abitabiriye igitaramo bishimane na Danny Mutabazi wageze ku rubyiniro ahagana saa 16h50.

Ari kumwe n’itsinda rinini ry’abacuranzi, abaririmbyi, Mutabazi yageze ku rubyiniro maze imbaga y’abari bitabiriye iki gitaramo bamutiza amajwi bafatanya kuririmba indirimbo zirimo iyitwa ’Getsemani’ yatangiriyeho, ’Ufite uwo Mwana’, yageze ku musozo benshi barahaguruka bamufasha kuyitamba bigeze aho aririmba avuga ko "Imbaraga z’Umutima tuzivana i Gologota" bose bahanika amajwi basoza n’amashyi menshi!

Mu gihe kigera hafi ku isaha, aririmba zimwe mu ndirimbo ziri kuri alubumu ye, Mutabazi yaje kugera ku ndirimbo Calvary yitiriwe alubumu ye. Ni indirimbo ivuga umusozi wa Calvary wamenetseho amaraso ya Yesu Kristu witangiye abamwizera kugira ngo babone ubugingo.

Nyuma y’iyi ndirimbo yashimye abitabiriye iki gitaramo, Ngiriwubuntu Dione wari uyoboye ibirori yongera kugaruka ku rubyiniro barongera baririmba agace gasoza indirimbo Calvary.

Yaturiweho imigisha

Danny Mutabazi w’imyaka 25, yakoreye igitaramo mu Mujyi wa Kigali nyuma y’ibyazengurutse ibice bitandukanye by’u Rwanda.

Abenshi bari bitabiriye iki gitaramo barimo abakirisitu basengana muri ADEPR hirya no hino mu gihugu, harimo kandi abapasiteri bamuzi n’abo bagiye bamenyanira mu murimo w’ivugabutumwa.

Umushumba wa Paruwasi Gasave aho Mutabazi asengera, Past. Rugema Vedaste, yavuze ko ari ishimwe rikomeye kuba Imana yaramuhaye impano yo kuririmba ariko ikanamuha iy’ivugabutumwa.

Yagize ati “Turashima Imana ku bwa Mutabazi, Imana yamuhaye impano ariko inamuha kuba umuvugabutumwa. Imana ihimbazwe kuko dufite abantu nka Mutabazi bakora ivugabutunwa.”

Uyu muhanzi yasabiwe umugisha n’abaturutse hirya no hino mu gihugu baje kumushyigikira.

Yahawe inkunga n’abatandukanye barimo abaguze CD y’indirimbo ze bagiye batanga amafaranga mu rwego rwo gushyigikira impano y’uyu musore.

Korali Shalom yashimangiye ubunararibonye

Korali Shalom ikorera umurimo w’ivugabutumwa mu Itorero rya Pantekote mu Rwanda, Paruwase ya Nyarugenge, yafashije Mutabazi kumurika alubumu ye ya Calvary.

Iyi korali iri mu zimaze kuba ubukombe mu Rwanda dore ko imaze imyaka isaga 34 ikora umurimo w’ivugabutumwa mu buryo bw’indirimbo.

Mu gitaramo cya Danny Mutabazi, Korali Shalom yongeye gushimangira ubunararibonye ifite maze ishyira mu mwuka abitabiriye iki gitaramo barasirimba umwuka wera aramanuka.

Baririmbye indirimbo zabo zikunzwe zirimo ‘Uri Imana itandukanye n’abantu’, ’Nyabihanga’ na ’Uravuga bikaba’.

Iki gitaramo cyasojwe n’umuhanzi Simon Kabera umaze kwigarurira imitima ya benshi bakunda umuziki uramya Imana, aho yaririmbye indirimbo ze zirimo, Fata Inanga, n’izindi zitandukanye zapfundikiye iki gitaramo.

Uhereye iburyo Pasiteri Kamanzi Callixte Umushumba w'Ururembo rwa Kigali, Pasiteri Butera Célestin uyobora Akarere ka Gasabo; Umuhanzi Danny Mutabazi na Pasiteri Rugema Vedaste uyobora Paruwasi ya Gasave
Umubyeyi wa Mutabazi ari mu bamuteye inkunga bamwifuriza gukomeza kwaguka mu buhanzi bwe no gukora ivugabutumwa
Umuhanzi C John uri mu baje gushyigikira Danny Mutabazi
Umuhanzi Danny Mutabazi yamuritse ku mugaragaro album ye yise Calvary
Umuhanzi Jado Sinza nawe ari mu bitabiriye igitaramo cya Danny Mutabazi
Umuhanzi Serge Iyamuremye nawe yari yaje gushyigikira Danny Mutabazi
Umuhanzi Simon Kabera ari mu bishimiwe mu ndirimbo ze zirimo iyitwa Mfashe inanga
Umuramyi Papi Clever ni umwe mu baririmbye mu gitaramo cya Danny Mutabazi
Umuririmbyi Bosco Nshuti ari mu bari baje gushyigikira Danny Mutabazi
Yakoresheje imbaraga zidasanzwe ku rubyiniro
Yaririmbye agera aho gufatwa n'ikiniga arira amarira y'ibyishimo
Ababyeyi ba Danny Mutabazi bari baje kumushyigikira
Abapasiteri barimo uyobora ADEPR paruwasi ya Gasave (ibumoso) ndetse n'umuyobozi wa ADEPR mu Karere ka Gasabo (iburyo) bamusengeye bamwaturiraho umugisha
Abitabiriye bakozwe ku mutima n'indirimbo za Danny Mutabazi zigaruka ku kamaro k'umusaraba
Danny Mutabazi n'itsinda ry'abasore n'inkumi bamufasha kuramya Imana
Danny Mutabazi ubwo yaturukaga mu rwambariro aza ku rubyiniro
Igitaramo cyari cyitabiriwe n'imbaga y'abakirisitu baje gushyigikira Danny Mutabazi
Korali Shalom ihuje abaririmbyi benshi yafashije abitabiriye igitaramo cya Mutabazi kwinjira mu mwuka
Korali Shalom yo muri ADEPR Nyarugenge yishimiwe bikomeye
Pasiteri Habyarimana Désiré wabwirije abitabiriye igitaramo cya Danny Mutabazi

Amafoto: Niyonzima Moïse


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza