Friends of Jesus Choir igiye kwizihiza isabukuru y’imyaka 20 ikora ivugabutumwa

Yanditswe na Ishimwe Israel
Kuya 8 Kanama 2017 saa 09:53
Yasuwe :
0 0

Korali Friends of Jesus ibarizwa mu Itorero ry’Abadiventisiti b’Umunsi wa Karindwi riherereye i Kibagabaga mu Mujyi wa Kigali, ku rusengero rw’abakoresha Icyongereza (Kigali English Church), igiye gukora igitaramo cyo gushima Imana kizahurirana no kwizihiza isabukuru y’imyaka 20 imaze ikora ivugabutumwa ry’indirimbo.

Iki gitaramo cyo kwibuka ingamba Imana yabarwaniriye n’intambara yabarokoye cyiswe “20th Anniversary and Homecoming Concert”, kizahuriza hamwe abaririmbyi bose banyuze muri Friends of Jesus kuva yashingwa.

Friends of Jesus Choir (FOJ) yashinzwe muri Werurwe 1997, igizwe n’abaririmbyi 34 bahoraho n’abandi barenga 100 batuye mu bihugu bitandukanye birimo Canada, Amerika, u Bwongereza, Kenya, u Bubiligi n’ahandi bafite intego yo guhindurira abantu kuba inshuti za Yesu.

Umuyobozi wa Korali Friends of Jesus, James Ghahunde, yatangarije IGIHE ko mu myaka yose bamaze mu ivugabutumwa bagendera mu nzira yo kwamamaza Kirisitu no kumushimira.

Yagize ati “Tumaze imyaka 20 dufite gahunda yo gushima Imana kuko kumara iki gihe mu ivugabutumwa si ikintu cyoroshye. Intego yacu ni ugushima Imana muri byose, ibi ni ibihe bidasanzwe aho tuzifatanya n’inshuti n’abavandimwe kwibuka inyama yashize n’amasezerano Imana yaduhaye.”

Yakomeje atangaza ati “Iki gitaramo gifite intego igira iti “Ibyo twanyuzemo byose” ishimangira ko gushima bihoraho. Tubaho mu buzima bwo gushima kuko buri ntambwe dutera ni ubuzima bwo kwiragiza Imana. Ni umunsi wo gusangiza isi ibyo Imana yadukoreye. Urugendo twanyuzemo rutanga ubutumwa bw’inkomezi ku bandi.”

Friends of Jesus yashinzwe n'abantu umunani mu 1997 imaze guhindurira abantu benshi kuba inshuti za Yesu

Igitaramo kizabera muri Convention Center ku ya 19 Kanama 2017, Friends of Jesus, izafatanya n’andi makorali akomeye mu Rwanda nka Ambassadors of Christ, Elevate, Urugero y’i Gisenyi, Korali yo muri Kenya yitwa For Him na The Voice izaturuka muri Tanzania.

Friends of Jesus iririmba mu ndimi zitandukanye zirimo Ikinyarwanda, Icyongereza n’Igiswahili. Izwi mu ndirimbo zirimo ‘Nshuti Yesu’, ‘Nari imbohe’, ‘Rejoice-Himbaza’, ‘Wonderful Peace’, ‘I will serve thee’, ‘Amazing Love’, ‘And can it be’, ‘Kuneshereza’, ‘Kwambuka’ n’izindi.

Mu myaka 20 imaze ikora ivugabutumwa imaze gusohora indirimbo zisaga 70 zose ziri kuri album zirindwi, muri zo harimo imwe y’amashusho. Yaherukaga gukora igitaramo gikomeye mu 2013, icyo gihe cyabereye muri Serena Hotel cyanamurikiwemo album yayo yitwa ‘Shepherd of My Soul’.

Friends of Jesus Choir igiye kwizihiza isabukuru y’imyaka 20 ikora ivugabutumwa ry'indirimbo

Iki gitaramo kizatangira saa kumi n’imwe za nimugoroba kucyinjiramo ni 10.000 Frw ku bantu bakuru, abana bari hagati y’ imyaka itanu n’icumi bazishyura 5000 Frw, naho abari munsi y’imyaka itanu bazinjirira ubuntu.

Amwe mu mateka ya Friends of Jesus yashibutse mu bikomere bya Jenoside

Friends of Jesus yashinzwe n’abantu umunani bari bahungutse bavuye hanze y’igihugu nyuma ya Jenoside yakorewe Abatutsi muri Mata 1994.

Aba biganjemo abatari bazi Ikinyarwanda bishyize hamwe batangira guteranira mu Mujyi wa Kigali rwagati hafi na CHUK ahari urusengero rw’Abadiventisiti rukoresha ururimi rw’Icyongereza.

Nyuma yo kunga ubumwe bakita Korali yabo nshya Friends of Jesus, bahise batangira gutanga ubufasha bw’ihumure ku miryango yari ifite ibikomere bya Jenoside bagamije kubyomora.

Friends of Jesus yari ifite intego yo gukora ivugabutumwa ibinyujije mu ndirimbo, ibwiriza abantu b’ingeri zose mu kubaremamo icyizere ndetse gufasha abari mu bihe bikomeye. Muri iki gihe abari bagize Friends of Jesus bakoze ibikorwa byo gufasha impunzi babaha ibyo kurya no kwambara.

Nyuma y’ubutumwa bwururutsa imitima ya benshi itanga, Friends of Jesus inafasha mu bikorwa byo gushyigikira abatishoboye.Ku ya 2 Nyakanga bafashije abo mu Murenge wa Gahanga muri Kicukiro, bubakira umwe muri bo, bavura abafite uburwayi bw’amatwi, bishyurira ubwisungane mu kwivuza ku bantu 150, banatanga ihene 29.

Friends of Jesus izifatanya na For Him Ministry yo muri kenya
Korali Ambassadors Of Christ yo mu Itorero ry’Abadivantisiti b’Umunsi wa Karindwi yatumiwe muri iki gitaramo
Iki giterane kizahuriza hamwe abagera ku bihumbi bibiri barimo abaririmbyi banyuze muri Friends of Jesus, inshuti zayo n'abakunzi b'umusaraba

Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza