Healing Worship Team izamurika album mu gitaramo yatumiyemo Israel Mbonyi n’amatsinda akomeye

Yanditswe na Sengurebe Joel
Kuya 8 Kamena 2018 saa 12:15
Yasuwe :
0 0

Abaririmbyi babarizwa mu Itorero Power of Prayer Church bahuriye muri Healing Worship Team batumiye Israel Mbonyi n’andi matsinda akomeye atatu mu gitaramo bazamurikiramo amashusho y’indirimbo zigize album yabo ya kane.

Iki gitaramo cyiswe “Mwami Icyo Wavuze Live Concert” gitegerejwe ku itariki 24 Kamena 2018 muri Camp Kigali.

Umuyobozi w’Amajwi muri Healing Worship Team, Muhoza Budete Kibonke yabwiye IGIHE ko imyiteguro y’iki gitaramo bayigeze kure. Yavuze ko batumiye Israel Mbonyi nk’umuhanzi ukunzwe na benshi mu kuramya no guhimbaza Imana bakazanakorana n’amatsinda akomeye mu ibwirizabutumwa mu Rwanda ari yo Gisubizo Ministries, True Pomises Ministry na Alarm Ministries.

Yagize ati “Turimo gusengera iki gitaramo kugira ngo hazabemo ubwiza bw’Imana. Agashya karimo ni ubutumwa buzumvikana mu ndirimbo 11 tuzaba dufite kuko ntabwo zisanzwe ni agaseke, ni ubutumwa buzaba buturutse ku Mana bugenewe abazaba mu gitaramo cyacu ndetse n’abari ku Isi hose.”

Israel Mbonyi nk’umuhanzi ukunzwe na benshi wari umaze iminsi akora ibitaramo mu mijyi itandukanye muri Canada, ubu akaba amaze iminsi mike agarutse mu Rwanda, ngo yiteguye kwifatanya n’abazitabira icyo gitaramo.

Yagize ati “Mbere ya byose ndashima Imana ko yabanye nanjye mu bitaramo bitatu nakoreye muri Canada kandi abantu b’Imana barahembutse bamwe banakira agakiza. Nzaba mpari mu gitaramo ‘Mwami icyo wavuze Live Concert’ cya Healing Worship Team, abakunzi banjye ndabahamagarira kuzitabira ku bwinshi.”

Ku munsi w’igitaramo, amatike azaba agura 10,000Frw muri VIP ndetse na 5,000Frw mu myanya isanzwe. Abazayagura mbere y’uko kiba bari kubaganyirizwa ibiciro aho itike ya VIP bayigura 8,000Frw naho iyo mu myanya isanzwe ikaba igura 3,000Frw. Hateguwe n’imyanya ya VVIP izicarwamo n’abantu 8 baguze ameza y’ibihumbi 160,000Frw, bivuze ko umwe azaba yishyuye ibihumbi 20, agahabwamo icyo kunywa ndetse na Flash Disc iriho indirimbo z’amashusho n’iz’amajwi za Healing worship team.

Itsinda ry’abaririmbyi bagize Healing Worship Team riteguye iki gitaramo nyuma y’iminsi mike rivuye muri Tanzania gukora ivugabutumwa ndetse na nyuma yacyo bakaba bafite ibindi bitaramo bazitabira muri Kenya, Tanzania na Repubulika Iharanira Demokarasi ya Congo.

Healing Worship Team ikorera umurimo w’Imana mu Itorero Power of Player Church, yatangiye umurimo w’Imana mu 2008. Yatangijwe n’abaririmbyi umunani ndetse bigaga mu mashuri abanza icyo gihe. Uko imyaka yagiye ishira niko Healing Worship Team yagiye yaguka ubu ikaba ifite abaririmbyi 51.

Healing Worship Team izamurika album mu gitaramo yatumiyemo Israel Mbonyi

Yatangiye iririmba indirimbo z’abandi ariko ubu ikaba iririmba izayo ndetse imaze kugira izisaga ijana harimo izibumbiye kuri album eshatu n’iya kane ari nayo bitegura kumurika muri iki gitaramo gikomeye bise kizabera muri Camp Kigali ku wa 24 Nyakanga 2018.

Alarm Ministries ihuriyemo abaririmbyi b'amadini n'amatorero atandukanye yo mu Rwanda
Gisubizo Ministries ikunzwe n'abatari bake mu Rwanda
Israel Mbonyi ufite indirimbo ziryohera abatari bake na we azacuranga muri iki gitaramo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza