Igiterane cy’ububyutse ‘Africa Haguruka’ kigiye kubera i Kigali ku nshuro ya 18

Yanditswe na Ishimwe Israel
Kuya 27 Kamena 2017 saa 04:55
Yasuwe :
0 0

Igiterane cy’ububyutse gihuriza hamwe abantu b’ingeri zose mu ivugabutumwa ‘Africa Haguruka’ gitegurwa na Zion Temple Celebration Center iyobowe na Apostle Dr. Paul Gitwaza kigiye kubera mu Mujyi wa Kigali mu ntangiriro za Nyakanga.

Africa Haguruka yashibutse mu iyerekwa Apostle Dr Paul Gitwaza yagize mu 2000, rigamije kuzamura iterambere ry’umugabane wa Afurika no guhembura abawutuye binyuze mu ijambo ry’Imana.

Ku nshuro ya 18, ibiterane by’ububyutse bya Africa Haguruka bizabera kuri Stade ya IPRC Kicukiro ahahoze ari muri ETO Kicukiro kuva kuya 2 kugeza kuya 9 Nyakanga 2017; bizajya bitangira saa kumi z’umugoroba.

Ibi biterane bizitabirwa n’abakozi b’Imana baturutse mu bice bitandukanye kuri uyu mubumbe bayobowe na Apostle Dr. Paul Gitwaza, Apostle Betta Mengistu wo muri Ethiopia, Pasiteri Wilson Bugembe wo muri Uganda, Pasiteri Werner Nichtigal ukomoka mu Budage, Pasiteri Jacobus Nomdoe wo muri Afurika y’Epfo, Révérend Dr. Francis Mbadinga kuva muri Gabon n’abandi.

Iki giterane ngarukamwaka gifite insanganyamatsiko igaragara mu gitabo cya Yosuwa 7:10, hagira hati "Nuko Uwiteka abwira Yosuwa ati Byuka (Afurika Byuka), ni iki gitumye ugwa wubamye?”

Mu gihe cy’icyumweru iki giterane kizamara, ku manywa abazakitabira bazajya bahabwa amahugurwa n’impuguke zigisha abantu mu ngeri zitandukanye z’ubuzima zirimo Ubuyobozi, Umurimo w’Imana, Ubucuruzi, Umuryango, Uburezi, Itangazamakuru n’Imyidagaduro binyuze muri ‘Africa Haguruka Summit’. Izi nyigisho zizajya zitangwa kuva saa tatu kugeza saa saba n’igice aho abazazitabira biyandikisha banyuze kuri Zion Temple Celebration Center mu Gatenga.

Umuyobozi Mukuru wa Zion Temple, Apostle Dr Paul Gitwaza aherutse gutangariza Televiziyo ya Authentic ko igihe kigeze ngo u Rwanda rube umusemburo wo guhagurutsa Afurika nayo itere imbere bifatika nk’indi migabane.

Yagize ati “Ni cya gihe cyo kongera guhura tugatekereza kuri Afurika, tukayisengera, tukanarebera hamwe ku ngamba zayiteza imbere. U Rwanda ruzahagurutsa Afurika kuko Imana yarukuye ahantu kure, ikoresheje abarutuye, inshuti zarwo, abanyamasengesho b’ingeri zitandukanye, aba bose bayobowe n’Umukuru w’Igihugu.”

Yakomeje agira ati “Afurika igomba guhaguruka mu butunzi, mu bikorwa remezo no mu bwenge bwayo kuko indi migabane yarabyutse iriruka.”

Binyuze muri ibi biterane iterabwoba, inzara, ubwicanyi byaba umugani mu gihe Itorero ryaba rifatanyije na Leta kurwanya ikibi mu isi y’ibigaragara n’iy’umwuka.

Afurika Haguruka izabanzirizwa n’Ihuriro ry’Urubyiruko ryiswe "Afurika Byuka urabagirane", igikorwa kizabera ku rusengero rwa Zion Temple mu Gatenga, giteganyijwe kuva kuya 29 Kamena kugeza kuya 1 Nyakanga 2017. Kizasorezwa kuri Stade ya Kicukiro kuya 8 Nyakanga, kuva saa tatu kugeza saa sita.

Iki gitaramo kizayoborwa na Apostle Dr Paul Gitwaza kizitabirwa na Pastor Tommy Deuschle na Pastor Henry Mugisha.

Iki giterane kiri mu byitabirwa n’abakirisitu benshi bo mu madini n’amatorero atandukanye cyatumiwemo amakorali akomeye mu Mujyi wa Kigali arimo Healing Worship Team, True Promises, Heavenly Melodies, itsinda rya Beauty for Ashes na Asaph Nyarutarama.

Africa Haguruka izahuriramo abakozi b'Imana baturutse mu bice bitandukanye ku Isi
Umuyobozi Mukuru wa Zion Temple ku Isi, Apostle Dr. Paul Gitwaza, yahishuriwe ibyo guhembura umugabane wa Afurika mu 2000
Urubyiruko narwo rwateguriwe igiterane cyihariye

Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza