Bishop Nzeyimana yafashije abagororwa 2000 kubohoka basaba imbabazi abo bahemukiye

Yanditswe na Umurerwa Emma Marie
Kuya 9 Gashyantare 2017 saa 11:39
Yasuwe :
0 0

Umuyobozi w’Itorero Najoth Church, Bishop Nzeyimana Innocent avuga ko yabwirije ijambo ry’Imana mu magereza atandukanye mu Rwanda bituma abagororwa bayafungiyemo basaba imbabazi abo biciye n’abo bakoreye ibyaha bitandukanye.

Bishop Nzayimana Innocent, avuga ko yagize umuhamagaro wo kuvuga ubutumwa mu magereza atandukanye guhera mu 1995. Nyuma y’imyaka 22 akora uwo murimo w’Imana, avuga ko abagororwa 2000 babohotse bemera ibyaha birimo n’ibya Jenoside yakorewe Abatutsi ndetse babisabira imbabazi.

Mu kiganiro na IGIHE, Bishop Nzeyimana Innocent yavuze ko nyuma ya Jenoside yakorewe Abatutsi yiyemeje kubwiriza ubutumwa bwiza muri gereza kugira ngo abishe basabe imbabazi abo biciye.

Yagize ati “Hari hashize umwaka umwe gusa Jenoside irangiye; mu mitima y’abanyarwanda hari harimo ibikomere bitandukanye; nibwo Imana yanshyizemo umuhamagaro wo kuvuga ubutumwa muri za gereza. Kuva icyo gihe kugeza ubu abagororwa 2000 harimo abishe n’abandi bakoze ibyaha bitandukanye bemeye ibyaha bakoze basaba imbabazi abo babikoreye.”

Akomeza avuga ko nta bundi buhanga akoresha ngo abagororwa basabe imbabazi abo biciye cyangwa abo bakoreye ibyaha bitandukanye uretse Bibiliya.

Ati “Nkoresha ijambo ry’Imana ryanditse muri Bibiliya, ubundi ngasenga Imana ijambo ryayo rikagira imbaraga mu mitima y’abaryumvise. Njya mu magereza atandukanye nkajyana n’abaririmbyi bakaririmba, ubundi tugatanga n’ibiganiro bitandukanye by’isanamitima abakozwe ku mutima n’icyo ijambo ry’Imana ribabwiye bakihana.”

Ivugabutumwa muri Gereza ryatumye Bishop Nzeyimana agirwa umurinzi w’Igihango

Ubwo hizihizwaga umunsi w’intwari tariki ya 1 Gashyantare 2017, ubuyobozi bw’Akarere ka Nyarugenge bwahaye Bishop Nzeyimana umudari w’ishimwe w’umurinzi w’igihango bitewe n’ibikorwa by’indashyikirwa yakoze mu kunga abanyarwanda.

Si ibyo gusa kandi kuko mu cyatumye agirwa umurinzi w’igihango harimo no kuba yaratanze inka 145 muri gahunda ya Girinka, zigahabwa abatishoboye.

Bishop Nzayimana Innocent ni umuyobozi w’ihuriro ry’amadini n’amatorero mu Karere ka Nyarugenge akaba n’umuyobozi w’ihuriro ry’ubumwe n’ubwiyunge muri ako karere.

Bishop Nzeyimana avuga ko kuva mu 1995 atangira kuvuga ubutumwa mu magereza, abagororwa 2000 bamaze kubohoka basaba imbabazi
Meya w'Akarere ka Nyarugenge, Kayisime Nzaramba yambika umudari w'ishimwe Bishop Nzeyimana nk'umurinzi w'igihango

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244