Imvugo ‘wumve ibyo mvuga nturebe ibyo nkora’ ikwiye gucika

Yanditswe na Munyengabe Murungi Sabin
Kuya 17 Ugushyingo 2016 saa 08:56
Yasuwe : XX
0

Aya ni amwe mu magambo ashushanya ubuzima bwa bamwe mu bigisha b’ijambo ry’Imana, nyuma yo gusohoka mu nsengero no hirya no hino mu matorero ya gikirisitu cyangwa aho bari bamaze kubiba imbuto y’ubutumwa bwiza.

Ibi bigaragara aho usanga ibikorwa bya bamwe muri bo bihabanye cyane n’ibyo bigisha nyamara ugasanga ba nyiri ukubikora birengagiza ko ibyo babwiye abandi na bo bibareba, ndetse hari igihe kizagera bakabibazwa n’undi mucamanza mukuru utabera udasengera mu nsengero bayobora. Ubuzima nk’ubu bwo kubeshyeshya ururimi abakumva nyamara imirimo y’umuntu ikaza kumwerekana neza uwo ari we nyawe uhabanye n’uwari azwi, ni bumwe mu bwo Imana itajya yishimira.

Iyo dusomye (Abaroma 2: 21-24) haragira hati: “…mbese wigisha abandi ntiwiyigisha? Ko uhana abandi kwiba nawe ukiba? Ko uvuga ngo ntugasambane nawe usambana, ko wanga ibishushanyo bisengwa nawe ukanduza urusengero? Ko wirata amategeko nawe ugayishisha Imana kuyacumura? Izina ry’Imana riratukwa mu bapagani ku bwanyu nk’uko byanditswe”

Kuva kera amategeko yahozeho ndetse hari benshi bari bazi no kuyigisha cyane kurusha bamwe mu b’ubu bakanayirata cyane, ariko Bibiliya ijambo ry’Imana ryerekana ko amategeko atigeze rwose akiza abo bantu ibyaha, ahubwo kubw’urukundo Imana yadukunze gusa yashimye ko ducungurwa kubw’ubuntu no kwizera Kristo Yesu.

Kubw’uwo, umwizeye ubuzima bwe buva mu magambo bukajya mu bikorwa, yaba uwigisha n’uwigishwa bakaba bashya, kamere zabo zigapfa bakamera nk’abazutse ku bw’imirimo myiza batangira gukora isimbura imibi yakera bakoraga.

Birababaza cyane iyo usanze hari umuntu w’Imana (umuyobozi w’itorero runaka, umuririmbyi, umuhanuzi, umuvuga-butumwa,…) wabaye iciro ry’imigani mu bamuzi ndetse bazi ibyo akora, nyamara mu gihe abamwumvaga kuri za radiyo, mu nyandiko nk’izi, kuri televisiyo n’ahandi bamwumvaga nk’uwagira umumaro ukomeye mu guhindura ubuzima bwa benshi cyangwa nk’uwaba umwizerwa. Ariko ugasanga abantu barumirwa iyo bamubonye binyuranye n’uko bamutekerezaga.

Bituma rero umuntu yibaza iherezo rya bene abo ndetse akanibaza niba bajya bafata akanya bagatekereza bihagije kuri rya jambo dusoma rigira riti: “Dore ndaza vuba nzanye ingororano kugira ngo ngororere umuntu wese ibikwiriye ibyo yakoze." (Ibyahishuwe 22: 12)

Birakwiye ko ubuzima bwacu tubusanisha n’ibyo tuvuga cyangwa twigisha, kuko hari umuntu ubaho atari intyoza mu kuvuga ariko imyitwarire ye mu bandi ubwayo ikivugira ndetse ugasanga hari na benshi bifuza kwigana uko ameze.

Ibi nta kindi kibitera ni uko kuvuga menshi udasa na yo birutwa no kutayavuga. Ubuzima bwacu tubamo bwa buri munsi bwari bukwiye kuba ubusobanura neza abo turi bo nyakuri, bugatanga ishusho y’uko twamenye Imana koko hadategerejwe ko tugira icyo dukora cyangwa tuvuga. Imana ibahe umugisha.

Ijambo ry’Imana muritegurirwa na Rejoice Africa Ministries

Wifuza kugira icyo utubwira ku ijambo ry’Imana usomye, twandikire kuri Email yacu: rejoiceafricam@gmail.com


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza