Papa arashaka ko abakirisitu basoma kenshi Bibiliya nk’uko bakenera telefoni

Yanditswe na Mathias Hitimana
Kuya 5 Werurwe 2017 saa 05:10
Yasuwe :
1 0

Umushumba wa Kiliziya Gatolika, Francis, yahamagariye abakirisitu gusoma Bibiliya kenshi nk’uko basoma ubutumwa bandikiwe kuri telefone ngendanwa zabo.

Ubu butumwa Papa Francis yabutanze kuri iki Cyumweru, ku mbuga ya Basilika ya Mutagatifu Pawulo i Roma, asaba abemera guha umwanya mu buzima bwabo Bibiliya umuntu ikamuba hafi.

Yagize ati “Byamera gute dusubiye mu rugo twayibagiwe, tuyifungura kenshi ku munsi, dusomye ubutumwa bw’Imana buri muri Bibiliya nk’uko dusoma ubutumwa twandikiwe kuri telefoni.”

Nk’uko radiyo ya Vatikani yabigarutseho, Papa yakomeje avuga ko abantu bahaye umwanya ijambo ry’Imana, rikabacengera mu mitima yabo, nta gishuko cyabatandukanya nayo. Byongeye kandi, Papa akavuga ko Bibiliya ari intwaro nziza yo kurwanya ikibi.

Kuri iki Cyumweru cya mbere cy’igisibo ku bakirisitu Gatolika bitegura umunsi mukuru wa Pasika, Papa yabibukije ko shitani ishaka kuyobya abemera, ariko ko intwaro yo gutsinda ikibi ari ijambo ry’Imana kandi Yezu akaba ari ryo yakoreshaga gusa.

Muri iki gisibo, Papa Francis yananyujije kuri twitter ubutumwa buhamagarira abakirisitu kugira umutima utabara, bakumva ko mu gihe biyirije ubusa bagomba gufungurira abashonji.

Papa Francis ni umwe mu bantu bakurikirwa ku isi kuri Twitter, kuko kugeza ubu afite ababarirwa muri miliyoni 10.5.

Hirya no hino ku isi mu bihugu byagezemo kera iyobokamana ya gikirisitu, Bibiliya iza mu bitabo bigurwa cyane ariko bamwe ntibazisome uko bikwiye.

Papa arahamagarira abantu gusoma ubudacogora Bibiliya nk'intwaro yo kurwanya ikibi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244