Papa Francis yagereranyije gukuramo inda y’umwana ufite ubusembwa n’ibyakozwe n’Aba-Nazi

Yanditswe na Iradukunda Desire
Kuya 19 Kamena 2018 saa 05:45
Yasuwe :
0 0

Umushumba wa Kiliziya Gatolika ku Isi, Papa Francis, yamaganiye kure abakuramo inda z’abana bafite ubusembwa, abigereranya n’ibyo aba-Nazi bakoze babuza abafite ubumuga kubyara, babyita ko bagamije gusukura ubwoko bwabo.

Papa Francis yabitangaje ubwo yaganiraga n’ihuriro ry’imiryango y’Abataliyani (Italy’s Family Association) i Roma ku wa Gatandatu.

Nk’uko byatangajwe na Vatikani, yagize ati "Narabyumvise ko bigezweho cyangwa se ko ari ibisanzwe ko mu mezi ya mbere yo gutwita bakora isuzuma bareba ko umwana ameze neza cyangwa hari ikibazo afite; bagahita bavuga bati reka tuyikuremo."

“Ibi ndabivugana akababaro. Mu kinyejena cyashize, Isi yose yahuye n’ibibazo by’icyo Aba-Nazi bise gusukura ubwoko. Uyu munsi turakora ibisa na byo ariko tukabikorana uturindantoki twera.”

Ibyo bikorwa ngo ni uburyo aba-Nazi bashatse kugira ubwoko buzira inenge binyuze mu kwemera ko abana bavuka bari bafite ubuzima buzira inenge gusa (icyiswe Nazi eugenics). Ubwo buryo bwarimo gukuramo inda no gushiririza intanga z’abafite ubumuga bw’umubiri cyangwa bwo mu mutwe.

Papa Francis yanagarutse ku muryango ukwiye abantu, avuga ko ijambo umuryango ryataye igisobanuro kuko rikoreshwa ku nyenyeri, ibiti, inyamaswa n’ibindi, ariko ko ku bantu, umuryango ukwiye kuba ugizwe n’umugabo n’umugore.

Yakomeje agira ati “Ni uwo nta wundi. Umugabo n’umugore bashobora kuba batizera, ariko iyo bakundana kandi bagashyira hamwe mu gushyingirwa kwabo, baba bagize Isura y’Imana nubwo baba batizera. "

Uyu mushumba wa Kiliziya Gatolika yavuze aya magambo nyuma y’umunsi umwe igihugu akomokamo cya Argentina gitoye itegeko ryemera gukuramo inda ikiri mu byumweru 14 bya mbere, na mbere y’uruzinduko ateganya kugirira muri Ireland muri Kanama, mu nama azagirana n’imiryango itandukanye.

Umushumba wa Kiliziya Gatolika ku Isi, Papa Francis

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza