Papa Francis yateguriwe umubikira w’umuraperi mu bazamususurutsa muri Colombia

Yanditswe na Dusabimana Aimable
Kuya 4 Nzeri 2017 saa 10:07
Yasuwe :
0 1

Nyuma y’aho bitangarijwe ko Umushumba wa Kiliziya Gatolika ku Isi, Papa Francis, azagirira urugendo muri Colombia muri iki cyumweru, umubikira w’umuraperi yashyizwe mu bazaririmba mu kumwakira no kumuha ikaze.

Biteganyijwe ko Papa Francis azagenderera Colombia iri mu Majyepfo ya Amerika kuva ku itariki 6 kugeza ku 11 Nzeri, 2017.

Papa ashimirwa kuba ubwo aheruka mu 2016 yarunze ubuyobozi buriho muri icyo gihugu cyiganjemo abayoboke ba Kiliziya Gatolika ndetse n’abataravugaga rumwe na bo bari barayobotse iy’ishyamba.

Maria Valentina, umubikira w’umuraperi watoranyijwe n’itsinda rizaririmbira Papa Francis nagera muri icyo gihugu gituwe n’abaturage miliyoni 47, mu kiganiro yagiranye na AFP, yagize ati "Ni uburyo bwo kumwereka urukundo mu uko tubishobora, ari bwo bwo gukora umuziki."

Yongeyeho ati "Ikintu cyiza cyo kurapa ni uko biguma mu mutwe wawe mu buryo bworoshye. Kandi iyo bishyigikiwe n’ukuri mu ndiba, ariko Kirisitu, noneho bwo biba ari akataraboneka."

Uyu muraperi w’umubikira yavuze ko mu gihugu cye banejejwe no kuba bagiye kwakira Papa Francis, ati "Colombia iguhaye ikaze kandi n’amaboko yombi." Yongeye ati "Twese hamwe turavugira rimwe tuti ’Imana ihabwe ikuzo, yo nyir’ubushishozi yakutwoherereje ku bataka bwacu ngo utuyobore."

Valentina akomeza avuga ko uburyo akoramo umuziki we bujya guhura neza n’ijambo Papa Francis akunze kubwiriza abato, abasaba gutinyuka bagasingiza Imana mu buryo bwose bashoboye, barushaho no kwibanda ku gutanga ubutumwa bw’icyizere n’inema y’urukundo.

Ati "Intego yacu irenze gusa gushimira Data wa twese, ni ukuba nk’ikoraniro ku buryo buri wese abasha kuririmbana na twe." Hari aho yagize ati "Erega n’Imana ikeneye umwanya mu itangazamakuru ikamenywa na benshi binyuze mu buryo bugezweho muri iki gihe mu guhererekanya amakuru."

Uyu wihayimana avuga ko kuba umubikira ari zo nzozi ze za mbere ariko gukorana umuziki arapa nabyo akabishyira ku mwanya wa kabiri. Ngo yifuza gukora indirimbo nyinshi, gusa by’umwihariko akifuza ko abakunda ijwi rye n’uko aririmba na bo bakwisanga muri Yezu Kirisitu.

Uyu mubikira w’umuraperi ubusanzwe witwa Maria Valentina de los Angeles akora ibizwi nka ’Rap’, yifashishije umuziki w’injyana y’Abalatini amaze kuririmba mu ndirimbo zitandukanye zirimo ’Let’s Take The First Step’ y’abitwa United Catholic Musicians azaba ari kumwe na bo.

Maria Valentina, umubikira w’umuraperi uri mu bazakira Papa Francis
Colombia ni kimwe mu bihugu bituwe cyane n'abakirisitu Gatolika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza