Tonzi n’andi makuru mashya avugwa muri Gospel

Tonzi n’andi makuru mashya avugwa muri Gospel


Yanditswe kuya 23-10-2012 - Saa 05:22' na IGIHE Team

1. Tonzi yateguye igitaramo gihuza abahanzi ba Afurika y’u Burasirazuba

Uwitonze Clementine, uzwi ku izina rya Tonzi yateguye igitaramo kizahuza abahanzi bakomeye mu karere ka Afurika y’i Burasirazuba.

Aganira na IGIHE Tonzi, wamenyekanye cyane mu ndirimbo ‘Humura’ yagize ati ’’uyu mwaka mukumurika Alubumu yanjye ya gatatu, nafashe icyemezo cyo gukora igitaramo kiri ku rwego rw’akarere nise ‘East Africa Gospel concert’, aho natumiye umuhanzi umwe umwe muri bino bihugu bigize Afurika y’i Burasirazuba’’.

Iki gitaramo kizabera kuri Serena Hotel, ku Cyumweru tariki ya 4 Ugushyingo 2012 kuva saa kumi n’imwe z’umugoba. Kwinjira ari amafaranga ibihumbi bitanu (5,000Rwf) n’ibihumbi icumi (10,000Rwf).

Tonzi ku rwego rwa Afurika y'i Burasirazuba

Iki gitaramo kizagaragaramo abahanzi nka Dudu ubusanzwe witwa Theophile Niyukuri uzava i Bujumbura mu Burundi, Judith Babirye uzava i Kampala mu Bugande, itsinda ry’abasore ryitwa The Voice rizava muri Tanzaniya hamwe na Bishop Murili uzava i Nairobi muri Kenya .

Uretse aba bahanzi bo hanze, iki gitaramo kizitabirwa n’abandi bahanzi nyarwanda.


2. Rehoboth Ministries mu gitaramo “Praise and worship explosion"
Rehoboth Ministries

Rehoboth Ministries yateguye igitaramo cyo kuramya no guhimbaza yise “Praise and worship explosion”, kizaba ku Cyumweru, tariki ya 28 Ukwakira 2012, muri Salle ya Sport View Hotel, kuva saa cyenda z’amanwa kugeza saa mbiri z’ijoro (15h00’-20h00’/pm).

Douglas Kigabo, umuyobozi wa Rehoboth Ministries avugako insanganyamatsiko y’iki gitaramo ari “Mutima wanjye taraka, ushime Imana”,

Iki gitaramo gifite intego ebyiri arizo guhuza hamwe abantu bavuye mu matorero atandukanye mu mwanya wihari wo kuramya no guhimbaza Imana wisanzuye hamwe no guha amahirwe abatizera guhishurirwa ubwiza n’ubuntu bw’Imana binyujijwe mu kuramya no guhimbaza bikaba byatuma bizera bakacyira Yesu nk’umwami n’umukiza wabo.

Uretse Rehoboth Choir hakazaba hari na Cpt Simon Kabera bazafatanya cyo gushima Imana. Kwinjira muri iki gitaramo ni ubuntu.


3. Bobo Bonfils agiye kumurika Album
Bobo Bonfils

Tariki ya 25 Ugushyingo 2012, umuhanzi Bobo Bonfils arateganya kumurika Album ye ya mbere yise “Yesu Ni Wowe”. Icyo gitaramo kizabera muri Sport View Hotel i Remera Saa Cyenda z’umugoroba (15h00’).

Kizaba kirimo abahanzi nka Dominic Nic, Patient, Jimy, Bright, Theo Bosebabireba, Simon K, The Blessing Family Serge n’abandi.

Ubutumwa bukubiye muri iyo Album yose n’ukumenyekanisha Kristo Yesu no kuvuga icyo Yesu yaje gukora mw’Isi kugira ngo abantu barusheho kumeya inzira y’agakiza n’ubugingo buhoraho.

Iki gitaramo kije gikurikira ibindi 2 byakibanjirije yagiye akorera mu nsengero. Ushaka kumenya amateka arambuye ya Bobo Bonfils kanda hano uyasome kuri IGIHE.


4. Joy Kamikazi yasohoye indirimbo nshya yise “Nyakira”
Joy Kamikazi

Joy Kamikazi wamenyekanye cyane muri Prince of Peace Choir yo kuri EAR Kiyovu, ubu akaba yiga mu Buhinde, yasohoye indirimbo ye ya mbere yariririmbye ari wenyine, iyi ndirimbo akaba yayise “Nyakira”.

Ubusanzwe Joy kamikazi ni umuririmbi wakoranye n’abahanzi nka Eddie Mico, Ezra Kwizera, Pst P, Aime Uwimana gusa bose bakaba barakoranye binyuze muri Korale aririrmbamo Prince of Peace Choir.

Iyi ndirimbo “Nyakira” ye ya mbere yakozwe n’Umunyarwanda Producer Bruce ikaba iri mu njyana ya slow. Yumvikanamo Guiter nyinshi hamwe na Piano, ikaba ari indirimbo yo kuramya ndetse uwa wumva ko ari isengesho, ikanahimbaza Imana.

Aganira na IGIHE, Joy yagize ati “iyi ndirimbo rero ibaheshe umugisha, Ndabakunda, muhabwe umugisha cyane.”

Kamikazi Joy yavutse kuwa 7 Nzeri 1990, i Burundi. Ubu n’umuryango we batuye i Kigali, i Nyamirambo, mu Gitega, ariko we akaba ari kwiga mu gihugu cy’u Buhinde mu mwaka wa 2, Business Management,

Kamikazi asengera St Etienne (mu Biryogo). Afite gahunda yo gukomeza gukora izindi ndirimbo.


5. Glory Secondary School mu gikorwa cyo gushima Imana
Abagize itsinda ry'abanyamasengesho ba Glory Secondary School

Abanyeshuri bo kuri Glory Secondary School, ishuri riba ahahoze ULK, bateguye umunsi wo gushima Imana bise “Thanksgiving concert”, uzaba kuwa gatanu tariki ya 26 Ukwakira 2012, kuva saa saba n’igice z’umugoroba, uteguwe n’itsinda ry’abanyamasengesho ryaho.

Bazaba bari kumwe na umuhanzi Arcene Manzi, Pasiteri Gaby Ngamije na Pasiteri David, kandi kwinjira ni ubuntu muri icyi gikorwa kizaba kinarimo guhimbaza no kuramya Imana mu ndirimbo.

Iri tsinda ry’abanyamasengesho rya Glory Secondary School ryatangiye taliki 09 Gashyantare 2010, ritangizwa n’uwitwa Cyusa Benjamin akaba ari we wabawe Pastor imyaka itatu (3).

Glory Secondary School hanyuze abaririmbyi bazwi nka Serge Iyamuremye n’abandi bakozi b’Imana bava mu matorero atandukanye kuko ngo bahuje amatorero yose bakora umubiri umwe wa Kritso.

Mushambo Jean Glodi, umwe mubayobozi biyi Groupe de Priere, avuga ko bimwe mu byo bakora harimo guterana buri wa gatatu na buri wa gatanu saa saba n’igice (13h30), hakaba hari drama team yitwa Hope drama team na worship team n’izindi departement zitandukanye.

Yongeraho ati “twagiye gukora ibikorwa bitandukanye nko gusura abarwayi kuri CHUK”.


6. Nyuma yo kumurika Album ya Gospel, Gitego yashyize hanze indirimbo 5 nshya
Gitego Nsanga

Nyuma yo kumurika Album ye ya mbere ya Gospel tariki ya 6 Ukwakira 2012, umuhanzi Gitego Nsanga ubarizwa mu gihugu cy’u Buhinde noheno yashyize hanze indirimbo 5 nshyashya za Gospel.

Izo ndirimbo ni “Inkumburwa” yaririmbanye na Young Junior, “Icuze” yaririmbanye na Naason, “Irasubiza”, “Undinde” yaririmbanye na Charly, “Ijwi” yaririmbanye na Paulo.

Gitego avuga ko ari gutegura no guha abafana be indirimbo nshya za Album ye ikurikira zirimo “Sinzarimbuka”, “Ijambo”, “Iherezo”.

Yagize ati ”Album yanjye ikurikira izaba yitwa “Ingoma” izasoka umwaka utaha iherekejwe n’igitabo cyayo nkuko nabibatangarije.”

Gitego ashimira cyane abamufashije mu gutegura no kumurika Album ye nshya ya Gospel.

Agira ati “abandi ashimira ni police y’u Buhinde, ibitangazamakuru byambaye hafi, abahanzi nka Naason Pro na Fazzo Big Pro, M Prince, Manager Spacks, Dj Bertrand, Mc Kabera na Assia n’abamfashije muri serivise zose zitandukanye, mwarakoze ururimi rudashima ruragacika.”


7. Dreamland yateguye iserukiramuco ry’Amafilme ya gikiristo mu Rwanda
Chris, wo muri Dreamland

Guhera tariki ya 2 Ugushyingo kugeza tariki ya 11 Ugushyingo 2012, kuri Zion Tample harabera iserukiramuco ry’amafilime ashingiye ku ya gikiristo ryitwa “Rwanda Christian Film Festival’’ ryateguwe na Dreamland.

Ibihembo bizatangwa kuwa 11 Ugushyingo kuri Kigali Serena Hotel.

Kwiyandikisha muri iryo serukira muco ibisabwa nibi bikurikira, copyright ya film yawe , copy ya ID, ndetse na copy 3 za Film yawe, aho wakwiya ndikishiriza kubifuza kuryitabira nimuri centenary house muri 6 floor aho UA TV ikorerera cyangwase igikondo aho dreamland ifite studio hafiya merez , kubifuza ibindi bisobanuro batwadikira kuri e-mail: dreamlandrwanda@gmail.com .


8. Korali “Kubwubuntu” igiye kumurika Albumu ya mbere
Korali “Kubwubuntu"

Korali "Kubwubuntu" ikorera muri Kaminuza Nkuru y’u Rwanda irateganya kumurika Album yayo ya Mbere bise “Imirimo” mu kwezi gutaha kw’ Ugushyingo 2012.

Album izamurikirwa i Kigali.

Zimwe mu ndirimbo zizaba zigize iyi Album bise “Imirimo” ni: Imirimo, Abiringiye Uwiteka, Ntawundi, Ibanga.


9. Cadeau Umuhoza, umuhanzi mushya wa Gospel w’i Rubavu
Umuhoza Cadeau

Cadeau ni umuhanzi mushya wavuye mu itorero rya Restauration Church rya Gisenyi-Rubavu. Amaze gukora indirimbo eshatu (3), iya mbere ni “Mana uri mwiza”, iya kabiri ni “Twiyoborere” naho iya gatatu yitwa “Ikamba”.

Yavukiye DR Congo ku wa 26 Kanama aho bita Goma nyuma bimukira i Masisi arinaho yavuye aza mu Rwanda muri 1994.

Amazina y’ababyeyi be ni Mahinga Dieudonné na Therese Umutoni, akaba avuka ari impanga y’uwitwa Umulisa Esperance (Cadette).

Ni abakabiri mu bana batandatu ba Mahinga na Therese. Ubu ariko basigaranye Maman gusa kuko Papa wabo yitabye Imana muri 2004.

Arubatse, yashakanye na Bushayija Peter Gervais, bafitanye abana babiri (Umuhungu n’umukobwa). Amashuli abanza yayigiye muri Congo, ayisumbuye ayarangirijza La Colombiere Kigali hanyuma akomereza muri ULK arangiza muri 2008 muri Sociologie.

Yagiye agaragara mu bitaramo na Kayirebwa muri concert yiswe "Kuba" yarimo Brenda Fassy, Masamba, Natty Dread n’abandi.


10. Mugabe Assiel arategura Album ya Gatatu

Ni umuhanzi w’indirimbo zihimbaza Imana, umwanditsi w’indirimbo, umuririmbyi, ndetse akaba n’umucuranzi wa Piano na Guitare Acoustic.

Assiel ni umuyoboke w’Itorero Methodiste Libre i Gikondo, akaba yubakanye na Charlotte Nyirabugingo. Mu busanzwe akora akazi ko kwigisha mu Ishuri Rikuru rya Kicukiro College of Technology.

Yatangiye gukora carrier solo mu mwaka wa 2004 ari na bwo muri uwo mwaka yasohoye Album ye ya mbere yise “Ntihinduka”.

Yasohoye Album ye ya kabiri yise “Bera isi umucyo” y’amajwi n’amashusho mu mpera z’umwaka wa 2011 ikaba iri ku isoko. Muri iki gihe arateganya gushyira hanze indi Album.

Tuzarushaho kubagezaho byinshi kuri iyi Album mu nkuru zacu zitaha za Gospel.

Kolari Guershom nyuma y’alubumu ebyiri, irifuza kuzenguruka u Rwanda iririmba.


11. Nyuma ya Album ebyiri, Kolari Guershom irifuza kuzenguruka u Rwanda iririmba
Kolari Guershom

Ufitumufasha Elimerch, umuyobozi wa Kolari Guershom ibarizwa mu ntara y’Amajyepfo, Akarere ka Kamonyi, aratangaza ko Iyi Korari iteganya gutangira ibitaramo byo kuzenguruka u Rwanda.

Yagize ati “Nk’uko agace ka Gacurabwenge gafite amateka mu gihugu cy’u Rwanda, niko natwe twifuza kuzenguruka u Rwanda rwose turirimba indirimboz ziri kuri Albumu yacu mu ivugabutumwa kandi tubereka ibyiza Imana yadukireye”.

Korali Guershom igizwe n’abarimbyi 60. Ni iryo mu itorero Peresibiteriyeni mu Rwanda (EPR) region Remera Rukoma, Paroisse Gacurabwenge, Guershom.

Mu mwaka wa 2006 nibwo yagize igitekerezo cyo gusohora cassette Vol.1, bayisohora muri 2007 bayita ‘’Humura urarizwe’’ iriho indirimbo 11 arizo Ubuzima bwiza, Humura, Aratwibutse, Imana ni byose, Intwari, Urugendo, Dufitimana, Ururembo, Isi yose, Urera n’Imbaraga.

Mu mwaka wa 2011 yasohoye indi cassette Vol.2 bayita “Mana tabara’’ yo bayisohora iri kumwe n’amashusho iriho indirimbo 10 arizo Mana tabara, Umukunzi, Abayuda, Himbazwa, Tuzaruhuka, Urukundo impamvu, Mwijuru, Bwoko bw’Imana, Nimugaruke no Kumusaraba.


12. Jean-Paul Murara yarangije gutunganya Album nshya “Umushumba Wanjye”
Jean Paul Murara aririimba mu gitaramo

Jean Paul Murara, umuhanzi umenye mu bihangano bihimbaza Imana aratangaza ko Album ye nshya yamaze gutungana kandi ko agiye kuyigeza ku bafana be, mu gihe kitarambiranye.

Murara avuga ko muri iyi minsi ishize yari ahuze kubera impamvu z’akazi.

Murara ariko avuga ko uku kurangiza gutunganya Album ye kweeahuriranye no kubona umujyanama mu buhanzi ku buryo yiteguye kurushaho kwegera abafana be.

Yagize ati “Maze rero iminsi ndimo nshakisha umuntu wambera umujyanama agakurikirana ibihangano byanjye mu gihe nanjye ndi mu bindi nkaba nshimira Imana ko namaze kumubona.

Nyuma y’aho Album audio ye ya kabiri yise “Umushumba Wanjye” irangiye Jean-Paul Murara ashishikajwe cyane no gukora amashusho ya zimwe mu ndirimbo ziyiriho.

Izo ndirimbo azazikorera muri studio ya Bridge Films iri muri Bridge Records akazakorana na Producer benshi bamenyereye mu by’amavideos witwa Gilbert.

Ashimira abakunzi b’ibihangano bye uburyo bagiye bamwereka ukumuba hafi cyane kandi akaba abizeza nawe ko abahishiye byinshi byiza.

Amashusho y’indirimbo Ubuhamya ya Jean Paul Murara:

IGIHE Team: Kanyamibwa Patrick na Irakoze Richard

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO