Zimwe mu nkuru z’iyobokamana zaranze umwaka wa 2012

Zimwe mu nkuru z’iyobokamana zaranze umwaka wa 2012


Yanditswe kuya 31-12-2012 - Saa 10:12' na Emmanuel Kanamugire

Umwaka wa 2012 dusoza warazwe n’ ibikorwa byinshi mu madini. Mu gusubiza amaso inyuma twakusanyije bimwe muri byo bikomeye.

Hatangijwe urukiko rwa Kiliziya mu Rwanda

Muri Mutarama 2012, nk’uko byari biteganyijwe mu gitabo cy’Amategeko Rebero ya Kiliziya Gatolika, hashyizweho Urukiko rwa Kiliziya Gatolika mu Rwanda hagamijwe kurema uburyo bwo gukemura amakimbirane ashobora kuvuka mu bakirisitu, kunga ababikeneye, kurenganura abarengana no guhana abananiranye.

Hatangizwa urukiko rwa Kiliziya Gatorika

Iby’uru rukiko rwa Kiliziya, ntaho bihurira n’inkiko za Leta n’ubwo byuzuzanya kuko urwa Kiliziya gatolika rugenewe gusa abakristu gatolika, babatijwe, kandi b’ingeri zose babarizwa ku butaka bwa diyosezi : abari mu nzego z’ubusaserdoti nyobozi, abalayiki (ari nabo benshi), n’abiyeguriyimana, rukagendera ku Gitabo cy’Amategeko rebero ya Kiliziya (Code de Droit Canonique).

Ku wa 12 Werurwe 2 : Musenyeri Misago Augustin yarashyinguwe

Uwahoze ari Musenyeri wa Diyosezi Gatolika ya Gikongoro yitabye Imana yashyinguwe ku ya 15 Werurwe muri Cathedrale ya Gikongoro.

Mu ishingurwa rya Musenyeri Misago Augustin

Uyu muhango wari witabiriwe n’abantu batandukanye barimo abahagarariye andi madini, abasenyeri bagenzi be, abo mu muryango we, abadepite n’abandi bo mu nzego zinyuranye za Leta hanatangirwa ubutumwa bwari buturutse i Roma.

Amakimbirane mu itorero rya ADEPR

Uwahoze ari Umuvugizi w’amatorero ya Pentekote mu Rwanda, mu muhamgo wo kwimika Rugema Vedaste nk’umushumba wa Paruwase ya Bibare mu Mujyi wa Kigali, yatangaje ko nta makimbirane akirangwa muri ADEPR.

Hari tariki ya 17 Werurwe ubwo yagiraga ati “Itorero nta makimbirane rifite, ni akabazo gatoya k’abantu bake kandi nikamara gusobanuka neza, nta makimbirane azongera kugaragara. Byatewe n’amateka n’abagerageje kudufasha baradufashije ariko ntibyakunda uburero turagenda twiyubaka kuko twigishijwe inyigisho z’ubumwe n’ubwiyunge kandi zarinjiye.”

Aya macakubiri ariko yakomeje gucumba bigera aho Komisiyo y’Ubumwe n’Ubwiyunge itangira kugira inama ADEPR yo kuyakemura aho gukemuka bihindura isura ari na byo byaje kubyara ihagarikwa rya Komite ya ADEPR yari ihagarariwe na Usabwimana Samuel muri Kanama uyu mwaka, hashyirwaho Komite nshya iyobowe na.

Nyuma y’ishyirwaho rya komite nshya, abagize inteko rusange ya ADEPR bagiye mu mwiherero i Nkumba mu karere ka Burera, bagaruka bahigira Perezida wa Repuburika ko mu itorero ryabo batazongera kurangwa n’amacakubiri.

Mu gusoza uwo mwiherero kuri Petit Stade i Remera, Perezida Kagame yavuze ko amakimbirane yo muri ADEPR yanasohotse mu Itorero akagera hanze Igihugu kitayashaka. Ati "Ntabwo dukeneye umwuka mubi aho waba uva hose. Dukeneye ibintu byubaka."

ADEPR yakira Perezida Kagame mu gusoza umwiherero

Leta ntivuga rumwe na Kiliziya Gatolika ku guhindura inyito za Diyosezi

Nk’uko andi madini yo mu Rwanda harimo n’iya Islam bagiye bahindura inyito, kiliziya Gatolika yasabwe na Leta guhindura inyito za Diyoseze zicyitirirwa Perefegitura nka Butare, Gikongoro n’izindi ariko Kiliziya itangaza ko icyemezo cyayo cyaturuka kwa Papa i Roma.

Musenyeri Smaragde Mbonyintege, Umushumba wa Diyosezi ya kabgayi yagize ati :"Birasaba ko twicara tukabiganiraho nka Kiliziya Gatolika ndetse tukabihererwa uburenganzira na Papa.”

Avuga ko gukomezanya ayo mazina ya kera yumva ntacyo bitwaye, gusa ngo bazabiganiraho barebe ko byakwemerwa.

Ku bijyanye n’impamvu yo guhindura inyito mu madiyoseze, Minisitiri w’Ubutegetsi bw’Igihugu, James Musoni yasobanuye ko zigomba guhuzwa n’inzego z’imitegekere y’igihugu hakanirindwa urujijo inyito zimwe na zimwe zitera mu baturage.

Umunyamakuru Cleophas Barore yagizwe Pasitori

Umwe mu banyamakuru bakunzwe kubera ijwi rye rinogera amatwi ya benshi Barore Cleofas , yagizwe Pasitori muri Paroisse ya Remera mu Itorero rya ADEPR, Umujyi wa Kigali.

Uyu muhango wabereye i Remera kuri Petit Stade ubwo himikwaga abashumba bane

Mu kiganiro kigufi yagiranye n’abanyamakuru, Pastor Barore Cleophas abajijwe niba inshingano zo kuyobora intama yari ahawe azabasha kuzihuza n’izo afite nk’umunyamakuru, yavuze ko byose azabiha umwanya ku buryo nta kizabangamira ikindi.

Ku wa 20 Gicurasi : Amatora asa no kwemeza mu muryango w’Abasilamu mu Rwanda

Umuryango w’Abayisilamu mu Rwanda (AMUR) wazibye icyuho utora abayobozi babiri waburaga nyuma y’ihagarikwa ry’uwari Mufti wungirije wawo tariki 20 Gicurasi 2012 bikaba byasaga no kwemeza kuko abatowe bombi bari biyamamaje ari abakandida rukumbi.

Abo bakandida bemejwe ni Sheikh Nsengiyumva Jumatatu watorewe kuba umuyobozi wungirije w’umuryango na Sheikh Kayitare Ibrahim watorewe kuba Umukemurampaka mu muryango.

Icyakora Mufti w’u Rwanda Sheikh Gahutu Abdul Karim yatangaje ko abo bakandida aribo bonyine batanze kandidatire (candidature), nta wayitanze ngo isubizwe inyuma.


Ku wa 26 Kanama 2012 : Umuririmbyi Kizito Mihigo n’Intumwa Paul Gitwaza bateranye amagambo

Mu giterane cyiswe ‘Rwanda Shima Imana’ cyabaye tariki ya 26 Kanama 2012, kigahuza amatorero atandukanye ya Gikirisitu kuri Stade amahoro i Remera, umuhanzi wo muri Kiliziya Gatolika Kizito Mihigo, n’umuvugabutumwa wo mu itorero rya Zion Temple Paul Gitwaza, bagaragaje kuvuguruzanya kuri bimwe mu byo Bibiliya ivuga.

Kizito Mihigo, ubwo yajyaga kuririmba indirimbo Arc en ciel (Umukororombya), mu kuyisobanura akavuga ko hari ubwo Imana yajyaga irakarira abantu ikanabica, ariko ko igira n’imbabazi nyinshi byageze aho itanga Yesu, agereranya n’umukororombya aririmba, Gitwaza Paul wari uyoboye gahunda yavuguruje Kizito avuga ko Imana itica abantu bayo ahubwo ko ari satani ubigiramo uruhare.

Kizito akaba yaragarutse bwa kabiri asobanura ibyo yari yavuze mbere ariko asa n’uwihaniza Paul Gitwaza, bitavuzweho rumwe n’abari bitabiriye.

Ku wa 19 Kanama 2012 : Abayislamu basoje igisibo basabwa guhesha igihugu isura nziza

Umuryango w’Abayislamu mu Rwanda washoje ku mugaragaro igisibo gitagatifu cy’ukwezi kwa Ramadhan mu rwego rw’igihugu, mu muhango w’amasengesho wabereye kuri Stade Regional.

Mufti w’u Rwanda Sheik Abdul Karim Gahutu wayoboye amasengesho, yashimye Imana amahoro n’umutekano byaranze igisibo asaba Abayislamu gukunda igihugu no gukomeza kugisabira.

I Nyamirambo mu masengesho yo gusoza igisibo

Ku wa 28 Ugushyingo:Hizijihijwe imyaka 31 y’amabonekerwa i Kibeho

Ubwo hizihizwaga imyaka 31 amabonekerwa abaye i Kibeho mu Karere ka Nyaruguru, umushumba wa Diyoseze ya Butare Filipo Rukamba yahamagariye abakirisitu gatolika kwita ku butumwa Bikiramariya yahaye abo yabonekeye i Kibeho bamwe bavuga ko iyo buhabwa agaciro Jenoside itari kubaho mu Rwanda.

Uyu mwepiskopi yabwiye imbaga yari imuteze amatwi ko ubutumwa bwahawe abakobwa batatu babonekewe bureba abantu b’ingeri zose. Ku bihaye Imana ngo bubasaba kudatezuka ku muhamagaro wabo ; ku banyapolitiki ngo ni ukwirinda kwica no kwirinda kurangwa n’ubusambo, mu gihe abantu muri rusange bubasaba kurangwa no kwishingikiriza ku mana no gusenga kenshi.

Ibindi byagiye biba mu Iyobokamana n’amakorari menshi yagiye ashyira ku mugaraga album nshya.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO