Mu rukerera rwo kuri uyu wa kane taliki ya 04.03.2010 ahagana mu masaha ya 04h30 za mu gitondo muri Parking y’inzu yerekanirwamo Cinema yitwa Cine Star hariya mu biryogo nibwo urukuta rw’inzu ifatanye n’iyo parking rwahanukiraga imodoka zari zarayemo zirimo izitwara abagenzi(Minibus) 3 hamwe n’ivatiri y’umukinnyi Mugiraneza Migi ukinira muri APR FC.
Ba nyiri izo Minibus bakunze kujyana abagenzi mu Ntara y’Uburasirazuba twasanze aho iyo mpanuka yabereye batubwiye ko ejo barangije akazi baje bakahogesha imodoka bakanaziharaza nkuko bisanzwe icyo gihe imvura ikaba yari imaze guhita, bataha kare kugirango bazinduke basubira mu kazi.
Mu gitondo saa 04h30 ni bwo uru rukuta rw’iyi nzu rwaridutse rugwira igisenge cyari gitwikiriye izo modoka hanyuma byose hamwe byirunda kuri izo modoka ariko kubw’amahirwe akaba nta muntu wari uzirimo.
Izi modoka zangiritse bikabije kuburyo ba nyirazo batubwiye ko zitazongera kujya mu muhanda.
Umuyobozi w’iyi nzu yerekana Cinema ari nawe ny’iri icyo kibanza zarimo, Appolo, yabijeje ko azabishyura ariko abasaba ko bakwihangana akabanza akajya mu mishyikirano na nyir’iriya nzu yazigwiriye akaba ariho hava umwanzuro wo kwishyura izi modoka. Twababajije niba hari amasezerano yanditse bafitanye na Appolo arebana no kuraza ziriya modoka mu kibanza cye batubwira ko ntayo ariko ko yari yarabemereye ko ikizangirika kuri izi modoka azacyishyura.
Banadutangarije kandi ko nyir’iyi nzu yagwiriye izi modoka batigeze bamubona ariko bakaba babonye umuhungu we uretse ko we nta kintu yigeze abatangariza.
Ikigaragara kandi kemejwe na benshi bahageze ni uko iriya nzu ishobora kuba itagushijwe n’imvura nk’uko benshi bashobora kubyibwira ahubwo bikaba byaturutse ku mbaraga nke ibi bikuta byari bifite nyuma y’uko bayikuriyemo ibindi bikuta byari imbere mu nzu bityo inkingi zitega igisenge zikagabanyuka izisigaye zikaremererwa cyane, ikindi abantu bari aho bahurizagaho ni uko iyi nzu itari yubakishije amatafari ahubwo ari zimwe bita rukarakara ziba zubakishijwe ibiti n’ibyondo. gusa mu gikorwa cyo gusana iyi nzu cyarimo gikorwa muri iyi minsi bakaba barongereye uburebure bw’iyi nzu mu kujya hejuru ugereranyije buresha hafi na metero 1 ariko bwo bugizwe n’amatafari ahiye.
Foto:Iyi nzu ngo yakuwemo ibyumba byose bashaka kuyigira Salle tutashoboye kumenya icyari kuzakorerwamo
Ikindi twamenye ni uko mu gitondo ba ny’iri inzu bashatse gusibanganya ibimenyetso bagerageza gusenya n’ibindi bikuta bitagize icyo biba banakuraho ibiti byaguye kuri ziriya modoka ariko abaturage bakababera ibamba birananirana.
Twagerageje kumenya niba iyi nzu yaguye yaba itari ifite ubwishingizi kuburyo nibura byakorohereza nyirayo mu kwishyura ibyangijwe nyirayo ntayagira icyo adutangariza. Madjidi, umwe mu bari aho yagize ati: "uyirebye usanga ibigo by’ubwishingizi bitakwemera kuyishingira ku buryo bworoshye kuko amahirwe yo guteza impanuka bitewe n’uko yubatse nayo aba ari menshi cyane bikaba byatuma binemewe bayishingira ku mafaranga menshi cyane ashobora no kuba yaruta n’agaciro k’inzu ubwayo".
Ba nyir’izi Minibus nabo bafite impungenge z’igihombo bagiye guterwa na biriya byago dore ko izo modoka zabo zari inguzanyo ya banki batari barangiza kwishyura kandi bakaba batizeye neza ko banki yazibaguriye yaba ihagaritse kubishyuza kugeza nibura igihe nabo bishyuriwe.
Ingaruka ntizigarukira aho gusa kuko izi modoka zari zitunze n’imiryango yabo ndetse n’iy’abakozi bandi bazikoragaho ,byongeye kandi zikaba zaninjizaga imisoro yari ifitiye igihugu akamaro.
Teddy, umwe mubatuye mu Bilyogo yagize ati: "Hakwiye gufatwa ingamba zikaze mu myubakire yo mu mujyi wa Kigali ndetse n’ahandi hose mu gihuga, ibi ni isomo ku bateganya kubaka ndetse n’abo ibyago nk’ibi biba byagwiririye.
Iyi nayo ntizasubira mu muhanda
Uru rukuta ngo rwaturikije za moteri na chassis
Imodoka zahuye n’uruva gusenya
Ivatiri ya Migi yahangirikiye bikomeye
Imodoko y'isosiyete y'ubwikorezi Sotra nayo yahangirikiye
Ntiwamenya ko munsi aha harimo imodoka
Foto:Cyril NDEGEYA
Cyril NDEGEYA/IGIHE.COM-Kigali
