Burera: Abaturage batishoboye mu Murenge wa Kinyababa bashyikirijwe amatungo na Diocese ya Ruhengeri

posted on Mar , 10 2010 at 15H 42min 53 sec viewed 284 times

Ku nkunga y’umushinga Global Fund, Diocese ya Ruhengeri yatanze amatungo ku baturage batishoboye bibumbiye mu mashyirahamwe yo mu Murenge wa Kinyababa ho mu Karere ka Burera.

Aba baturage basobanuriwe ko aya matungo bayahawe muri gahunda yo kubafasha kwifasha, bityo bagaharanira ko yababera umusingi w’iterambere.

Nkuko twabitangarijwe na Padiri Diogene AHISHAKIYE umuyobozi wa komisiyo y’ubutabera n’amahoro ya Diocese ya Ruhengeri , ngo abaturage bahawe amatungo bibumbiye mu mashyirahamwe 3 abarizwa mu Tugali 3 two muri Kinyababa. Aya matungo akaba yatanzwe ku bufatanye bw’umushinga Global Fund.Abayahawe akaba ari abatishoboye ariko bafite ubushake bwo gukora kandi babishoboye.

Bamwe mu bahawe kuri ayo matungo twaganiriye nabo, badutangarije ko bishimiye aya matungo bahawe, kandi ngo bakaba bagiye gukoresha ibishoboka byose iyi nkunga bahawe nabo bakazayifashisha bagenzi babo.

Padiri Diogene AHISHAKIYE umuyobozi wa komisiyo y’ubutabera n’amahoro ya Diocese ya Ruhengeri, ati ‘’icyo tubategerejeho nuko bita kuri aya matungo akazabafasha kwiteza imbere bakava ku rwego rw’ishyirahamwe bakaba Koperative’’.

Umunyamabanga nshingwabikorwa w’Umurenge wa Kinyababa Fabrice NSABIMANA yabwiye aba bahawe matungo ko bayahawe mu rwego rwo kubafasha kwifasha, anabasaba ko baharanira ko aya matungo yazababera umusingi w’iterambere bakazafasha nabandi genzi babo.

Amatungo yatanzwe akaba ari intama 30 zahawe amashyirahamwe abiri harimo ishyirahamwe Twisungane ryo mu Kagali ka Kaganda, ndetse n’ishyirahamwe Tuzamurane ryo mu Kagali ka Rutovu. Uretse intama hanatanzwe kandi ingurube zigera kuri 15 zahawe ishyirahamwe Dufatanye ryo mu Kagali ka Bugamba.

Francine UMUTONI