Abafite ubumuga bwo kutumva no kutavuga barasemurirwa mu marenga mu kwiyamamaza kw’abakandida

Yanditswe na
Kuya 15 Nyakanga 2017 saa 11:52
Yasuwe :
0 0

Abafite ubumuga bwo kutumva no kutavuga mu matora ya Perezida wa Repubulika 2017, ni kimwe mu byiciro byitaweho mu buryo budasanzwe yaba mu kubongerera ubumenyi kuri aya matora no kubafasha gusobanukirwa gahunda z’iterambere, abakandida babafitiye, kugira ngo bazatore basobanukiwe.

Iki cyiciro cyakunze kwirengagizwa mu bihe by’amatora ku buryo abenshi wasangaga ntacyo bayaziho, bigatuma bamwe bavutswa uburenganzira bwabo bwo gutora cyangwa kwihitiramo uwo bifuza uzabageza ku nzozi zabo z’iterambere.

Mu bikorwa byo kwiyamamaza byatangiye ku wa 14 Nyakanga, aho umukandida wa FPR Inkotanyi, Paul Kagame, yiyamamarije mu Karere ka Ruhango na Nyanza, itsinda ry’abafite ubumuga bwo kutumva no kutavuga, bahawe umwihariko, kuko bagenewe umwanya wihariye n’ababasemurira imigabo n’imigambi abakandida bifuza kuzabagezaho.

Mu kiganiro IGIHE yagiranye na Gatari Jean Baptiste wari uhagarariye iri tsinda ku kibuga cya Rwabicuma mu Karere ka Nyanza, yavuze ko ari ikimenyetso gishimangira ko u Rwanda rwita ku bafite ubumuga kandi rushyigikiye amatora adaheza.

Yagize ati: “Kuri twebwe ni ibintu bishimishije cyane byerekana ko ari amatora adaheza, ari amatora buri munyarwanda wese yibonamo. Turashimira ubuyobozi bw’igihugu kuba bwarateje imbere abafite ubumuga mu buryo butandukanye, ndetse bukabaha n’amahirwe angana n’ay’abandi.”

Yakomeje avuga ko abafite ubumuga bwo kutumva no kutavuga muri ibi bikorwa byo kwiyamamaza byagenewe umuntu ushinzwe kubitaho, abasemurira mu rurimi rwabo rw’amarenga ku buryo nta kintu na kimwe bazacikanwa.

Gufasha abafite ubumuga bwo kutumva no kutavuga bizatuma bakoresha umutimanama wabo bihitiremo umukandida ubabereye, bamuhe amahirwe yo kubayobora bigendanye n’uko bumvise gahunda ze.

Uwiragiye Kellya washinze umuryango Media for Deaf uharanira uburenganzira bw’abafite ubumuga bwo kutavuga no kutumva mu itangazamakuru, yabwiye IGIHE ko iki gikorwa ari kimwe mu byo bari basabye mu bukangurambaga bise ‘My Vote count’ [ijwi ryanjye ni ingenzi], bwari bugamije gufasha iki cyiciro kwitabira amatora kandi bafite amakuru yose.

Yagize ati “Bifite uruhare runini kuko umukandida niba avuga ibyo azamugezaho, azabasha gutora nk’inshingano azi ibyo atoreye, yihitiremo uzamugirira akamaro bigendanye n’ibyo yamubwiye yumva ko bizamugeza ku iterambere yifuza.”

Uwiragiye akomeza avuga ko ubu bukangurambaga bwanakemuye ikibazo cy’uko mbere wasangaga kuri bariya bantu, kwiyimura kuri lisiti y’itora bibagora, kumenya niba igihugu kiri mu matora no kugorwa no kwitabira ibikorwa byo kwiyamamaza kuko batumva, bityo bakabona amatora nk’ibintu by’abandi.

Amakuru agera kuri IGIHE ni uko ahandi habereye ibikorwa byo kwiyamamaza yaba i Rusizi hiyamamarije umukandida wa Green Party, Dr Habineza Frank na Bugesera hiyamamarije, Mpayimana Philippe, ntabwo byashobotse ko abafite ubumuga bwo kutumva no kutavuga bahabwa umusemuzi.

Imibare y’Ikigo cy’Igihugu cy’Ibaruramibare, NISR, igaragaza ko mu 2012 abari bafite ubumuga bwo kutumva no kutavuga bari 33 475 mu gihugu cyose.

Komisiyo y’Amatora mu Rwanda (NEC), isanzwe ifasha abafite ubumuga bwo kutabona gutora kuko bemerewe kwifashisha ababatorera cyangwa bagakoresha inyandiko ya Braille. Abafite ubumuga bw’amaboko butuma badashobora kwitorera cyangwa kwishyirira urupapuro rw’itora mu gasanduku nabo bifashisha ababatorera.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza